Elisabete ankho una ombunga yae utiwa o Maliya, ukala kepunda-umbo lio Nasalee ko Galileia. Maliya ankho una omphunga utiwa Jose, omuhongi womavai. Puetyi Elisabete ena onohanyi epandu mboulemi, oandyu Gabiliyeli aikatalela-po Maliya. Aimupopila okuti: ‘Okamene, Maliya. Jeova wekupanda unene.’ Maliya kanoñgonokele etyi Gabiliyeli ahanda okupopia. Oandyu aimupopila okuti: ‘Ove mokala omulemi okutula omona iya omuluku okuti o Jesus. Omona oo makala Ohamba. Ouhamba wae maukala-ko apeho.’

Maliya apopi okuti: ‘Ame hinelale nomukuendye nawike. Oñgeni mandyikala nomona?’ Gabiliyeli ati: ‘Jeova petupu etyi tyimupona. Kononkhono mba Huku mokala nomona. Ombunga yove Elisabete nae wakala omulemi.’ Konyima Maliya apopi okuti: ‘Ame ndyimupika wa Jeova, alinge etyi ahanda.’

 Maliya aende kepunda-umbo akatalela-po Elisabete. Etyi Maliya emukukunya Elisabete eivi olukembe luapikita meimo liae luahambukwa. Emupopila okuti: ‘Maliya Jeova wekuyamba. Elao enene okuyakula me ya Tatekulu meumbo liange.’ Maliya apopi okuti: ‘Ndyipandula Jeova nomutima wange auho.’ Maliya akala na Elisabete onohanyi ononthatu, konyima aende nokeumbo liae ko Nasalee.

Etyi Jose eiva okuti Maliya omulemi ahande okumuyeka-po. Mahi oandyu aimonekela Jose mondyoi aimupopila okuti: ‘Uhatile owoma okunepa Maliya. Kalingile natyike tyapenga.’ Konyima Jose avelinepe na Maliya emutuala keumbo liae.