1, 2. Opi tupondola okuvasa etililo liapama hono?

SOKA ñgeno uli mohika, iya pahe kukahi nokuya epuku-puku limwe enene. Eulu alinthikovela, akumoneka omiliakulo nomitetanena. Pahe akuhimbika okuloka ombila imwe onene. Ohimbika okuovola apa moholama. Mohambukwa unene tyina wamavasi omphangu yapama nawa, yahaloko, nokuakukuta nawa!

² Hono tukahi movitateka ngovio. Ovivi mouye vikahi nokuvilapo. Upondola okulipula okuti: ‘Opi mandyivasi ekuateso?’ Omuhoneki wono Salmu wapopia okuti: “Mandyipopila Jeova okuti: ‘Ove tyiholamo tyange, tupu umuameni wange. Ove Huku yange, una ndyiyumba onthumbi.’” (Salmo 91:2) Enga, Jeova upondola okutepulula ovitateka vietu hono iya komutwe wandyila meketuavela ekevelelo limwe ewa.

3. Oñgeni tupondola okuholama mu Jeova?

³ Oñgeni Jeova etuamena hono? Upondola okutukuatesako okulwa novitateka tuna iya Jeova una vali epondolo enene tyipona kese munthu, ine kese tyimwe tyihanda okutulinga omapita. Namphila ovipuka ovivi vipondola okutumonekela, tupondola okukala nonthumbi yokuti Jeova mamaneko ovitateka ovio komutwe wandyila. Ombimbiliya itulunda okuti: “Tualeiko okuendela mohole ya Huku.” (Judas 21) Tuesukisa okufuena ku Jeova opo etukuatesako momivo vio vitateka. Mahi oñgeni matutyilingi?

4, 5. Oñgeni Jeova alekesa okuti utuhole?

⁴ Opo tutualeko okufuena ku Jeova, tuesukisa okuimbuka okuti Jeova utuhole unene. Nokupandula ovipuka aviho Jeova ekahi nokutulingila. Wetuavela ohi ikahi nawa muna omiti novinyama vielikalela. Tupu wetuavela okulia kupepa opo tulie, nomaande asukuka opo tunwe. No Mbimbiliya, Jeova utulongesa enyina liae novituwa viae oviwa. Haunene, walekesa oluembia ena nonthue etyi atuma Omona wae ehole unene, Jesus, eye pano pohi, opo etuavele omuenyo. (João 3:16) Mokonda yotyilikutila otyo, onthue tuna ekevelelo liomuenyo omuwa komutwe.

⁵ Jeova wavialeka outumini wo keulu, Ouhamba wa Mesiya maumaneko ovitateka aviho. Ouhamba oo, maukapilulula ohi ino aikala omphangu yombembwa, omu ovanthu aveho mavakala nombembwa nehambu liahapu. (Salmo 37:29) Onkhalelo onkhuavo Jeova alekesa okuti utuhole oputyina etulongesa opo tukala nomuenyo ukahi nawa pehepano. Tupu utuita tulikuambele kwe iya apeho utehelela omalikuambelo etu. Jeova ulekesa nokuayandyuluka nawa okuti uhole ovanthu aveho.

6. Oñgeni tupondola okupandula oluembia lwa Jeova?

⁶ Oñgeni molekesa okuti upandula oluembia lwa Jeova? Mulekesa okuti upandula ovipuka aviho ekahi nokukulingila. Katyihambukisa okutala okuti ovanthu ovanyingi hono kavapandula. Otyo tyamonekele etyi Jesus ekahi pano pohi. Monthiki imwe, Jesus wahakulile ovalume ekwi ankho vena otyilundu, mahi wike vala wakapandulile. (Lucas 17:12-17) Onthue tuhanda okulinga ngomulume wakapandulile Jesus. Onthue apeho tuhanda okupandula Jeova.

7. Oñgeni tupondola okulekesa okuti tuhole Jeova?

⁷ Tupu nonthue tuesukisa okulekesa okuti tuhole Jeova.  Jesus wapopila ovalongwa vae okuti, vena okukala nohole na Jeova nomutima wavo auho, nomuenyo wavo auho nonondunge mbavo ambuho. (Tanga Mateus 22:37.) Oityi otyo tyihangununa?

8, 9. Oñgeni matulekesa ku Jeova okuti tumuhole?

⁸ Okuti tyituuka okupopia okuti tuhole Jeova? Au. Inkha tuhole Jeova nomutima wetu auho, nomuenyo wetu auho, no nonkhono mbetu ambuho, matutyilekesa movipuka tulinga. (Mateus 7:16-20) Ombimbiliya ilongesa nokuayandyuluka okuti inkha tuhole Huku, matutavela ovitumino viae. Okuti otyo tyalema? Au, mokonda “ovitumino via Jeova kavialemene.”—Tanga 1 João 5:3.

