1. Omukanda patyi upondola okutulongesa konthele yetyi matyiya komutwe?

OKUTI uhole okutala ovipuka vipopiwa mo televisau, iya olipulu okuti: ‘Ouye ou maukahulila-pi?’ Kuna oviponga ovinyingi novivi vituala ovanthu kokusoka okuti onthyulilo youye uno ikahi popepi. Okuti otyo otyili? Okuti kuna onkhalelo imwe yokunoñgonoka etyi matyikamoneka komutwe? Enga kuna. Namphila ovanthu vehetyii etyi matyikamoneka komutwe, mahi Jeova Huku utyii. Utupopila Mombimbiliya etyi matyikamoneka komutwe pala ovanthu nohi.—Isaías 46:10; Tiago 4:14.

2, 3. Oityi ovalongwa va Jesus ankho vahanda okunoñgonoka iya oñgeni Jesus evekumbulula?

² Tyina tutanga Mombimbiliya konthele yonthyulilo youye, katyihangununa okuti ohi oyo maipuko, mahi ovivi ovio mavipuko. Jesus walongesa ovanthu okuti Ouhamba wa Huku mautumina Ohi. (Lucas 4:43) Ovalongwa vae ankho vahanda okunoñgonoka onalupi Ouhamba wa Huku mauya, avapulu Jesus okuti: “Onalupi ovipuka ovio mavikamoneka? Olipi enyingilikilo malilekesa okuti ove weyale, no lionthyulilo youye?” (Mateus 24:3) Jesus kapopile onthiki matyikamoneka, mahi wapopile ovipuka mavitetekela okumoneka konthyulilo youye. Ovipuka Jesus apopia okuti maviya, vikahi nokumoneka hono!

³ Mokapitulu aka matulilongesa ovipuka vilekesa okuti tukahi kononthiki mbuhungi konthyulilo youye. Tete, tuesukisa okulilongesa konthele yovita viaenda keulu ngotyo matunoñgonoka omokonda yatyi pano pohi pekahi nokumoneka ovipuka ovivi.

4, 5. (a) Oityi tyaenda keulu etyi Jesus akala Ohamba? (b) Ngetyi tyapopia Revelação 12:12, oityi tyehimbika okumoneka etyi Satanasi atahelwa pano pohi?

⁴ Mokapitulu 8 tuelilongesa okuti Jesus wakala Ohamba keulu menima lio 1914. (Daniel 7:13, 14) Omukanda wa Revelação utupopila etyi tyaendapo: “Kuakatuka ovilwa ovinene keulu: Mingeli [tyihangununa, Jesus] no noandyu mbae avalwisa enyoka [Satanasi], iya enyoka no noandyu mbalio onombi, navo otyo valwa.” * Satanasi novilulu viae avatatua keulu iya avatahelwa pano pohi. Soka kehambu onoandyu mbakala nalio! Iya oñgeni ovanthu pano pohi vakala? Ombimbiliya ipopia okuti otyo tyaetela ovitateka ovanthu. Omokonda yatyi? Eliapu lianumana unene mokonda “lityii okuti okamuvo kalio kakehi.”—Revelação (Apocalipse) 12:7, 9, 12.

⁵ Eliapu liaeta ovitateka ovinyingi pano pohi. Lianumana mokonda lityii okuti “okamuvo kalio kakehi,” opo Huku elihanyeko. Matulilongesa ovipuka Jesus apopile okuti mavikamoneka konthyulilo yononthiki.—tala okatoi 24 konthyulilo yomukanda ou.

6, 7. Oityi tupondola okupopia konthele yovilwa nondyala ikahiko hono?

⁶ Ovilwa. Jesus wati: “Otyilongo matyikaluisa otyilongo otyikuavo iya ouhamba maukaluisa ouhamba omukuavo.” (Mateus 24:7) Momanima okualamba ovanthu ovanyingi vankhia movita mo nonthiki mbetu tyipona kohale. Omukanda umwe (Worldwatch Institute) wapopia okuti tunde mo1914, ovanthu valamba po nomiliau  100 vankhila movita. Ovanthu vaipawa novita vialingwa mokueenda kuomanima 100, okuhimbikila mo 1900 alo mo 2000, ovanyingi unene tyipona ovanthu vaipawa movilwa vialingwa momanima atetekela ko 1900. Soka ko nonkhumbi nomuihamo ovanthu vaetelwa novilwa.

⁷ Ondyala. Jesus wati: “Makukakala ondyala.” (Mateus 24:7) Namphila kukahi nokulimwa ovilia ovinyingi tyipona kohale, mahi ovanthu ovanyingi vetupu etyi valia. Omokonda yatyi? Omokonda ovanthu ovanyingi vetupu onombongo pala okulanda okulia, nokulanda omapia. Ovanthu ovanyingi kavamono onombongo mbutuuka okulanda okulia kuonthiki, ovakuavo nombongo yatyo kaveimono. Eongano Liekongoko Ouye Auho, liati ovana ovanyingi vekahi nokunkhia ononthiki ambuho, mokonda vetupu etyi valia opo vakale nekongoko.

