Enyina lia Huku o Jeova iya lihangununa okuti “Ame ndyikala etyi nahanda okukala.” Jeova o Huku wepondolo aliho, iya watunga ovipuka aviho. Una epondolo liokulinga atyiho ahanda okulinga.

Melaka lio Hebreu enyina lia Huku lihonekwa nono letela ononkhuana. Mo lunyaneka omaletela oo YHWH ine JHVH. Movihonekwa vio Hebreu, enyina olio livasiwamo ovikando vihungi 7.000. Ovanthu mouye auho vatumbula enyina lia Jeova mo nonkhalelo mbelikalela, velitumbula ngetyi tyipopiwa melaka liavo.

▸ Kap. 1, pal. 15

Muene wo Mbimbiliya o Huku, mahi waundapesa ovanthu opo veihoneke. Otyo tyelifwa nomuhona upopila omuundapi wae opo ahoneke omukanda muna onondaka mbo muhona. Huku waundapesa ospilitu sandu ihongolele ovahoneki Vombimbiliya opo vahoneke etyi tyelikuata nomalusoke ae. Ospilitu ya Huku yevehongolela mononkhalelo ononyingi, ovikando vimwe yevelekesa omamonekelo ine onondyoi mbovipuka vahoneka.

▸ Kap. 2, pal. 5

Omalongeso Ombimbiliya ahangununa otyili tyo Mbimbiliya monkhalelo yapepuka. Mongeleka, otyitumino tyokuati “omapanga omavi anyona ovituwa oviwa” tyitulongesa okuti omapanga etu apondola okutuhindila okulinga otyivi ine otyiwa. (1 Coríntios 15:33) Iya otyitumino tyokuati “etyi omunthu akuna, tupu otyo makateya,” tyitulongesa okuti ovituwa vietu vipondola okutuetela ovitateka ine okutuetela ouwa.—Gálatas 6:7.

▸ Kap. 2, par. 12

Onondaka mbutunda ku Huku. Pamwe ehangununo liehando lia Huku, omalongeso, ovitumino ine ekoyeso. Tupu onondaka mbuhangununa otyipuka tyimwe matyikamoneka komutwe wandyila. Kuna omaulo omanyingi Ombimbiliya afuiswapo-ale.

▸ Kap. 2, pal. 13

Omaulo omanyingi Ombimbiliya konthele ya Mesiya afuiswapo mu Jesus. Tupu tala okakasa kati “ Omaulo Konthele ya Mesiya.”

▸ Kap. 2, pal. 17, okatoi.

Jeova watunga ohi opo ikale eumbo liovanthu vemuhole. Ehando liae kaliapilulukile. Apa katutu, Huku makahanyako ono ndingavivi iya aavela ovanthu vae omuenyo uhapu.

▸ Kap. 3, pal. 1

Satanasi oandyu yatyitukilapo Huku. Ihanwa okuti Satanasi, tyihangununa okuti “Ondyale” mokonda watyitukilapo Jeova. Tupu wiihanwa okuti Eliapu, tyihangununa “Omutendeleyi.” Enyina olio welipewa mokonda wakemba konthele ya Huku nokuyondya ovanthu.

▸ Kap. 3, pal. 4

Jeova watetekela okutunga onoandyu etyi nkhele ehenetunge ohi. Onoandyu mbatungwa opo mbukale keulu. Kuna onoandyu ononyingi. (Daniel 7:10) Onoandyu mbuna omanyina novituwa vielikalela, iya onoandyu mbekolelo nokueliola omutima mbulityilika okufendwa novanthu. Kuna ovikundyi vielikalela vio noandyu tupu mbuna ovilinga vielikalela. Povilinga ovio vimwe muakutikinya okukala ponthele yotyipundi tya Jeova tyoutumini, pala okutumwa onondaka, nokuamena nokuhongolela ovanthu va Huku pano pohi, nokutuala onondaka mbekoyeso, nokukuatesako ovilinga viokuivisa. (Salmos 34:7; Revelação 14:6; 22:8, 9) Apa katutu, mambukakuatesako Jesus movilwa vio Armagedom.—Revelação 16:14, 16; 19:14, 15.

