1. Oityi upondola okulipula tyina wamelilongesa nawa omukanda ou?

MOMUKANDA ou ove welilongesa otyili otyinyingi tyikahi Mombimbiliya, omulao wa Huku womuenyo wahapu, onkhalelo yo vokuankhia, netutilo. (Eclesiastes 9:5; Lucas 23:43; João 5:28, 29; Revelação 21:3, 4) Hamwe uhole okuenda komaliongiyo Onombangi mba Jeova iya waimbuka okuti vekahi mongeleya yotyotyili. (João 13:35) Hamwe wehimbika okukala noupanga  wapama na Jeova tupu hamwe watokola okumuumbila. Hamwe upondola okulipula okuti: ‘Oityi ndyina yokulinga pehepano opo ndyikale omuumbili wa Huku?’

2. Oityi omulume woko Etiopia ahandela okumbatisalwa?

² Epulo eli lialingilwe nomulume umwe woko Etiopia waliko pononthiki mba Jesus. Etyi palamba ononthiki, etyi Jesus atutiliswa, omulongwa wa Jesus utiwa o Filipe atolela omulume oo ondaka ya Huku. Filipe emupopila okuti, Jesus o Mesiya. Omulume oo woko Etiopia alundwa netyi alongeswa liwa-liwa apopi okuti: “Tala, omeva oyaa, oityi tyinthyilika okumbatisalwa?”​—Atos 8:26-36.

3. (a) Otyitumino patyi Jesus avela ovalanduli vae? (b) Oñgeni omunthu ambatisalwa?

³ Ombimbiliya ilongesa nokuayandyuluka nawa okuti inkha uhanda okuumbila Jeova una okumbatisalwa. Jesus wapopilile ovalanduli vae okuti: “Kalongesei ovanthu movilongo aviho opo vakale ovalongwa, amuvembatisala.” (Mateus 28:19) Jesus tupu aave ongeleka etyi ambatisalwa. Jesus wapakelue olutu lwae aluho momaande katililwe omaande pombalanganga. (Mateus 3:16) Hono tyina omukristau ambatisalwa upakwa olutu lwae aluho momaande.

4. Oityi ombatisimu yove ilekesa ku vakuenyi?

⁴ Tyina ove umbatisalua ulekesa ku vakuenyi okuti uhanda okukala epanga lia Huku nokumuumbila. (Salmo 40:7, 8) Ove upondola okulipula okuti, ‘Oityi nesukisa okulinga opo ndyimbatisalwe?’

5. (a) Oityi wesukisa okulinga tete tyina wehenembatisalwe? (b) Omokonda yatyi omaliongiyo Ovakristau otyipuka tyakolela?

⁵ Tyina nkhele wehenembatisalwe una okukala nenoñgonoko  lia Jeova na Jesus. Ukahi nokulinga ngotyo tunde apa wahimbika okulongeswa Ombimbiliya. (Tanga João 17:3.) Mahi otyo katyituuka. Ombimbiliya ipopia okuti una okukala “tyeyula enoñgonoko” liehando lia Jeova. (Colossenses 1:9) Omaliongiyo Onombangi mba Jeova maekukuatesako okukala noupanga wapama na Jeova. Otyo wesukisila okuenda apeho komaliongiyo oo.—Hebreus 10:24, 25.

6. Okuti wesukisa okunoñgonoka Ombimbiliya aiho tyina nkhele wehenembatisalwe?

⁶ Tyotyili, Jeova kakevelela unoñgonoke ovipuka aviho vikahi mo Mbimbiliya tyina nkhele wehenembatisalwe. Kakevelele omulume woko Etiopia anoñgonoke ovipuka aviho etyi ehenembatisalwe. (Atos 8:30, 31) Iya onthue matutualako apeho okulilongesa konthele ya Huku. (Eclesiastes 3:11) Mahi opo umbatisalwe, Wesukisa okunoñgonoka nokutavela ovitumino vimwe viakolela vio Mbimbiliya.​—Hebreus 5:12.

