Jeova Huku Omutungi wetu. Watunga ovipuka aviho, evi tupondola okumona neevi tuhamono. Etyi ehenetunge ovipuka tupondola okumona, Huku watunga ovipuka ovinyingi, no noandyu ononyingi. Okuti ove utyii oñgeni onoandyu mbukahi? Onoandyu ovanthu Jeova atunga velifwa nae. Katupondola okumona onoandyu, ngetyi tuhapondola okumona Huku. Oandyu yotete Jeova atunga yakala omukuatesiko wae. Oandyu oyo yemukuatesako etyi Jeova atunga ononthungululu, nohi, novipuka ovikuavo. Ohi yatungwa opo ikale eumbo lietu.

Konyima Jeova alingi nawa ohi opo ovinyama novanthu vakale-mo. Watunga ekumbi opo limimikile ohi. Watunga onomphunda, nelunga, no nondongi.

Oityi alinga vali? Jeova wati: ‘Mandyilingi eholi, nomiti viima ovinyango vielikalaila no nonthemo mbelikalaila.’ Konyima Jeova alingi ovinyama ovinyingi, vimwe vinthanana, vimwe viyoa, ovikuavo vilikoka ovikuavo vienda. Vimwe ovitutu ngetyi ovindimba iya ovikuavo ovinene ngetyi onondyamba. Otyinyama patyi ove uhole vali?

Konyima Jeova apopila oandyu yotete okuti: “Tutunge omulume.” Ovanthu avelikalela novinyama. Ovanthu vapondola okulinga ovipuka ovinyingi. Vapondola okupopia, nokuyola, nokulikuambela. Ankho vena otyilinga tyokuyunga ohi novinyama. Okuti ove wii olie omulume wotete? Tutalei.