▸ Kap. 3, pal. 5; Kap. 10, pal. 1

Onkhali onkhalelo tulitehelela, nokusoka ine okulinga otyipuka tyimwe Jeova eyele. Mokonda onkhali inyona oupanga wetu na Huku, Huku utuavela ovitumino no nondonga mbutukuatesako okulityilika okulinga onkhali. Ponthyimbi, walinga ovanthu tyehena onkhali, mahi Andau na Eva vaholovona okuhetavela ku Jeova, valinga onkhali iya avakala ovakuankhali. Vakulupa avankhi, iya mokonda yonkhali tuapiñgana ku Andau, nonthue tukulupa nokunkhia.

▸ Kap. 3, pal. 7; Kap. 5, pal. 3

Ovilwa via Huku mavihanyeko ouye wa Satanasi novivi aviho.

▸ Kap. 3, pal. 13; Kap. 8, pal. 18

Ouhamba wa Huku outumini wa Jeova ukala keulu. Jesus Kristu oe ukahi nokutumina Mouhamba oo. Komutwe wandyila, Jeova makaundapesa Ouhamba wae opo amaneko ovivi aviho. Ouhamba wa Huku maukatumina ohi aiho.

▸ Kap. 3, pal. 14

Huku watunga Jesus puetyi ehenetunge ovipuka ovikuavo. Jeova atumu Jesus pano pohi opo ankhie mokonda yovanthu aveho. Konyima Jesus aipawa, Jeova emututilisa. Jesus pehepano ukahi nokutumina keulu ngo Hamba Youhamba wa Huku.

▸ Kap. 4, pal. 2

Ombimbiliya yaula ine yapopia onalupi Mesiya mamoneka. Mamoneka konthyulilo yomuvo umwe wiihanwa okuti ono simanu 69, wahimbika menima 455 P.K.E. iya aumanuhuka menima 29 P.K.

Oñgeni onthue tutyi okuti tyamanuhuka menima lio 29 P.K.? Ono simanu 69 mbahimbika menima 455 P.K.E. Neemias wahika ko Jelusalei iya ahimbika nokutunga epunda-umbo. (Daniel 9:25; Neemias 2:1,5-8) Ngetyi ondaka “ekwi navali” itusokesa kombalulu12, nongotyo ondaka “semanu” ituhinangelesa ombalulo 7. Ono simanu meulo olio ha nosimanu mbutyinda ononthiki epandu-vali, mahi omanima epandu-vali, ngetyi tyipopia eulo onthiki “ike enima like.” (Números 14:34; Ezequiel 4:6) Otyo tyihangununa okuti kese simanu tyilekesa omanima epandu-vali iya ono simanu 69 mbutuuka omanima 483 (69 x 7). Inkha tuvalula omanima 483 okupolelela menima 455 P.K.E., matuhiki menima 29 P.K. Menima olio, otyo Jesus ambatisalwa iya akala Mesiya.—Lucas 3:1, 2, 21, 22.

 Amaulo omakuavo apopia osimanu epandu-vali, alekesa umwe okuti omanima epandu-vali. Mokueenda kuomuvo 33 P.K. Mesiya ankho wipawa iya okuhimbikila menima 36 P.K. onondaka onongwa Mbouhamba wa Huku ankho mbuna okuiviswa komalongo aeho ha kova Judeu vala.—Daniel 9:24-27.

▸ Kap. 4, pal. 

Ombimbiliya ilongesa okuti Jeova Huku Omutungi, iya watetekela okutunga Jesus kovipuka viatyo aviho. (Colossenses 1:15, 16) Jesus ha Huku wepondolo aliho. Jesus kapopile okuti welifua na Huku. Mahi wapopia okuti: “Tate omunene vali kuame.” (João 14:28; 1 Coríntios 15:28) Mahi onongeleya mbumwe mbulongesa okuti Huku omunthu wike movanthu vetatu: He, Nomona nospilitu sandu. Elongeso olio omatutu. Ondaka “Outatu ukola” Mombimbiliya kaimo.

Ospilitu sandu ononkhono mba Huku mbahamonwa, Jeova aundapesa opo alinge ehando liae. Ngotyo hamunthu ko. Mongeleka, Ovakristau “votete vakalele tyeyula ospilitu,” iya Jeova ati: “mandyikauyulila ononkhono mbange kovanthu aveho.”​—Atos 2:1-4, 17.