8, 9. Oityi tyilekesa okuti omaulo a Jesus konthele yovinimawe, nomauvela ekahi nokufuisuapo?

⁸ Ovinimawe. Jesus waula okuti: “Makukakala ovinimawe ovinene.” (Lucas 21:11) Omanima  aeho tukevela ovinimawe ovinene. Tunde mo 1900 ovanthu ovanyingi vankhia mokonda yovinimawe. Namphila ounongo wovanthu ukuatesako okuimbuka ankho makueende otyinimawe tyipona kohale, mahi nkhele ovanthu ovanyingi vekahi nokunkhia.

⁹ Omauvela. Jesus waulile okuti makukakala “omauvela.” Omauvela omakalavi ekahi nokumoneka no kuipaa ovanthu. (Lucas 21:11) Namphila onondotolo valongeswa oñgeni tyihakulwa omauvela omanyingi, mahi nkhele kuna omauvela ehevilwa okuhakulwa. Omukanda umwe wati kese nima ovanthu vaipawa nomukolo omunene no malalia no kolela. Tupu, onondotolo mbaimbuka okuti kukahi nokuya omauvela 30 omape, iya omanyingi kaevilwa okuhakulwa.

10. Oñgeni 2 Timóteo 3:1-5, ikahi no kufwisapo hono?

¹⁰ Mu 2 Timóteo 3:1-5, Ombimbiliya yati: “Kononthiki mbahulililako, makukeya omuvo  wepuiya.” Apostolu Paulu wapopia oñgeni ovanthu mavakakala mokueenda kuonthyulilo youye. Wapopia okuti ovanthu mavakakala

• vokulihole ovo muene

• vokuhole onombongo

• ovana kamaveketavela kovohe

• mavakakala ononkhembi

• vehena oluembia nombunga yavo

• vehetyivili okulikondola omitima

• vehole ovilwa nokutañguna

• vokuhole vali ovitalukiso tyipona Huku

• vapopia okuti vehole Huku, mahi kavemutavela

11. Ngetyi tyipopia o Salmo 92:7 oityi matyikalingwa no nondingavivi?

¹¹ Okuti potyilongo ukala, pena ovanthu vena ovituwa ngovio? Movilongo aviho muna ovanthu vena ovituwa ovio. Mahi Huku apa katutu meya okulinga otyipuka tyimwe konthele yotyo. Walaa okuti: “Tyina onondingavivi mbuyova ngeholi, iya vokulinga  ovivi vatualako tyapama, mavakanyimuako apeho.”—Salmo 92:7.

12, 13. Oityi Jeova ekahi nokutulongesa mokueenda kuononthiki mbonthyulilo?

¹² Ombimbiliya yaula okuti kononthiki mbahulilila mouye mamukeyula ononkhumbi nomuihamo. Mahi, Ombimbiliya tupu ipopia ovipuka oviwa mavikamoneka.

¹³ Okunoñgonoka Ombimbiliya. Omuuli Daniele wahoneka konthele yo nonkhiki mbonthyulilo. Wapopia okuti: “Enoñgonoko lio tyotyili malikeliyawisa.” (Daniel 12:4) Huku maavela ovanthu vae ounongo wokunoñgonoka Ombimbiliya monkhalelo yayandyuluka nawa tyipona kohale. Jeova ukahi nokulinga ngotyo haunene tunde mo 1914. Mongeleka, ukahi nokutulongesa esilivilo lienyina liae nehando liae pala ohi, notyili konthele yotyilikutila tyeyovo, nonkhalelo ya vana vokuankhia, netutilo. Tuelilongesa okuti Ouhamba wa Huku, oo vala mauya okumanako ovitateka vio vanthu. Tupu tuelilongesa oñgeni tupondola okukala nehambu no ñgeni tupondola okutyinda omuenyo uhambukiswa Huku. Mahi oityi tyikuatesako ovaumbili va Huku okulilongesa ovipuka ovio? Omaulo omakuavo maetukuatesako okuvasa ekumbululo.​—Tala outoi 21 no 25 konthyulilo yomukanda ou.

