1. Olie upondola okututolela onkhalelo yaviuka yokufenda Huku?

ONONGELEYA ononyingi mbupopia okuti valongesa otyili konthele ya Huku. Mahi otyo hatyili mokonda onongeleya mbulongesa ovipuka vielikalela konthele yokuti Huku olie no ñgeni tupondola okumufenda. Oñgeni tupondola okunoñgonoka onkhalelo yaviuka yokufenda Huku? Jeova oe vala upondola okututolela oñgeni tupondola okumufenda.

2. Oñgeni tupondola okulilongesa onkhalelo yaviuka yokufenda Huku?

² Jeova wetuavela Ombimbiliya, ngotyo tupondola okulilongesa onkhalelo yaviuka yokumufenda. Putyina tulilongesa Ombimbiliya, Jeova utukuatesako okupola esilivilo komalongeso ae mokonda utuhole unene. —Isaías 48:17.

3. Oityi Huku ahanda tulinge?

³ Ovanthu vamwe vapopia okuti Huku utavela onongeleya ambuho, mahi hangotyoko Jesus etulongesa. Wati: “Haaveho vati ‘Tatekulu, Tatekulu,’ mavakanyingila mouhamba wokeulu. Mukanyingila vala una ulinga ehando lia Tate.” Tyakolela okunoñgonoka oityi Huku ekahi nokulinga netyi makalinga. Otyo tyakolela mokonda Jesus waeleka omunthu wehetavela ku Huku nomunthu “uhena onondunge.”—Mateus 7:21-23.

4. Oityi Jesus apopia konthele yokulinga ehando lia Huku?

⁴ Jesus wetulondola okuti tyina tuhanda okulinga ehando  lia Huku tukala novitateka. Wati: “Nyingililei mombundi yahita. Mokonda onthanda nokuahandyuka etapalo lituala kehanyauno, iya ovanyingi omo vekahi nokunyingila. Anthi, ombundi onthutu nondyila yahita ituala komuenyo, iya kavehi vekahi nokuivasa.” (Mateus 7:13, 14) Ondyila yahita ine onkhalelo yaviuka yokufenda Huku, ituala komuenyo uhapu. Etapalo liahandyuka ine onkhalelo yapenga yokufenda Huku, ituala kononkhia. Mahi Jeova kahande omunthu nawike ankhie. Wavela ovanthu aveho omphitilo yokulilongesa konthele yae.​—2 Pedro 3:9.

5. Oñgeni tupondola okuimbuka vana vafende Huku monkhalelo yaviuka?

⁵ Jesus wapopia okuti onthue tupondola okuimbuka vana vafenda Huku monkhalelo yaviuka. Tulinga ngotyo tyina tutala nawa omalongeso avo netyi valinga. Wapopia okuti: “Kovinyango viavo oko mamuimbukila ovanthu ovo.” Iya ayawisako okuti: “Kese omuti omuwa wiima ovinyango oviwa.” (Mateus 7:16, 17) Otyo katyilekesa okuti vana vafenda Huku kavapengesa. Mahi ovaumbili va Huku apeho valinga ononkhono mbokulinga etyi tyaviuka. Pahe matutale oityi tyitukuatesako okuimbuka vana vafenda Huku monkhalelo yaviuka.

6, 7. Omokonda yatyi ovafendeli votyotyili valandula etyi tyipopia Ombimbiliya? Oityi ongeleka ya Jesus itulongesa?

⁶ Efendelo lietu lina okulikuata kumwe no Mbimbiliya. Ombimbiliya yati: “Ovihonekwa aviho viatumwa okuhonekwa na Huku nokuna esilivilo pala okulongesa, nokuviyula, nokuviukisa ovipuka, nokulonga nouviuki. Opo omunthu wa Huku akale tyafuapo nawa, nokuapongiyua nawa pala ovilinga aviho oviwa.” (2 Timóteo  3:16, 17) Apostolu Paulu wahonekela Ovakristau okuti: “Etyi muetavela ondaka ya Huku, ina mueiva kuonthue, onwe mueitavela okuti handakako yomunthu. Mahi, tyotyili ondaka ya Huku.” (1 Tessalonicenses 2:13) Efendelo liotyotyili litunda vala mondaka ya Huku, Ombimbiliya. Kalitundu momalusoke ovanthu ine ovipuka ovikuavo.

⁷ Ovipuka aviho Jesus alongesile ankho vitunda mo Ndaka ya Huku. (Tanga João 17:17.) Ovikando ovinyingi ankho utumbula Ovihonekwa. (Mateus 4:4, 7, 10) Ovaumbili votyotyili va Huku valandula ongeleka ya Jesus, iya ovipuka aviho valinga valandula etyi tyipopia Ombimbiliya.

