1, 2. Omokonda yatyi usokela okuti elikuambelo otyiawa tyimwe otyiwa? Omokonda yatyi tutyii okuti Ombimbiliya ilongesa konthele oyo?

OKUELEKA ohi nouye auho, ohi onthutu unene. Tyina Jeova atala pohi, ovanthu aveho nomalongo ae vekahi ngeta liomaande likahi mombaliti. (Salmo 115:15; Isaías 40:15) Namphila tuvatutu unene tyina tuelekwa nouye auho, o Salmo 145:18, 19 yati: “Jeova ukahi popepi novanthu aveho vemuihana. Ukahi popepi na vana vemuihana noukuatyili. Jeova makafuisapo ehando lia vana vena onthilo nae. Mevetehelela putyina vemuita ekuateso.” Olio elao limwe enene tuna! Jeova, Omutungi wetu Wepondolo aliho, uhanda okufuena kuonthue, tupu uhanda okutehelela omalikuambelo. Tyotyili, okulikuambela, elao limwe enene, Jeova aavela ovanthu aveho.

² Mahi Jeova ututehelela vala tyina tupopia nae monkhalelo yaviuka. Oñgeni matutyilingi? Tutalei etyi Ombimbiliya ipopia konthele yelikuambelo.

3. Omokonda yatyi ulikuambelela ku Jeova?

³ Jeova uhanda ove ulikuambele ine upopie nae. Oñgeni tutyii? Mbambavo tanga Filipenses 4:6, 7. Soka okukongwa ngotyo. Omutumini wouye auho wesuka unene nove iya uhanda omupopile ovitateka viove no ñgeni ulitehelela.

4. Oñgeni okulikuambela apeho ku Jeova tyipameka oupanga wove nae?

 ⁴ Elikuambelo litukuatesako okukala noupanga wapama na Jeova. Tyina omapanga atomphola apeho konthele yetyi velitehelela, netyi vasoka, oupanga wavo upama vali unene. Otyo tyelifua nokulikuambela ku Jeova. Mombimbiliya Jeova ukupopila omalusoke ae no ñgeni elitehelela, tupu ukupopila etyi makalinga komutwe wandyila. Popila Jeova oñgeni ulitehelela putyina upopia nae apeho melikuambelo. Tyina ulinga ngotyo, oupanga wove na Jeova maupame unene.—Tiago 4:8.

5. Oñgeni tutyii okuti Jeova katehelela omalikuambelo aeho?

⁵ Okuti Jeova utehelela omalikuambelo aeho? Au. Kononthiki mbomuuli Isaia, Jeova wapopilile ova Isilayeli okuti: “Namphila mulinga omalikuambelo omanyingi, ame himutehelela. Mokonda omaoko enyi amomesa ohonde onyingi.” (Isaías 1:15) Ngotyo inkha katulunguka, tupondola okulinga ovipuka vituyapula ku Jeova, iya Jeova ahatehelela omalikuambelo etu.

6. Omokonda yatyi ekolelo otyipuka tyakolela unene? Oñgeni molekesa okuti una ekolelo?

⁶ Inkha tuhanda Jeova atehelele omalikuambelo etu, tuna okukala nekolelo mwe. (Marcos 11:24) Apostolu Paulu wahoneka okuti: “Tyihena ekolelo katupondola okuhambukiswa nawa Huku. Mokonda vana vafuena ku Huku vena yokutavela okuti okuekahi, iya uyamba vana vemufenda nomutima auho.” (Hebreus 11:6) Mahi onthue katupopi vala okuti tuna ekolelo. Tuesukisa okulekesa okuti tuna ekolelo putyina tutavela ku Jeova ononthiki ambuho.​—Tanga Tiago 2:26.

7. (a) Omokonda yatyi tuna yokuliola omutima nokupopia nonthilo tyina tulikuambela ku Jeova? (b) Oñgeni matulekesa okuti tupopia otyili tyina tulikuambela?

