Nkhele tusokei katutu konyima. Neemia ankho omuundapi Wohamba Artaxerxe. Neemia omu Isilayeli ukala ko Persia mepunda-umbo lio Susan. Ondenge ya Neemia watunda ko Judaa no nondaka onombi wati: ‘Ovanthu vana vakondoka ko Jelusalei vekahi omapita. Ovimato vio kuahanyua-po no va Mbambilonia kavitungwe.’ Neemia anumana. Ankho uhanda okuenda ko Jelusalei opo ekevekuateseko, moluotyo elikuambela iya aende kohamba opo emuyeke ende.

Konyima, ohamba aiimbuka okuti Neemia wanumana. Aipopi okuti: ‘Ame hinekumone ukahi ñga. Oityi wiivite?’ Neemia ati: ‘Nanumana mokonda ovimato viepunda-umbo lietu lio Jelusalei viahanyua-po?’ Ohamba aimupulu okuti: ‘ Oityi ove uhanda ndyilinge?’ Liwa-liwa, Neemia elikuambela momutima. Apopi okuti: ‘Mbambavo, ndyeke ndyende nkhapindule-po ovimato vio Jelusalei.’ Ohamba Artaxerxe aitolela Neemia okuti upondola okueenda iya ohamba ailingi atyiho opo Neemia alinge oungendi ukahi nawa. Ohamba tupu ailingi Neemia akale omutumini wova Judaa tupu emuavela omavai opo alinge omapito epunda-umbo.

Etyi Neemia ehika mo Jelusalei, atale oñgeni ovimato vikahi. Konyima aongiya ovanakwa novatumini evepopila okuti: ‘Tukahi omapita. Tuesukisa okuundapa.’ Ovanthu avetavela avahimbika okutunga ovimato.

Mahi onondyale mbumwe mbo va Isilayeli ambuhimbika okuvekuela, ambupopi okuti: ‘Ovimato evi kaviapamene alo umwe otyimbandye tyipondola okuvitahula-po.’ Avehesuku netyi vapopia avatualako nokutunga. Ovimato avikala ovinene iya nokuapama.

Onondyale ambuya mononkhalelo mbelikalaila opo veye okuluisa o Jelusalei. Etyi ova Judeu veiva etyi tyikahi nokusoka onondyale mbavo avatili owoma. Mahi Neemia ati: ‘Muhatilei owoma. Jeova una onthue.’ Neemia apakeko ovayungi opo vaamene ovanthu vekahi nokuundapa, opo onondyale mbahanyingile mo Jelusalei.

 Mononthiki 52, ovimato avimanuhuka. Neemia aihana ova Levita aveho opo vakapakule o Jelusalei. Aonganeka ovikundyi vivali viokuimba. Ovikundyi ovio aviti etyi tyenda nonthele imwe yovimato otyikuavo atyiende no konthele onkhuavo. Otyo vahika onombendo, novihumba, nouñgoma tupu otyo vaimbila Jeova. Esdra ankho una otyikundyi tyimwe iya Neemia una otyikuavo, avahonyena mondyuo ya Huku. Ovanthu aveho—ovalume, novakai, novana—avaave ovilikutila ku Jeova iya avalingi otyipito. Ankho vahambukwa unene iya onondaka mbavo ankho mbuivala kokule.