8. Oityi Jesus etulongesa konthele yokufenda Jeova?

⁸ Tuna okufenda vala Jeova. O Salmo 83:18 yati: “Ove, utiwa Jeova, ove vala Omukulami kombanda yohi aiho.” Jesus ankho uhanda ovanthu vanoñgonoke olie Huku Yotyotyili iya evelongesa enyina lia Huku. (Tanga João 17:6.) Jesus wati: “Una okufenda Jeova Huku yove, oe vala una okulingila ovilinga vikola.” (Mateus 4:10) Ngotyo, mokonda tuvaumbili va Huku, tulandula ongeleka ya Jesus. Tufenda vala Jeova, tuundapesa enyina liae, tupu tulongesa vakuetu enyina lia Huku netyi meya okutulingila.

9, 10. Oñgeni tulekesa okuti tuhole vakuetu?

⁹ Tuesukisa okukala nohole yotyotyili novanthu. Jesus walongesa ovalongwa vae vakale nohole pokati kavo. (Tanga João 13:35.) Ohole kaitei oku tuatuka, ine komihoko novilongo, kolumono ine koluhepo. Ohole pokati ketu ituhonyeka kumwe novakuatate no nomphange. (Colossenses 3:14) Ngotyo onthue katuende kovilwa tupu katuipaa ovanthu. Ombimbiliya yati: “Ovana va Huku no vana ve Liapu, vaimbukilwa kuetyi: Kese munthu  wahalingi etyi tyaviuka, katundile ku Huku, na una uyele mukuavo.” Tupu wayawisako okuti: “Tuna okukala nohole kese umwe namukuetu. Tuhalingei nga Kaim watuka ke Liapu, aipaa ondenge yae.”—1 João 3:10-12; 4:20, 21.

¹⁰ Onthue tuundapesa ononkhono mbetu, nomuvo wetu, nomalumono etu opo tupameke nokukuatesako vakuetu. (Hebreus 10:24, 25) Tulinga “ovipuka oviwa pala ovanthu aveho.”​—Gálatas 6:10.

11. Omokonda yatyi tutavelela okuti Jesus ondyila ituala ku Huku?

¹¹ Tuesukisa okutavela ku Jesus mokonda oe ondyila ituala ku Huku. Ombimbiliya yati: “Kutupu eyovo momunthu omukuavo, mokonda mombuelo yeulu mutupu vali enyina ekuavo, pokati kovanthu tupondola okuyovokela.” (Atos 4:12) Mo Kapitulu 5, komukanda ou, tuelilongesa okuti Jeova watuma Jesus opo aave omuenyo wae ngo tyilikutila opo ayovole ovanthu vetavela. (Mateus 20: 28) Jeova waholovona Jesus opo akale Ohamba keulu, opo akatumine pano pohi. Otyo Ombimbiliya itupopila okuti tuna okutavela ku Jesus ankho tuhanda okukala nomuenyo uhapu.—Tanga João 3:36.

12. Omokonda yatyi onthue tuhelipakela mo pulitika?

¹² Onthue katulipake mo pulitika. Jesus kelipakele mo pulitika. Etyi Jesus ankho ekahi nokukoyeswa, apopila omutumini wo Roma Pilatu okuti: “Ouhamba wange kaulingi onthele youye uno.” (Tanga João 18:36.) Nga Jesus, nonthue tuvakuatyili Kouhamba wa Huku, iya mokonda yotyo, kese tyilongo oku tukala katulipake mo pulitika. Mahi, Ombimbiliya itupopila opo “tutavele kovatumini.” (Romanos 13:1) Onthue tutavela ovitumino vio motyilongo omu tukala. Mahi, tyina ovitumino ovio viliponya novitumino via Huku, onthue tulinga ngo  no apostolu, mbati: “Onthue tuna yokutavela ku Huku, tyipona kovanthu.”​—Atos 5:29; Marcos 12:17.

13. Oityi onthue tuivisa konthele Youhamba wa Huku?

¹³ Onthue tutavela okuti Ouhamba wa Huku, oo vala maukamanako ovitateka viovanthu. Jesus wapopia okuti “onondaka ombu onongwa Mbouhamba wa Huku,” mambukaiviswa kombanda yohi aiho. (Tanga Mateus 24:14.) Petupu omutumini womunthu utyivila okulinga etyi Ouhamba wa Huku mauketulingila. (Salmo 146:3) Jesus wetulongesa tulikuambele okuita Ouhamba wa Huku etyi ati: “Ouhamba wove uye. Ehando liove lilingwe pano pohi, ngetyi lilingwa keulu.” (Mateus 6:10) Ombimbiliya itupopila okuti Ouhamba wa Huku maukahanyako omautumini aeho “ngao ukakalako apeho.”​—Daniel 2:44.