7. Okulilongesa Ombimbiliya tyekukuatesako okukala natyi?

⁷ Ombimbiliya ipopia okuti: “Tyihena ekolelo tyipuiya okuhambukiswa Huku.” (Hebreus 11:6) Ngotyo, ove wesukisa okukala nekolelo tyina nkhele uhenembatisalwe. Ombimbiliya itupopila okuti, ovanthu vamwe mepundaumbo lio Korintu yokohale veivile etyi ovalongwa va Jesus valongesile iya mokonda yotyo “avahimbika okutavela avambatisalwa.” (Atos 18:8) Tupu, ulongesiwa ovipuka ovinyingi Mombimbiliya viekukuatesako okukala nekolelo momilao via Huku no motyilikutila tyeyovo tya Jesus tyituyovola konkhali no kononkhia.​—Josué 23:14; Atos 4:12; 2 Timóteo 3:16, 17.

8. Oityi matyikulundu okupopila vakuenyi etyi ukahi nokulilongesa?

⁸ Tyina ulilongesa vali Ombimbiliya omono oñgeni ikahi nokukuatesako momuenyo wove, ekolelo liove malipame. Mohande okupopila vakuenyi etyi ukahi nokulilongesa. (Jeremias 20:9; 2 Coríntios 4: 13) Mahi ovalie una okupopila?

9, 10. (a) Ovalie mohimbika okupopila etyi ukahi nokulilongesa? (b) Oityi una okulinga inkha uhanda okuivisa newaneno?

⁹ Ove upondola okupopila ombunga yove, nomapanga, novanthu vakala pomaumbo ine vana uundapa navo, etyi ukahi nokulilongesa. Okulinga ngotyo otyiwa, mahi apeho tuna okutyilinga nokankhenda noluembia. Mokueenda kuomuwo upondola okuhimbika okuivisa kumue newaneno. Tyina wamatale okuti wafuapo, upondola okupopia Nombangi ya Jeova ukahi nokukulongesa Ombimbiliya, okuti uhanda okuivisa newaneno. Inkha omunthu ukulongesa Ombimbiliya wiimbuka okuti wafuapo iya utyinda omuenyo welikuata novitumino vio Mbimbiliya, ove nae mamuliongiya novakulu vewaneno.

¹⁰ Oityi matyipopiwa meliongiyo olio? Ovakulu vewaneno mavatomphola nove opo vatale inkha wanoñgonoka nokutavela ovitumino vio Mbimbiliya, tupu inkha ukahi nokuendela muetyi Ombimbiliya ipopia, inkha tyili-tyili uhanda umwe okukala Ombangi ya Jeova. Hinangela okuti ovakulu vewaneno vakuatesako ovanthu aveho vekahi mewaneno, okukutikinyamo ove, ngotyo wahawele owoma okupopia navo. (Atos 20:28; 1 Pedro 5:2, 3) Konyima yeliongiyo olio, ovakulu  vewaneno mavekupopila inkha mohimbika okuivisa newaneno.

11. Omokonda yatyi tyakolela okulinga omapiluluko tyina nkhele wehenehimbike okuivisa newaneno?

¹¹ Ovakulu vewaneno mavekupopila okuti wesukisa okulinga omapiluluko omanyingi tyina nkhele wehenehimbike okuivisa newaneno. Omokonda yatyi tyakolela okulinga omapiluluko oo? Omokonda tyina tupopila vakuetu konthele ya Huku, tuvathumwa va Jeova iya tuna okutyinda omuenyo umunkhimaneka.​—1 Coríntios 6:9, 10; Gálatas 5:19-21.