⁷ Tuna okuliola omutima nokupopia nonthilo tyina tulikuambela ku Jeova. Omokonda yatyi? Tyina tukapopia nohamba ine nomutumini omukuavo, onthue tutyilinga monkhalelo imwe ilekesa onthilo. Jeova o Huku Wepondolo aliho, otyo katyilekesa okuti tuna yokukala vali unene nonthilo nokuliola omutima putyina tupopia nae? (Gênesis 17:1; Salmo 138:6) Tupu tuna yokupopia otyili nokulikuambela ku Jeova nomutima auho, atuhawana-wana vala onondaka mbuike ovikando aviho.​—Mateus 6:7, 8.

8. Tyina tuamelikuambela konthele yotyipuka tyimwe, oityi tupu tuesukisa okulinga?

⁸ Tupu, tyina tulikuambela konthele yotyipuka tyimwe, tuna okulinga atyiho tuvila opo tulinge ngetyi tuaita. Mongeleka, inkha tuita ku Jeova etuavele etyi tuesukisa ononthiki ambuho, katupondola okukevela Jeova etuavele ovipuka aviho atuhaundapa ngwe tuna ononkhono. Tuna okuundapa unene nokutavela kese tyilinga tuvila. (Mateus 6:11; 2 Tessalonicenses 3:10) Inkha tuaita ku Jeova opo etukuateseko okulinga otyipuka tyimwe tyapenga,  tuna okulityilika ovipuka aviho vipondola okutuhindila okutyilinga. (Colossenses 3:5) Pahe matulilongesa omapulo ovanthu valinga konthele yelikuambelo.

9. Okulie tuna yokulikuambela? Oityi omukanda wa João 14:6 utulongesa konthele yelikuambelo?

⁹ Okulie tuna yokulikuambela? Jesus walongesa ovalongwa vae velikuambele ku “Tate yetu ukahi keulu.” (Mateus 6:9) Tupu wapopia okuti: “Ame ndyila, ame tyili, ame muenyo. Nawike uya ku Tate ahapiti puame.” (João 14:6) Ngotyo, onthue tuna okulikuambela vala ku Jeova menyina lia Jesus. Omokonda yatyi tulikuambelela menyina lia Jesus? Opo Jeova etavele omalikuambelo etu, tuna okukala nonthilo notyilinga otyinene Jeova aavela Jesus. Ngetyi tuelilongesa, Jesus weya pano pohi opo etuyovole konkhali no kononkhia. (João 3:16; Romanos 5:12) Tupu Jeova waholovona Jesus opo akale Omunene-nakwa Wevilapo no Mukoyesi.​—João 5:22; Hebreus 6:20.

10. Okuti Huku utuita oñgeni tuna okukala tyina tulikuambela? Hangununa.

¹⁰ Oñgeni tuna yokukala tyina tulikuambela? Jeova ketuiti tuikile konongolo, tupumphame ine tutalame putyina tulikuambela. Ombimbiliya ilongesa okuti tupondola okulikuambela mononkhalelo mbelikalaila. (1 Crônicas 17:16; Neemias 8:6; Daniel 6:10; Marcos 11:25) Tyakolela vali ku Jeova, hankhalelo omunthu akala tyina elikuambela, mahi otyetyi tupopia nae monkhalelo yaviuka. Tupondola okulikuambela nondaka yakaluluka ine okulikuambelela momutima pu kese mphangu tuli, tyilinge komutenya ine kounthiki. Tyina tulikuambela ku Jeova, tuna okukala nonthumbi yokuti metutehelela, namphila tuheetwe novanthu.​—Neemias 2:1-6.

