Motyinthiki tyimwe Ohamba Nambukondonosole walota ondyoi imwe yepuiya. Ondyoi oyo aimusukalalesa unene ahamono olumphoki. Aihana ovanongo evepopila okuti: ‘Hangununei ondyoi nalota.’ Avapopi okuti: ‘Tupopile ondyoi, Hamba.’ Mahi Nambukondonosole evepopila okuti: Au! Popiei etyi nalota ankho kamutyipopi mandyimuipaa.’ ‘Avemupopila okuti: ‘Tupopile ondyoi yove opo onthue tutyivile okuihangununa.’ Ohamba aiti: ‘Onwe mukahi nokunkhinkhilinya. Mphopilei ondyoi yange!’ Avapopila ohamba okuti: ‘Petupu nawike utyivila okulinga ngotyo. Waita otyipuka tyihevilwa.’

Nambukondonosole anumanene unene, atumu okuipaa ovanongo aveho motyilongo otyo. Povalume ovo ankho pena Daniele na Sadrake na Mesake na Abedeneku. Daniele aiti ko hamba opo imukevele. Konyima Daniele nomapanga ae avaiti ku Jeova opo evekuateseko. Oityi Jeova alinga?

Jeova alekesa Daniele etyi onondyoi mba Nambukondonosole mbuhangununa. Monthiki onkhuavo Daniele apopila ovaumbili vo hamba okuti: ‘Muhaipaei omulume nawike omunongo. Ame ndyipondola okuhangununa ondyoi yo hamba.’ Omuumbili wo hamba atuala Daniele ku Nambukondonosole. Daniele apopila ohamba okuti: ‘Huku ukahi nokukupopila etyi matyikamoneka nove komutwe wandyila. Ondyoi yove oyei: Ove wamona otyilolo tyina omutwe wo oolu, onthulo no makuoko o vio palata, eimo novitumbo o vio tyivela tyikuhukila, ovikalo no nomphai o vio vivela viahonya nonthata. Komphunda akutundu emanya limwe, alivete konomphai mbo tyilolo. Otyilolo atyikala ombuma. Emanya lina alityituka omphunda, aihiki eheke aliho.’

 Daniele apopi etyi tyihangununa ondyoi okuti: ‘Omutwe wo oolu wotyilolo uhangununa ouhamba wove. Opalata ihangununa ouhamba maukupingi. Moluotyo makukala ouhamba omukuavo ukahi ngo tyivela tyikuhukila mautumina ouye auho. Konyima makuya ouhamba omukuavo wapama ngo tyivela. Okuhulilila-ko, makuya ouhamba uhapamene ngonthata. Emanya malitundu komphunda, Ouhamba wa Huku. Ouhamba oo mauhanye-ko omauhamba aeho iya aukalako apeho.’

Etyi Nambukondonosole etyiiva aikila konongolo komutwe wa Daniele. Apopi okuti: ‘O Huku yove wekupopila onondyoi ombu. Kutupu nawike welifua na Huku yove.’ Nambukondonosole ahaipaa Daniele mahi wemulinga akale onkhalamutwe yovalume aveho ovanongo tupu akala omutumini wo Mbambilonia. Watala oñgeni Jeova akumbulula elikuambelo lia Daniele?