Jose na Maliya ankho vakala ko Nasalee na Jesus novana vavo ovakuavo ovakuendye novahikuena. Jose ankho ukuatesako ombunga yae, ovilinga viae okuhonga omavai, tupu ankho uvelongesa konthele ya Jeova Novitumino viae. Ombunga ya Jose apeho ankho yenda kondyuo yokufendela tupu ankho kese enima vaya ko Jelusalei okukalinga Opasikwa.

Puetyi Jesus ena omanima 12, ombunga ya Jose avalingi oungendi wokuenda ko Jelusalei. Epunda-umbo ankho lieyula ovanthu veya kotyipito tyo Pasikwa. Etyi o Pasikwa yapwa, Jose na Maliya avakondoka keumbo liavo, ankho vasoka okuti Jesus ukahi mu vakuavo. Mahi avaovola Jesus pombunga yavo mahi avehemuvasi.

Avakondoka ko Jelusalei avakala ononthiki ononthatu nokuovola omona wavo. Konyima, avaende mondyuo ya Huku. Nga-mo vavasa Jesus, upumphi pokati kovalongesi, otyo evetehelela nawa nokuvelinga omapulo. Ovalongesi avahuvu unene  nomapulo Jesus ekahi nokuvelinga. Tupu avahuvu unene nomakumbululo ae. Avetyimono okuti ankho wii nawa ovitumino via Jeova.

Jose na Maliya ankho vasukalala unene. Maliya ati: ‘Mona wange, onthue tuekuovola ponomphangu ambuho! Ankho ulipi?’ Jesus ati: ‘Kamutyii okuti ame ndyina okukala mondyuo ya Tate?’

Jesus aende no vo tate yae ko Nasalee. Jose alongesa Jesus okuhonga omavai. Mokusoka kuove oñgeni Jesus ankho ekahi puetyi omukuendye? Putyina ekula, Jesus atuala-ko okukala omunongo iya apandwa na Huku novanthu.