Ohamba onkhuavo yo Mbambilonia o Dariu. Dariu ankho utyii okuti Daniele wakolela unene. Aavela Daniele otyilinga tyakolela vali kovalume aveho vo Mombambilonia. Ovalume ovo avakala nonkhi na Daniele iya ankho vemuyele. Ankho vetyii okuti Daniele ulikuambela ku Jeova ovikando vitatu monthiki, avapopila Dariu okuti: ‘Hamba, paka otyitumino opo ovanthu aveho velikuambele vala kuove. Una uhetavela otyitumino otyo, una okuyumbwa meleva lio nonkhulika.’ Dariu etavela iya apake-ko otyitumino otyo.

Etyi Daniele eiva otyitumino otyo otyipe aende keumbo liae. Aikila konongolo elikuambela ku Jeova otyo ondyanena imumbululu. Vana vokumulinga onkhi avanyingila mondyuo yae avemuvasi ulikuambela. Avakahatekela ku Dariu avemupopila okuti: ‘Daniele ketavelele otyitumino tyove. Ulikuambela ku Huku yae ovikando vitatu monthiki.’ Dariu ankho uhole Daniele kahande ankhie. Akala onthiki aiho otyo asoka oñgeni apondola okuyovola Daniele. Mahi ankho utupu vali oñgeni apondola okupilulula otyitumino tyina mokonda ankho wetyitavela-le. Ankho una okutuma ovalume opo vapake Daniele meleva muna ononkhulika ononkhalavi.

 Motyinthiki otyo, Dariu ahalala mokonda ankho wasukalala unene na Daniele. Etyi kuatya, ahatekela keleva aihana Daniele okuti: ‘Okuti Huku yove wekuyovola?’

Dariu eivi ondaka. Ankho oya Daniele! Yapopila Dariu okuti: ‘Oandyu ya Jeova yaika omilungu vio nonkhulika. Ndyikahi nawa.’ Dariu ahambukwa unene! Atumu vapole Daniele meleva. Daniele ankho utupu apa anyawa. Ohamba aitumu okuti: ‘Ovalume vana aveho vatendeleya Daniele veyumbei meleva.’ Etyi vayumbwa metoto, ononkhulika ambuveli-po.

Dariu apopila ovanthu vae okuti: ‘Amuho muna vala okufenda Huku ya Daniele. Wayovola Daniele mo nonkhulika.’

Ove ulikuambela ononthiki ambuho ku Jeova, nga Daniele?