▸ Kap. 4, pal. 12; Kap. 15, pal. 17

Tyina o vakristau votyotyili vafenda Huku, kavaundapesa ekulusu. Omokonda yatyi?

1.  Ekulusu liahimbika okuundapeswa monongeleya mbo matutu tunde kohale. Ankho liundapeswa pala okufenda ovipuka Huku atunga, noundalelapo ankho ulingwa no nonkhalamuthue mbo nonongeleya. Tunde etyi Jesus ankhia apalambe omanima 300, iya Ovakristau ankho kavaundapesa ekulusu mefendelo liavo. Konyima, Omutumini umwe wo Roma utiwa Constantino ehimbika okuundapesa ekulusu ngenyingilikilo liefendelo lio Vakristau. Enyingilikilo liaundapeswa opo ongeleya yavana veliti Ovakristau iliyandyane. Mahi, tyotyili, Jesus Kristu kankhililile mekulusu. Omukanda The New Catholic Encyclopedia wati: “Ekulusu ankho liundapesuale novanthu puetyi Kristu nkhele eheneye, iya liatualako okuundapeswa na vana vehe-vakristau.”

2.  Jesus Kristu kankhililile mekulusu. Ondaka yo Gregu yapitiyua “ekulusu” ihangununa “evai” ine “emphundi,” ine “omuti.” Ombimbiliya itiwa The Companion Bible yati: “Movihonekwa vio Gregu o [Testamendu Omphe] mutupu onondaka mbupopia konthele yomiti vivali vielipingahana.” Jesus waipaelwa momuti.

3.  Jeova kahande tuundapese ovilolo ine ovilekeso mefendelo lietu.—Êxodo 20:4, 5; 1 Coríntios 10:14.

▸ Kap. 5, pal. 12

Jesus wapopila ovalongwa vae opo vahinangaile ononkhia mbae. Vetyilinga omanima aeho monthiki 14 yohanyi ya Nisan, onthiki ova Isilayeli ankho vahinangela Opasikwa. Ombolo novinyu vilekesa olutu nohonde ya Jesus vikuata pomaoko ovanthu aveho vekahi Pehinangelo. Vana vena ekevelelo liokukala nomuenyo wahapu pano pohi venda Pehinangelo mahi kavali kombolo nokunwa kovinyu.

▸ Kap. 5, pal. 21

Mombimbiliya Tradução do novo Mundo Moputu ondaka “ohande,” ipopia (1) omunthu, (2) otyinyama, (3) omuenyo womunthu ine omuenyo wotyinyama. Pombuelo pena onongeleka mbumwe:

• Omunthu. “Ovanthu vehehi, onohande etyinana, avahupiswa komeva.” (1 Pedro 3:20) Mo testu ei ondaka “ohande” ipopia ovanthu—Noe nomukai wae, novana vae’ vetatu novakai vavo.

• Otyinyama. “Huku apopi okuti: ‘Momeva muyule onohande mbuna omuenyo, oviila vinthanane meulu, pokati keulu noohi.’ Konyima Huku apopi okuti: ‘Kombanda yoohi kuye onohande mbuna omuenyo momihoko viavio, ovinyama viomeumbo, no viomofika, novinyama ovikuavo  nomonokhalelo vielikalela viavio.’ Iya atyiende umwe ngotyo.”​—Gênesis 1:20, 24.

• Omuenyo womunthu ine omuenyo wotyinyama. Jeova wapopila Moisesi okuti: “Ovalume aveho vahanda okukuipaa [vaovola ohande yove] vankhia.” (Êxodo 4:19) Etyi Jesus ekahi pano pohi, wapopia okuti: “Ame ndyimunthita omuwa. Omunthita omuwa wava omuenyo wae [ohande yae] pala okuyovola onongi mbae.”—João 10:11.