14. Alo pi onondaka onongwa Mbouhamba wa Huku mbukahi nokuiviswa hono? Iya ovalie vekahi nokuivisa onondaka ombo?

¹⁴ Ovilinga viokuivisa ouye auho. Jesus wapopia konthele yo nonthiki mbonthyulilo okuti: “Onondaka ombu onongwa Mbouhamba wa Huku mambukaiviswa kombanda yo ohi aiho.” (Mateus 24:3, 14) Onondaka onongwa mbouhamba wa Huku, mbukahi nokuiviswa movilongo  vilamba po 230, no momalaka alamba po 700. Mouye auho, Onombangi mba Jeova “vomihoko aviho nomalaka aeho” vekahi nokukuatesako ovanthu okunoñgonoka oityi Ouhamba iya oityi maukalingila ovanthu. (Revelação [Apocalipse] 7:9) Iya vetyilinga otyali. Namphila veyelwe nokumoneswa ononkhumbi novanthu ovanyingi, petupu etyi tyitalameka ovilinga viokuivisa, ngetyi Jesus aulile.​—Lucas 21:17.

15. (a) Ove utavela okuti tukahi kononthiki mbahulililako iya omokonda yatyi? (b) Oityi matyikalingwa na vana vetavela ku Jeova na vana vahahande okumutavela?

¹⁵ Ove utavela okuti tukahi kononthiki mbahulililako? Omaulo Ombimbiliya apopia konthele yononthiki mbahulilila ekahi nokufuiswapo. Apa katutu Jeova makatuma okutalameka ovilinga viokuivisa, iya “onthyulilo” aiya. (Mateus 24:14) Onthyulilo oityi? O Armagedon, tyina Huku meya okuhanyako ovivi aviho. Jeova makatuma Jesus no noandyu mbae mbepondolo opo vahanyeko ovanthu aveho vehetavela Kwe no ko Mona wae. (2 Tessalonicenses 1:6-9) Konyima Satanasi no noandyu mbae kavakayondya vali ovanthu. Iya ovanthu vetavela ku Huku nokutavela Ouhamba wae mavakatala tyina omilao via Huku vifwisuapo.—Revelação [Apocalipse] 20:1-3; 21:3-5.

16. Putyina onthyulilo ifuenako, oityi wesukisa okulinga?

¹⁶ Ouye uno utuminwa na Satanasi apa katutu maupu. Ngotyo otyiwa tulipule okuti: ‘Oityi nesukisa okulinga?’ Jeova uhanda ulinge ononkhono ononene mbokulilongesa Ombimbiliya. Wesukisa okutyilinga nombili. (João 17:3) Onombangi mba Jeova valinga omaliongiyo ono simanu ambuho akuatesako ovanthu okunoñgonoka Ombimbiliya. Tualako okuenda apeho komaliongiyo oo. (Tanga Hebreus 10:24, 25.) Inkha wiimbuka okuti  wesukisa okulinga omapiluluko, tyilinga liwa-liwa. Tyina ulinga ngotyo, oupanga wove na Jeova maupame vali unene.—Tiago 4:8.

17. Omokonda yatyi ovanthu ovanyingi mavauhululwa tyina onthyulilo yameya?

¹⁷ Apostolu Paulu wahangununa okuti ehanyauno lio nondingavivi maliya putyina ovanthu ovanyingi vehetyikevelela, “ngo tyimphulu tyiya kounthiki.” (1 Tessalonicenses 5:2) Jesus waula okuti ovanthu ovanyingi mavatombo omanyingilikilo alekesa okuti tukahi ko nonthiki mbahulilila. Jesus wati: “Ngetyi ankho tyali kononthiki mba Noe, otyo matyikakala pokuya kuo Mona womulume [ine ko nonthiki mbahulililako]. Mokonda kononthiki mbatyo ombo, etyi Ombila Onene nkhele iheneye, ovanthu ankho vasuka vala nokulia, nokunwa, nokunepa, no kunepwa, alo onthiki Noe anyingila mowato. Ankho kavesukile, alo Ombila Onene yeya aivekomboko aveho. Ongotyo matyikakala pokuya kuo Mona womulume.”—Mateus 24:37-39.

18. Elondolo patyi Jesus etuavela?

¹⁸ Jesus walondola okuti katupondola okutalukwa “nehando liokulia unene, nokunwa unene, no kusukalala novipuka viomuenyo.” Wapopia okuti onthyulilo maiuhulula “ngeliva.” Tupu wapopia okuti “maiya kovanthu vatyo aveho vekahi kombanda yohi aiho.” Ayawisako okuti: “Tualeiko okukala tyalunguka. Itei unene apeho, opo muhupe kovipuka ovio aviho mavikeya, amukala lutai kolupala lwo Mona womulume.” (Lucas 21:34-36) Omokonda yatyi tyakolela unene okutavela elondolo olio lia Jesus? Omokonda kuakamba vala katutu opo ouye wa Satanasi uhanyueko. Vana vetavela ku Jeova no ku Jesus ovo vala mavakahupa konthyulilo iya avakakala nomuenyo uhapu mouye omupe.​—João 3:16; 2 Pedro 3:13.