11. Ovipuka patyi vimwe tupondola okupopila Jeova?

 ¹¹ Oityi tuna yokuita melikuambelo? Tupondola okuita kese tyipuka Jeova etavela. Ombimbiliya yati: “Kese etyi tuita inkha tyelikuata nehando liae, ututehelela.” (1 João 5:14) Okuti tupondola okuita ovipuka tuhanda? Enga. Okulikuambela ku Jeova tyelifwa nokutomphola nepanga lietu enene. Tupondola okupopila Huku melikuambelo ovipuka aviho vikahi komutima wetu iya oe metutehelela. (Salmo 62:8) Tupondola okumuita ononkhono mbae ospilitu sandu opo itukuateseko okulinga etyi tyaviuka. (Lucas 11:13) Tupu, tupondola okuita ku Jeova etuavele ounongo wokulinga omatokolo aviuka, tupu tupondola okuita etuavele ononkhono opo tutyivile okukoleleya movitateka. (Tiago 1:5) Tupondola okuita ku Jeova opo etuevele ononkhali mbetu. (Efésios 1:3, 7) Tupu tupondola okuitilako vakuetu, okukutikinyamo onombunga mbetu novakuatate vetu no nomphange vekahi mewaneno.​—Atos 12:5; Colossenses 4:12.

12. Oityi tyina okukala otyipuka tyakolela vali momalikuambelo etu?

¹² Oityi tyina okukala otyipuka tyakolela vali momalikuambelo etu? O Jeova nehando liae. Tuna okumusoka mokonda yovipuka ovinyingi etulingila. (1 Crônicas 29:10-13) Otyo tutyii mokonda etyi Jesus eya pano pohi, walongesile ovalongwa vae oñgeni tyilikuambelwa. (Tanga Mateus 6:9-13.) Wapopila ovalongwa okuti tete vena okulikuambela opo enyina lia Huku lisukukiswe. Konyima, Jesus evelekesa okuti vena okulikuambela opo Ouhamba wa Huku uye nehando lia Jeova lilingwe pano pohi. Etyi Jesus amana okuita ovipuka ovio viakolela vali, pahe Jesus apopi okuti tupondola okulikuambela konthele yovipuka tuesukisa momuenyo. Tyina tupaka komutwe momalikuambelo etu Jeova nehando liae, tulekesa okuti ovipuka ovio viakolela kuonthue.

13. Omuvo ulifuepi tuna yokulikuambela?

¹³ Omuvo ulifuepi tuna yokulikuambela? Ombimbiliya kaityipopi. Mongeleka, tupondola okulinga elikuambelo esupi tyina tuhanda okulia, mahi tupondola okulinga elikuambelo elaale tyina tuhanda okupandula Jeova ine tyina tuna etyi tumupopila. (1 Samuel 1:12, 15) Jesus ankho kalingile omalikuambelo omale opo ahuvise ovanthu, ngetyi ovanthu ankho valinga po nonthiki mbae.  (Lucas 20:46, 47) Jeova kahuvu nomalikuambelo ngoo. Otyipuka tyakolela vali ku Jeova elikuambelo litunda komutima.

14. Ovikando viñgapi tuna okulikuambela, iya otyo tyitulongesa tyi konthele ya Jeova?

¹⁴ Ovikando viñgapi tuna okulikuambela? Jeova utuita tupopie nae apeho. Ombimbiliya ipopia okuti “tualeiko okulikuambela,” tupu yati “likuambelei apeho.” (Mateus 26:41; Romanos 12:12; 1 Tessalonicenses 5:17) Jeova apeho wafuapo opo etutehelele. Onthue tupondola okumusoka apeho mokonda yoluembia lwae notyali tyae. Tupu, tupondola okumuita etuhongolele, nokutuavela ononkhono, nokutupameka. Inkha tyili-tyili tupanda elao tuna liokulikuambela ku Jeova, matuovola onomphitilo ambuho mbokupopia nae.

15. Omokonda yatyi tutila okuti “amem” konthyulilo yelikuambelo?

¹⁵ Omokonda yatyi tutila “amem” konthyulilo yelikuambelo? Ondaka “amem”, ihangununa okuti “otyo yatyo” ine “tyilingwe ngotyo.” Ngotyo tulekesa okuti tuetavela etyi tyapopiwa melikuambelo tupu tuvakuatyili. (Salmo 41:13) Ombimbiliya ilongesa okuti tyaviuka okupopia okuti “amem” konthyulilo yelikuambelo tyilinge tualingila momutima ine tuapopila peulu ine lialingwa namukuetu, ngotyo tulekesa okuti tuetavela etyi tyaitwa.—1 Crônicas 16:36; 1 Coríntios 14:16.