  Ngotyo, tyina omunthu umwe alinga otyipuka tyimwe “nohande yae aiho” otyo tyilekesa okuti wafuapo pala okuundapesa ounongo wae. (Mateus 22:37; Deuteronômio 6:5) Ondaka “ohande” ipondola okuundapeswa pala okupopia omahando ovipuka vina omuenyo. Omunthu wankhia ine otyivimbi tyipondola okupopiwa okuti ohande yankhia.​—Números 6:6; Provérbios 23:2; Isaías 56:11; Ageu 2:13.

▸ Kap. 6, pal. 5; Kap. 15, pal. 17

Ondaka yo Hebreu nondaka yo Gregu yapitiyua “ospilitu” Mombimbiliya Tradução do novo Mundo ipondola okuhangununa ovipuka vielikalela. Apeho mbuhangununa otyipuka tyahamonwa novanthu, ngetyi omphepo ine omufimo wovanthu novinyama. Ondaka oyo ipondola okupopia ospilitu yo munthu, nospilitu Sandu ononkhono mba Huku. Ombimbiliya kailongesa okuti tyina omunthu amankhi mutunda otyipuka tyimwe tyikakala nomuenyo komphangu onkhuavo.—Êxodo 35:21; Salmo 104:29; Mateus 12:43; Lucas 11:13.

▸ Kap. 6, pal.  5; Kap. 15, pal. 17

Geena enyina lietoto ankho likala popepi no Jerusalei ankho muyumbwa nokuyokelwa ovipuka viasila. Petupu  natyike tyilekesa okuti kononthiki mba Jesus, ovinyama ine ovanthu ankho vapakwa nomuenyo metoto opo vamoneswe ononkhumbi nokuyokwa. Ngotyo o Geena hatyilekeso tyomphangu yahamonwa, oku ovanthu vokuankhia mavakamoneswa ononkhumbi ine okuyokwa pala apeho. Etyi Jesus apopia konthele ya vana mavaende mo Geena, ankho ukahi nokupopia ehanyauno liapeho.​—Mateus 5:22; 10:28.

▸ Kap. 7, pal. 20

Elikuambelo eli Jesus alinga etyi alongesa ovalongwa vae oñgeni tyilikuambelwa. Tupu liihanwa okuti elikuambelo lia Tate Yetu. Mongeleka, Jesus wetulongesa tulikuambele okuti:

• “Enyina liove lisukukiswe”

  Onthue tulikuambela ku Jeova opo enyina liae lisukukiswe komatutu aeho. Opo ovanthu aveho vekahi keulu na vana vekahi pano pohi vahivilike nokukala nonthilo nenyina lia Huku.

• “Ouhamba wove uye”

  Onthue tulikuambela opo outumini wa Huku uhanyeko ouye wovivi wa Satanasi, opo utumine ohi, nokuipilulula ikale omphangu yombembwa.

• “Ehando liove lilingwe pano pohi”

  Onthue tulikuambela opo ehando lia Huku liokuyulisa ohi novanthu vetavela nokuhena onkhali, vakale nomuenyo uhapu momphangu yombembwa, ngetyi Jeova ahandele etyi atunga ovanthu.

▸ Kap. 8, pal. 2

Jeova wava otyilikutila tyeyovo opo ayovole ovanthu konkhali nokononkhia. Otyilikutila tyeyovo tyalingwa opo apingiyepo omuenyo una ankho wokuhena onkhali etyi omulume wotete, Andau aombesa, noupanga wovanthu na Jeova wanyonwa. Huku atumu Jesus pano pohi, opo ankhie mokonda yononkhali mbetu. Mokonda Jesus wankhia, ovanthu aveho vena omphitilo yokukala no muenyo uhapu.

▸ Kap. 8, pal. 21; Kap. 9, pal. 13

Eulo lia Daniele mo kapitulu 4 litulongesa okuti ouhamba wa Huku wavialekua mo 1914.

Eulo: Jeova waavelele ondyoi yeulo Ohamba Nambukondonosole yomuti omunene watyokuapo. Mondyoi oyo, ehingi lio muti oo liakutua notyivela momuvo wono “simanu epandu-vali” opo lihekule. Konyima yotyo, omuti auhimbika okukula vali.​—Daniel 4:1, 10-16.