12. Omokonda yatyi ovanthu aveho vesukisila okulivela?

¹² Kuna vali ovipuka ovikuavo ove wesukisa okulinga tyina nkhele uhenembatisalwe. Apostolu Petulu wati: “Livelei . . . iya amupilulula onkhalelo yomuenyo wenyi, opo ononkhali mbenyi mbunyimwe.” (Atos 3:19) Oityi tyihangununa okulivela? okulivela Tyihangununa oluihamo komutima mokonda yotyivi walinga. Mongeleka, inkha ankho ulinga oundalelapo, una yokulivela. Iya namphila ukahiale nokulinga ononkhono mbokulinga etyi tyaviuka, nongotyo nkhele wesukisa okulivela, mokonda ovanthu aveho ovakuankhali vesukisa okuevelwa na Huku.​—Romanos 3:23; 5:1.

13. Oityi tyihangununa ondaka “okutyiyekapo”?

¹³ Okuti tyituuka okulivela vala mokonda yotyipuka tualingile? Au. Paulu wapopia okuti wesukisa “okuviyekapo.” Tyihangununa okuti wesukisa okulityilika ovivi aviho ohimbika okulinga etyi tyaviuka. Mongeleka, soka ñgeno ukahi nokulinga oungendi okuenda kotyilongo tyimwe uhei. Mahi oimbuka okuti ondyila wapolesapo hayoko. Oityi molingi? Mo ovola ondyila yaviuka  oyekepo ei yapenga. Tyelifwa notyo, tyina ulilongesa Ombimbiliya, upondola okuimbuka okuti ovituwa vimwe ine ovipuka vimwe momuenyo wove wesukisa okulinga omapiluluko. Linga atyiho opo “uviyekepo,” olingi omapiluluko esukisa, iya ohimbika okulinga etyi tyaviuka.

14. Oñgeni molingi elipakulo liove ku Huku?

¹⁴ Otyipuka otyikuavo tyakolela wesukisa okulinga tyina nkhele uhenembatisalwe okulipakula ku Jeova. Tyina ulipakula ku Jeova, ove ulinga omphango melikuambelo opopi okuti otyipuka tyakolela vali uhanda vala okulinga, okumufenda nokulinga ehando liae.​—Deuteronômio 6:15.

15, 16. Oityi tyiavela ondundo omunthu opo elipakule ku Huku?

¹⁵ Okupanga okuti uhanda vala okufenda Jeova, tyelifwa nokupanga okuti uhanda okukala omuvo omunyingi nomunthu uhole unene. Pahe soka komulume nomukai velihanda. Tyina omulume amaimbuka okuti omukai una ovituwa oviwa, uhimbika okumuhanda vali unene iya ehando liokulinepa aliliyawisa. Namphila otyinepo otyipuka tyimwe tyahapepukile, mahi omulume utavela otyilinga otyo mokonda uhole unene omukai oo.

¹⁶ Putyina ulilongesa konthele ya Jeova, mokala nohole nae, otyo matyikulundu okulinga atyiho uvila opo umuumbile. Ombimbiliya ipopia okuti omunthu uhanda okulandula Jesus una “yokulianya oe muene.” (Marcos 8:34) Oityi otyo tyihangununa? Otyo tyihangununa okuti una okupaka tete momuenyo vove okutavela ku Jeova. Etyi Jeova ahanda tyakolela vali tyipona omahando ove ine ovilinga uhanda.​—Tanga 1 Pedro 4:2.

17. Omokonda yatyi ovanthu vamwe kavahande okulipakula ku Jeova?

 ¹⁷ Ovanthu vamwe kavahande okulipakula ku Jeova mokonda vena owoma wokuti kamavetyivili okufuisapo omulao wokumuumbila. Kavahande okunumanesa Jeova, ine vasoka okuti inkha kelipakula kwe, tupu Jeova kemevekoyesa mokonda yovipuka valinga.

18. Oityi matyikukuatesako okulityilika okulinga ovipuka vinumanesa Jeova?

¹⁸ Ohole una na Jeova maikukuatesako okulityilika okulinga ovipuka vimunumanesa. Mokonda umuhole molingi atyiho uvila opo ulinge ngetyi walaa. (Eclesiastes 5:4; Colossenses 1:10) Kumasoko okuti okulinga ehando lia Jeova otyipuka tyipwilisa. Apostolu João wahoneka okuti: “Ohole na Huku ihangununa okutavela ovitumino viae. Iya ovitumino viae kavialemene.”—1 João 5:3.

