Jeova waholovona Jeremia opo akale omuuli wovanthu vo ko Judaa. Wapopila Jeremia akaivise ovanthu nokuvelondola okuti vesukisa okuyeka-po okulinga ovivi. Jeremia apopi okuti: ‘Mahi Jeova, nkhele ndyimona. Hityivili okupopia novanthu.’ Jeova emupopila okuti: ‘Uhatile owoma. Ame mandyikupopila etyi una okupopia. Ame mandyikukuatesako.’

Jeova apopila Jeremia akapopie novakulu vo mo Judaa, tupu akatyatyule ombiya otyo vatala, konyima evepopila okuti: ‘O Jelusalei maikala ngovikola evi.’ Etyi Jeremia apopia onondaka mba Jeova, ovakulu avanumana unene. Omunakwa umwe utiwa Pasur avete Jeremia iya emukutila momuti kovikalo no makuvoko. Jeremia alala-mo otyinthiki atyiho, ankho ketyivili okuliviya. Monthiki onkhuavo komuhuka Pasur emukutulula. Jeremia apopi okuti: ‘Himalingi vali otyilinga etyi. Himaivisa vali.’ Okuti tyili-tyili wetyiyeka-po? Au. Etyi Jeremia asoka vali nawa, apopi okuti: ‘Onondaka mba Jeova mbukahi ngotupia mokati kange. Ame hipondola okuyeka-po okuivisa.’ Jeremia atuala-ko okulondola ovanthu.

Etyi palambe omanima amwe, mo Judaa amukala ohamba omphe. Ovanakwa novauli vomatutu ankho veyele Jeremia. Avapopila ovana vohamba okuti: ‘Omulume ou una okuipawa.’ Jeremia apopi okuti: Inkha mundyipaa mamuipaa omunthu uhena etyi alinga. Ame napopia onondaka mba Jeova, hapopile onondaka mbange.’ Etyi ovana vohamba vetyiiva, avapopi okuti: ‘Omulume ou kapondola okuipawa.’

 Jeremia atualako okuivisa, ovana vohamba avanumana unene. Avaiti kohamba opo vaipae Jeremia. Ohamba aipopi okuti mupondola okulinga Jeremia etyi muhanda . Avakuate Jeremia avemupake monyombo yaya kohi, muna onthata onyingi. Jeremia ehimbika okunyingila monthata.

Konyima omulume umwe utiwa Ebede-Meleque apopila ohamba okuti: ‘Ovana vohamba vapaka Jeremia monyombo! Inkha kapolua-mo mankhi.’ Ohamba atumu Ebede-Meleque atyinde ovalume 30 opo vakapole Jeremia monyombo. Namphila tuhapondola okukala novitateka ngo via Jeremia, katupondola okuyeka natyike tyitutyilike okuivisa?