Etyi eulo lihangununa kuonthue: Omuti ulekesa efendelo lia Huku. Mokueenda kuomanima omanyingi, Jeova waundapesa ovanthu ine onohamba, mo Jerusalei opo vatumine elongo lio Isilayeli. (1 Crônicas 29:23) Mahi ono hamba ombo kambatuaileko nekolelo mu Jeova iya avahatualako nokutumina. O Jerusalei yahanyuako menima 607 P.K.E. iya “omivo epandu-vali” avihimbika. (2 Reis 25:1, 8-10; Ezequiel 21:25-27) Etyi Jesus apopia okuti: “O Jelusalei maikaliatwa novanthu vovilongo, alo ononthiki mbalulikwa mbovilongo mbufuisuapo,” ankho ukahi nokupopia konthele “yomivo epandu-vali.” (Lucas 21:24) Ngoyo “omivo epandu-vali” kaviapuile etyi Jesus ekahi pano pohi. Jeova walaa okuvialeka Ohamba konthyulilo “yomivo epandu-vali.” Efendelo liotyotyili Liohamba omphe, Jesus, makaeta ononkhano onongwa pala ovanthu aveho va Huku vekahi kombanda yohi pala apeho.​—Lucas 1:30-33.

Okufuisuapo kuomivo “epandu-vali”: Omivo epandu-vali viakala omanima 2.520. Inkha tuvalula okuhimbika menima 607 P.K.E, alo mo 1914 tyituuka omanima 2.520. Menima olio lio 1914 otyo Jeova avialeka Jesus, Mesiya, Ohamba Youhamba wa Huku keulu.

 Opi kuatuka ombalulo yo 2.520? Ombimbiliya ipopia okuti omanima etatu notyihupe atuuka ononthiki 1.260. (Revelação 12:6, 14) Ngotyo “omivo epandu-vali” okuvalula tuvali ombalulo 1.260 tyituuka ononthiki 2.520. Ononthiki 2.520 otyilekeso tyomanima 2.520, mokonda eulo lipopia okuti ‘onthiki ike ilekesa enima.’​—Números 14:34; Ezequiel 4:6.

▸ Kap. 8, pal. 23

Ondaka “arkandyu” ihangununa okuti “onkhalamutwe yonoandyu.” Mombimbiliya ondaka arkandyu ipopia vala oandyu ike, iya enyina liae o Mingeli.—Daniel 12:1; Judas 9.

Mingeli Onkhalamutwe yembamba liovita lio noandyu mbekolelo mba Huku. Omukanda wa Revelação 12:7 wati: “Mingeli no noandyu mbae avalwisa enyoka . . . , no noandyu mbalio.” Omukanda wa Revelação upopia okuti Onkhalamutwe yembamba liovita via Huku o Jesus, ngotyo Mingeli enyina ekuavo lia Jesus.​—Revelação 19:14-16.

▸ Kap. 9, pal. 4

Onondaka ombo mbupopia omuvo makumoneka omanyingilikilo pano pohi tyina Ouhamba wa Huku uheneye okuhanyako ouye wa Satanasi. Onondaka mbelifua no mbokuati “onthyulilo youye” no mbokuati “okuya Kuomona womulume” mbapopiwa momaulo Ombimbiliya pala okupopia omuvo wike. (Mateus 24:3, 27, 37) “Ononthiki mbonthyulilo” mbahimbika etyi Ouhamba wa Huku wahimbika okutumina keulu mo 1914 iya mambupu tyina ouye wa Satanasi wamahayuako mo Armagedon.—2 Timóteo 3:1; 2 Pedro 3:3.

▸ Kap. 9, pal. 5

Tyina Huku atutilisa omunthu wokuankhia emukondolela vali omuenyo tyitiwa etutilo. Ombimbiliya ipopia ovanthu etyive vatutilisilwe. Elia, na Eliseu, na Jesus, na Petulu, na Paulu aveho vatutilisile ovanthu. Omahuviso oo alingwa vala kepondolo lia Huku. Jeova walaa okututilisa “ovaviuki na vana vehevaviuki” pala okukala pano pohi (Atos 24:15) Ombimbiliya tupu ipopia etutilo lio vokuenda keulu. Ovo vana vaholovonwa ine valembulwa na Huku vatutiliswa opo vakakale nomuenyo keulu na Jesus.​—João 5:28, 29; 11:25; Filipenses 3:11; Revelação 20:5, 6.

