Koutundilo wo Isilayeli ovanthu ankho vetavela okuti ononthungululu mbupondola okuvehongolela. Motyinthiki tyimwe, ovalume vamwe Vokoutundilo vamuene otyipuka tyiliaima meulu “ngonthungululu” avetyilandula. Onthungululu oyo aivetuala ko Jelusalei. Ovalume ovo avahimbika okupula kovanthu okuti: ‘Omona makala ohamba yo va Judeu ulipi? Onthue tuna etyi tuhanda okumuavela.’

Etyi Helode Ohamba yo Jelusalei eiva konthele yo hamba omphe, asukalala unene. Aihana ovanene-nakwa evepulu okuti: ‘Opi makutyitilwa ohamba oyo?’ Avemupopila okuti: ‘Ovauli vati matyitilwa ko Mbelei.’ Helode aihana ovalume ovo vatunda Koutundilo iya evepopila okuti: ‘Endei no ko Mbelei kaovolei omona oo. Amuya okumphopila apa eli. Naame ndyina etyi nahanda okumuavela.’ Mahi ankho omatutu vala.

“Onthungululu” aihimbika vali okueenda. Ovalume aveilandula okuenda no ko Mbelei. “Onthungululu” aitalama kombanda yondyuo iya ovalume avanyingila-mo. Avavasi-mo Jesus na me yae Maliya. Avaikila konongolo avaavela omona ovipuka viakolela unene. Okuti o Jeova watuma ovalume ovo opo vavase Jesus? Au.

Motyinthiki otyo Jeova apopila Jose kondyoi okuti: ‘Helode uhanda okuipaa Jesus. Pola omukai wove nomona kaholamei ko Egitu. Kalako alo ndyikupopila okuti upondola okukondoka.’ Liwa-liwa, Jose atuala ombunga yae ko Egitu.

Jeova apopila ovalume vahongolelwa nonthungululu opo vahakondoke no ku Helode. Etyi Helode amona okuti pokukondoka vakuata ondyila onkhuavo, anumana unene. Ngotyo, mokonda kametyivili okuvasa Jesus, atumu okuipaa omalukembe aeho eti lia Jesus akala mo Mbelei. Mahi Jesus wahupa ankho uli ko Egitu.

 Apakala vala katutu Helode ankhi. Jeova apopila Jose okuti: ‘Pahe upondola okukondoka.’ Jose na Maliya na Jesus avakondoka ko Isilayeli iya avakakala kotyilongo tyavo mepunda-umbo lio Nasalee.