14. Ovalie ove usoka okuti vafenda Huku monkhalelo yaviuka?

¹⁴ Konyima yokuelilongesa ononthele ombo pahe lipula okuti: ‘Ovalie valongesa etyi tyikahi mo Mbimbiliya? Ovalie vapopila vakuavo enyina lia Huku? Ovalie valekesa oluembia luotyotyili pokati kavo tupu vetavela okuti Jesus watumwa na Huku opo etuyovole? Ovalie vehelipake mo pulitika? Ovalie valongesa okuti Ouhamba wa Huku oo vala maukamanako ovitateka viovanthu?’ Onombangi mba Jeova valinga vala ngotyo.​—Isaias 43:10-12.

15. Oityi tuna okulinga inkha tuhanda Huku etavele efendelo lietu?

¹⁵ Okunoñgonoka vala okuti kuna Huku, katyituuka. Alo umwe ovilulu vityii okuti kuna Huku, mahi kavimutavela. (Tiago 2:19) Inkha tuhanda Huku etavele efendelo lietu, kamatutavela vala okuti oko ekahi, mahi tupu matulingi etyi etupopila.

16. Omokonda yatyi tulityilikila ongeleya yomatutu?

 ¹⁶ Opo Huku etavele efendelo lietu, tuna okuanya onongeleya mbomatutu. Omuuli Isaia wahoneka okuti: “Tundei pokati kavo, tualeiko tyasukuka.” (Isaias 52:11; 2 Coríntios 6:17) Otyo tuesukisila okulityilika ovipuka aviho vielikuata nefendelo liomatutu.

17, 18. “Ombambilonia Onene” oityi? Omokonda yatyi tuna yokukanyauka okutundamo?

¹⁷ Ongeleya yomatutu oityi? Onongeleya ambuho mbulongesa okufenda Huku monkhalelo yehelikuatele Nondaka yae. Ombimbiliya iihana onongeleya mbomatutu okuti “Ombambilonia Onene.” (Revelação [Apocalipse] 17:5) Omokonda yatyi? Konyima Yombila Onene kononthiki mba Noe, akuhimbikwa okuhindwa onongeleya ononyingi mbo matutu mepundaumbo lio Mbambilonia. Omalongeso oo omatutu aeliyandyana kombanda yohi aiho. Mongeleka, ovanthu ankho vakala mo Mbambilonia ankho vafenda ovikahuku vitatu vielikuata kumwe. Hono, tupu onongeleya mbulongesa okuti Huku wike mu vetatu. Mahi, Ombimbiliya ilongesa nokuayandyuluka okuti kuna vala Huku wike wotyotyili, Jeova. Iya Jesus Omona wae. (João 17:3) Ovanthu ankho vakala mo Mbambilonia tupu ankho vetavela okuti onthele imwe yolutu lwo munthu itualako nomuenyo tyina amankhi, nokuti onthele oyo ipondola okumona ononkhumbi mo ifelunu yotupia. Elongeso olio ha liotyotyili.—Tala outoi 14, na 17, na 18 ukahi konthyulilo yomukanda ou.

¹⁸ Huku waula okuti apa katutu onongeleya mbo matutu mambuhanyuako. (Revelação 18:8) Ove utyii omokonda yatyi tyalumbanesila okutunda mo nongeleya mbomatutu? Jeova uhanda utundemo tyina nkhele lihenetake.​—Revelação [Apocalipse] 18:4.

19. Tyina utokola okuumbila Jeova, oñgeni Jeova ekuyakulila?

¹⁹ Putyina wamatokola okutunda mongeleya yomatutu opo uumbile Jeova, vamwe omapanga ove ine ombunga vapondola okuhanoñgonoka etokolo liove iya avapake omuenyo wove movitateka. Mahi Jeova kemekuyekepo. Mokala pokati kombunga imwe onene, velihole pokati kavo tupu vena ekevelelo liokukala nomuenyo uhapu mouye omupe wa Huku. (Marcos 10:28-30) Hamwe vamwe pomapanga ove ine ombunga vekuyalele mokonda yetokolo walinga liokuumbila Jeova, mahi konyima navo avetavela okulilongesa Ombimbiliya.

20. Omokonda yatyi tyakolela okufenda Huku monkhalelo yaviuka?

²⁰ Apa katutu, Huku makahanyako ono ndingavivi ambuho iya Ouhamba wae aukatumina ohi aiho. (2 Pedro 3:9, 13) Oo maukakala omuvo omuwa! Ovanthu aveho mavakafenda Jeova monkhalelo Jeova ahanda tulinge. Ngotyo tyakolela ulinge etokolo pehepano liokufenda Huku monkhalelo yaviuka.