João omona wa Sakaliya na Elisabete, etyi ekula akala omuuli. Jeova aundapesa João opo alongese ovanthu okuti Mesiya ukahi nokuya. Mahi ankho kalongesila mo nondyuo mbokufendela ine mepunda-umbo, João ankho ulongesila moluhandya. Ovanthu ankho vatunda mo Jelusalei no mo Judeia aiho opo valongeswe na João. João ankho uvelongesa okuti opo vahambukiswe Huku vesukisa okuyekapo okulinga ovipuka Huku eyele. Ovanthu ovanyingi etyi vatehelela João avelivele ononkhali mbavo iya João evembatisala Menyana Jordau.

João ankho una omuenyo wapola pokati. Ankho uvala oseta yekamelu, tupu ankho ulia ovimphunia-mphunia nowiki. Ovanthu ovanyingi ankho vahanda okunoñgonoka João. Alo umwe ova Faliseu no va Sanduseu ankho vekemutala. João evepopila okuti: ‘Muesukisa okupiluluka nokulivela. Muhasokei okuti muakolela vali mokonda mupopia okuti onwe muvana va Abraiau. Otyo katyilekesa okuti muvana va Huku.’

Ovanyingi ankho veya ku João iya avemupulu okuti: ‘Oityi tuesukisa okulinga opo tuhambukiswe Huku?’ João apopila ova Judeu okuti: ‘Inkha muna ovikutu vivali, tyimwe tyavelei una uhena.’ Ove utyii omokonda yatyi apopila ngotyo? Ankho uhanda ovalongwa vae vanoñgonoke okuti opo vahambukiswe Huku, vesukisa okukala noluembia novanthu.

João apopila ovanthita okuti: ‘Kalei ovakuatyili muhakembei nawike.’ Apopila omafualali okuti: ‘Muhetavelei okufetua onombongo.’

 Ovanakwa no va Levita aveya ku João avemupulu okuti: ‘Ove lie? Ovanthu aveho vahanda okukunoñgonoka.’ João akumbulula okuti: ‘Ame wokulongesa ovanthu konthele ya Jeova, una Isaia aulile.’

Ovanthu ankho vetyihole tyina João evelongesa. Ovanyingi ankho velipula inkha João oe o Mesiya. Mahi evepopila okuti: ‘Una meya wakolela vali kuame. Ame alo umwe hipondola okukutulula onongoi mbononkhaku mbae. Ame ndyimbatisala nomeva, mahi una meya mambatisala nospilitu sandu.’