⁹ Tyina tutavela ku Jeova, tukala nehambu nomuenyo ukahi nawa. (Isaías 48:17, 18) Mahi oityi matyitukuatesako okufuena ku Jeova? Tutalei.

10. Omokonda yatyi ove wesukisila okutualako okulilongesa konthele ya Jeova?

¹⁰ Oñgeni wakala epanga lia Jeova? Tunde etyi wahimbika okulilongesa ombimbiliya, wanoñgonoka Jeova iya ukahi nokupameka oupanga wove nae. Oupanga oo ukahi ngotupia tuesukisa okutualako okupakwa ononkhuii. Ngetyi otupia tuesukisa ononkhuii, nove wesukisa okutualako okulilongesa konthele ya Jeova opo oupanga wove utualeko tyapama.—Provérbios 2:1-5.

11. Oñgeni omalongeso Ombimbiliya ekukalesa?

¹¹ Tyina ove utualako okulilongesa Ombimbiliya, molilongesa ovipuka mavihiki komutima wove. Tala etyi ovalongwa vakala etyi Jesus ankho ekahi nokuvehangununina omaulo Ombimbiliya. Vapopia okuti: “Ankho katuahambukilwe unene etyi apopia nonthue metapalo, okutuhangununina nawa Ovihonekwa?”—Lucas 24:32.

12, 13. (a) Oñgeni ohole yetu na Huku ipondola okukala? (b) Oñgeni tupondola okutualako okukala nohole na Jeova?

 ¹² Ngo valongwa va Jesus vehikilwe komitima viavo etyi vanoñgonoka Ovihonekwa, nove mopopi noundyandyi tyina uhimbika okunoñgonoka Ombimbiliya. Otyo matyikukuatesako okunoñgonoka Jeova nokukala nohole nae. Ove kuhande ohole oyo itende.—Mateus 24:12.

¹³ Tyina wamakala epanga lia Huku, wesukisa okulinga ononkhono opo utualeko okupameka oupanga wove. Wesukisa okutualako okulilongesa konthele ya Jeova na Jesus nokusoka konthele yetyi ukahi nokulilongesa no ñgeni upondola okuendelamo. (João 17:3) Tyina utanga ine ulilongesa Ombimbiliya, lipula okuti: ‘Oityi tyindongesa konthele ya Jeova Huku? Omokonda yatyi ndyina yokukala nohole na Jeova nomutima wange auho, nomuenyo wange auho?’—1 Timóteo 4:15.

14. Oñgeni elikuambelo litukuatesako okupameka ohole tuna na Jeova?

 ¹⁴ Tyina una epanga, mutomphola apeho iya otyo tyipameka oupanga wenyi. Tyelifwa notyo, tyina tutomphola apeho na Jeova melikuambelo, otyo matyipameka ohole una nae. (Tanga 1 Tessalonicenses 5:17.) Elikuambelo otyiawa tuapewa na Tate yetu keulu. Tuna okulinga omalikuambelo atunda komutima. (Salmo 62:8) Katupondola okukoneka ine okupaka momutwe omalikuambelo opo ha tuewane-wane, mahi tuna okupopia onondaka mbukahi nawa. Tyotyili, inkha tutualako okulilongesa Ombimbiliya nokulikuambela nomutima auho, matupameka ohole yetu tuna na Jeova.

15, 16. Oñgeni utala otyilinga tyokuivisa?

¹⁵ Inkha uhanda okutualako okufuena ku Jeova, tupu wesukisa okupopila vakuenyi konthele yekolelo liove. Okupopila vakuetu konthele ya Jeova elao limwe enene. (Lucas 1:74) Otyilinga otyo Jesus wetyiavela Ovakristau aveho. Atuho tuna okuivisa onondaka onongwa Mbouhamba wa Huku. Okuti wafuapo opo ulinge otyilinga otyo?—Mateus 24:14; 28: 19, 20.

¹⁶ Apostolu Paulu waimbukile okuti ovilinga viokuivisa viakolela unene, eviihana okuti “olumono.” (2 Coríntios 4:7) Okupopila vakuetu konthele ya Jeova nehando liae, otyilinga tyevilapo ove upondola okulinga. Oyo onkhalelo imwe ove uumbila Jeova iya Jeova upanda etyi ukahi nokumulingila. (Hebreus 6:10) Okuivisa tyikuatesako ove na vana vekutehelela, mokonda ove ukuatesako vakuenyi nove muene okufuena ku Jeova, iya otyo tyituala komuenyo uhapu. (Tanga 1 Coríntios 15:58.) Okuti kuna vali otyilinga otyikuavo tyikuetela ehambu?