▸ Kap. 9, pal. 13

Oumbanda ine owanga otyituwa tyimwe otyivi okuovola okupopia novanthu vokuankhia, tyilinge onthue muene ine okuovola ovimbanda ine ovitapi. Ovanthu valinga ovipuka ovio mokonda vetavela komalongeso omatutu okuti ohande yomunthu ikala nomuenyo tyina amankhi iya ipondola okulinga omapita ovanthu. Ovilulu tupu vihongiliya ovanthu okuhetavela ku Huku. Okutala ko nonthungululu, nokutapesa, nokuloa, nokupaka menthia, novikuavo vali vielikuata kumwe novilulu. Momikanda ominyingi, mo nosinema, no moviimbo nomo vipuka ovikuavo vielikuata novilulu. Oviso ovinyingi vilingwa pokupaka omunthu, okulingila otyilikutila otyivimbi, nokuhinangela onthiki omunthu ankhia, nokulula, noviso ovikuavo, tupu navio vielikuata kumwe noumbanda. Ovanthu ovanyingi vavala ominyela-yela no nohiva opo vaundapese epondolo liovilulu.​—Gálatas 5:20; Revelação 21:8.

▸ Kap. 10, pal. 10; Kap. 16, pal. 4

Jeova o Huku wepondolo aliho, iya watunga ohi aiho. (Revelação [Apocalipse] 15:3) Otyo Jeova akalela hekulu yovipuka aviho iya una epondolo liokutumina ovipuka aviho vina omuenyo. (Salmo 24:1; Isaías 40:21-23; Revelação [Apocalipse] 4:11) Walinga ovitumino pala ovipuka aviho atunga. Jeova tupu una epondolo liokuavela outumini ovanthu. Onthue tupondola okukuatesako outumini wavilapo wa Huku tyina tukala nohole nae nokumutavela.​—1 Crônicas 29:11.

▸ Kap. 11, pal. 10

Okupolapo eimo okuipaa tyawina olukembe. Eimo olio kaliatundilepo alike mahi omunthu welipolapo. Tyina omunthu omulemi, omona kalingi onthele yaina. Mahi omona omunthu omukuavo.

▸ Kap. 13, pal. 5

Onondotolo mbuhakula nohonde ine ononthele ononkhuana mbohonde mbupolwa mo munthu ambupakwa molutu lwo munthu omukuavo ine okuhakulwa nohonde yapakwa nawa. Ononthele ononkhuana mbohonde onondotolo mbuundapesa ombombu, Plasma, Globulos brancos, Globulos vermelhos nono Plaquetas.

▸ Kap. 13, pal. 13

Mombimbiliya ondaka “okulonga” kaihangununa okumonesa ononkhumbi. Tyina tulongwa tukahi nokulongeswa nokuviyulwa nokulondolwa. Jeova nalumwe alonga noonya. (Provérbios 4:1, 2) Jeova waavela ongeleka ongwa pala ovohe. Jeova ulonga monkhalelo ikahi nawa, konyima omunthu upanda onkhalelo alongwa. (Provérbios 12:1) Jeova uhole ovanthu, iya uvelongesa. Uvelongesa opo vaviukise omalusoke apenga, iya otyo tyivekuatesako okusoka nokulinga etyi tyi mu hambukiswa. Ovohe, okulongesa ovana tyakutikinya okuvekuatesako okunoñgonoka omokonda yatyi vena okutavela. Otyo tyihangununa okuvelongesa okukala nohole na Jeova, ngetyi apanda Ondaka yae Ombimbiliya, nokunoñgonoka ovitumino viayo.

▸ Kap. 14, pal. 13

Ovilulu kavimonwa novanthu vina epondolo liavilapo tyipona kovanthu. Ovilulu onoandyu onondingavivi. Mbakala onondingavivi puetyi mbatyitukilapo Huku a mbehetavela kwe. (Gênesis 6:2; Judas 6) Vieliwaneka moumphuki wa satanasi okutyitukilapo Jeova.​—Deuteronômio 32:17; Lucas 8:30; Atos 16:16; Tiago 2:19.

▸ Kap. 16, pal. 4