19. Omokonda yatyi ove kuesukisile okukala nowoma wokulipakula ku Huku?

¹⁹ Opo ove ulipakule ku Jeova kuesukisile okukala omunthu uhena ononkhali. Jeova kakevela ulinge etyi wehevili. (Salmo 103:14) Mekukuatesako okulinga etyi tyaviuka. (Isaías 41:10) Yumba onthumbi mu Jeova nomutima wove auho, iya “oe maviukisa onondyila mbove.”​—Provérbios 3:5, 6.

20. Tyina omunthu amelipakula ku Huku, oityi vali esukisa okulinga?

²⁰ Usoka okuti, wafuapo pala okulipakula ku Jeova? Tyina wamelipakula ku Jeova pahe mokala tyafuapo opo ulinge ovipuka ovikuavo. Ove wesukisa okumbatisalwa.

21, 22. Oñgeni ove “moave oumbangi” wekolelo liove?

²¹ Popila onkhalamutwe yovakulu vewaneno liove okuti welipakulale ku Jeova, pahe uhanda okumbatisalwa. Iya oe mapopila ovakulu vakuavo vewaneno opo vatomphole nove konthele yomalongeso amwe Ombimbiliya. Inkha ovakulu ovo vaimbuka okuti wafuapo, mavekupopila opo umbatisalwe motyionge tyo nthiki ike ine tyo nonthiki ononthatu tyo  Nombangi mba Jeova. Motyionge mamulingwa elongomona malipopi oityi tyihangununa ombatisimu. Omunthu malingi elongomona konyima malingi omapulo evali kovanthu aveho mavambatisalwa. Putyina ukumbulula omapulo oo, ukahi nokuava “oumbangi” wekolelo liavo kounyingi.​—Romanos 10:10.

²² Monthiki mombatisalwa, olutu luove aluho malupakwa momaande. Ombatisimu mailekesa kovanthu  aveho okuti ove welipakula ku Jeova iya pahe Umbangi ya Jeova.

23. Oityi tyihangununa okumbatisalwa “menyina lia He, no lio Mona, no liospilitu sandu”?

²³ Jesus wati ovalongwa vae vena okumbatisalwa “menyina lia He no lio Mona no liospilitu sandu.” (Tanga Mateus 28:19.) Oityi otyo tyihangununa? Tyihangununa okuti waimbuka outumini wa Jeova notyilinga tya Jesus mehando lia Huku, no ñgeni Huku aundapesa ospilitu sandu opo afuisepo ehando liae.​—Salmo 83:18; Mateus 28:18; Gálatas 5:22, 23; 2 Pedro 1:21.

24, 25. (a) Oityi ombatisimu ilekesa? (b) Oityi matulilongesa mokapitulu kahulililako?

²⁴ Ombatisimu otyipuka tyimwe tyakolela unene. Tyina upakwa momaande tyilekesa okuti wankhia ine wayekapo onkhalelo yove yomuenyo. Tyina uyaulwa momaande, otyo tyilekesa okuti pahe uhimbika omuenyo omupe pala okulinga ehando lia Huku. Otyo tyilekesa okuti pahe moumbila vala Jeova. Hinangela okuti ove wapakula omuenyo wove ku Jeova. Kuelipakulile kovilinga, ine okomunthu, ine okeongano.

²⁵ Elipakulo liove malikukuatesako okukala noupanga wapama na Huku. (Salmo 25:14) Otyo katyihangununa okuti omunthu wayovokale mokonda vala wambatisalwa. Apostolu Paulu wahoneka okuti: “Tualeiko okulinga ovipuka vieta eyovo lienyi. Tualeiko okutyilinga nonthilo nonthekete.” (Filipenses 2:12) Ombatisimu onthyimbi vala. Oñgeni motualako okufuena vali ku Jeova? Okapitulu kahulililako komukanda ou, makakumbulula epulo olio.