16. Okuti Jeova ukumbulula omalikuambelo etu? Hangununa.

¹⁶ Okuti Jeova ukumbulula umwe omalikuambelo etu? Enga, ukumbulula. Ombimbiliya imuihana okuti “Omuteheleli womalikuambelo.” (Salmo 65:2) Jeova utehelela nokukumbulula omalikuambelo ovanthu ovanyingi alingwa nomutima auho, iya utyilinga mo nonkhalelo mbelikalela.

17. Oñgeni Jeova aundapesa onoandyu novaumbili vae pano pohi opo akumbulule omalikuambelo etu?

¹⁷ Jeova uundapesa onoandyu novanthu vae pano pohi opo akumbulule omalikuambelo etu. (Hebreus 1:13, 14) Kuna onongeleka ononyingi, mbovanthu velikuambela ku Huku okuita ekuateso opo vanoñgonoke Ombimbiliya iya momuvo uhehi aveya okutaleluapo Nombangi imwe ya Jeova. Ombimbiliya ipopia okuti onoandyu mbukahi movilinga viokuivisa “onondaka onongwa” mouye auho. (Tanga Revelação [Apocalipse] 14:6.) Tupu, ovanyingi puonthue tuhole okulikuambela ku Jeova konthele yotyitateka tyimwe ine konthele yotyipuka tyimwe tuesukisa iya atukuatesuako nomukuatate umwe Omukristau ine omphange.​—Provérbios 12:25; Tiago 2:16.

18. Oñgeni Jeova aundapesa ospilitu sandu Nombimbiliya opo akumbulule omalikuambelo etu?

 ¹⁸ Jeova uundapesa ospilitu sandu yae opo akumbulule omalikuambelo etu. Putyina tulikuambela okuita etukuateseko pomuvo wovitateka, Huku upondola okuundapesa ospilitu sandu opo ituhongolele nokutupameka. (2 Coríntios 4:7) Jeova tupu uundapesa Ombimbiliya opo akumbulule omalikuambelo etu nokutukuatesako okulinga omatokolo aviuka. Putyina tutanga Ombimbiliya, tupondola okuvasa onotestu mbutukuatesako. Jeova tupu upondola okuundapesa umwe mewaneno aave ekumbululo liotyipuka tuesukisa okutehelela ine omukulu umwe weuaneno apopie konthele imwe Yombimbiliya.—Gálatas 6:1.

19. Omokonda yatyi pamwe tusokela okuti Jeova kakumbulula omalikuambelo etu?

¹⁹ Pamwe tupondola okulipula okuti: ‘Omokonda yatyi Jeova ahakumbululila omalikuambelo ange?’ Hinangela okuti Jeova utyii onalupi no ñgeni akumbulula omalikuambelo etu. Jeova wii etyi tuesukisa. Onthue tutualako okulikuambela opo tulekese okuti tutyii etyi tukahi nokuita nokulekesa okuti tuna ekolelo mwe. (Lucas 11:5-10) Ovikando ovinyingi Jeova ukumbulula omalikuambelo etu monkhalelo tuhakevelela. Mongeleka, tupondola okulikuambela konthele yotyitateka tyimwe, mahi no ngotyo atyitualako, Jeova upondola okutuavela ononkhono opo tutyivile okukoleleya.—Tanga Filipenses 4:13.

20. Omokonda yatyi tulikuambelela ku Jeova?

²⁰ Tuna elao limwe enene liokulikuambela ku Jeova! Tuna onthumbi yokuti ututehelela. (Salmo 145:18) Iya tyina tulikuambela ku Jeova nomutima auho, oupanga wetu nae upama vali.