17. Omokonda yatyi otyilinga tyokuivisa tyalumbanesa?

 ¹⁷ Otyilinga tyokuivisa tyalumbanesa unene. Onthue tuna “okuivisa ondaka” iya tuna okutyilinga “tyehena elundo.” (2 Timóteo 4:2) Ovanthu vesukisa okutehelela Ouhamba wa Huku. Ombimbiliya ipopia okuti: “Onthiki onene ya Jeova ikahi popepi! Ikahi popepi, ikahi nokuhikapo liwa-liwa!” Onthyulilo “kamaisete!” (Sofonias 1:14; Habacuque 2:3) Enga, apa katutu, Jeova mahanyaunako ouye wovivi wa Satanasi. Tyina onthiki oyo yeheneyepo, ovanthu vesukisa okulondolwa opo vaholovone okuumbila Jeova.

18. Omokonda yati tuna yokufenda kumwe no Vakristau votyotyili?

¹⁸ Jeova uhanda tumufende kumue no Vakristau votyotyili. Ombimbiliya yati: “Tutalei nawa oñgeni matulipameka pokati, nokukala nohole novilinga oviwa. Tuhayekeipo okuenda komaliongiyo, ngetyi vamwe vetyiliya okulinga. Anthi, tuliavelei ondundo, haunene tyina mutala okuti onthiki ikahi popepi.” (Hebreus 10:24, 25) Tulinga atyiho tuvila opo tuhakambe komaliongiyo. Omaliongiyo etuavela omphitilo yokulipameka nokuliavela ondundo na vakuetu.

19. Oityi matyikukuatesako okuhumba ovakuatate vove no nomphange?

¹⁹ Tyina wenda komaliongiyo, movasiko omapanga omawa maekukuatesako okufenda Jeova. Movasiko ovakuatate no nomphange velikalela, kumwe nove vahanda okulinga atyiho vevila opo vafende Jeova. Iya tupu ovakuankhali nokulinga oviponyo ngove. Tyina vamalingi oviponyo, kala tyafuapo pala okuveevela. (Tanga Colossenses 3:13.) Apeho tala kovituwa oviwa vio vakuatate vove no nomphange, okulinga ngotyo matyikukuatesako okuhumba Jeova otyivili okufuena vali kwe.

20, 21. “Omuenyo wotyotyili” oityi?

²⁰ Jeova uhanda omapanga ae akale nomuenyo ukahi nawa. Ombimbiliya ikulongesa okuti omuenyo wetu komutwe wandyila maukelikalela unene nou tuna hono.

²¹ Komutwe wandyila, matukakala nomuenyo uhapu, kamatukalako vala omanima 70 ine 80. Matukakala “nomuenyo uhapu” nekongoko likahi nawa, nombembwa, nehambu momphangu yombembwa. Ombimbiliya iwihana okuti “omuenyo wotyotyili.” Jeova utulaa okutuavela omuenyo wotyotyili, mahi onthue tuesukisa okulinga atyiho tuvila pehepano opo “tukakatele” momuenyo oo.​—1 Timóteo 6:12, 19.

22. (a) Oñgeni upondola “okukakatela momuenyo wotyotyili”? (b) Omokonda yatyi tupondola okuhapewa omuenyo uhapu?

²² Oñgeni tupondola “okukakatela momuenyo wotyotyili”? Tuna “okulinga otyiawa,” nokukala “ovahona vovilinga oviwa.” (1 Timóteo 6:18) Otyo tyihangununa okuti tuesukisa okuendela muetyi tulilongesa Mombimbiliya. Mahi, omuenyo wotyotyili kautei kononkhono mbetu muene. Tupondola okuhapewa omuenyo uhapu. Omuenyo uhapu otyiwa Jeova avela ovaumbili vae vekolelo mokonda “yokankhenda tuhatokalele.” (Romanos 5:15) Tate yetu wokeulu tyili-tyili uhanda okuavela ovaumbili vae vekolelo otyiwa otyo.

23. Omokonda yatyi tyakolela ulinge etokolo liaviuka pehepano?

²³ Lipula okuti, ‘ndyifenda Huku monkhalelo yaviuka?’ Ankho wimbuka okuti wesukisa okulinga omapiluluko, tyilinga monkhalelo yaviuka. Tyina tulinga ononkhono opo tutavele ku Jeova atumuyumbu onthumbi, ngwe makala otyiholamo tyetu. Jeova makayovola ovanthu vae vekolelo mokueenda kuononthiki mbahulilila mbouye wovivi wa Satanasi. Konyima, Jeova makalinga atyiho opo  tukakale nomuenyo uhapu Momphangu Yombembwa, ngetyi alaa. Tyotyili, ove upondola okukala nomuenyo wotyotyili inkha ulinga etokolo liaviuka pehepano!