Etyi Jesus amana okuholovona ono apostolu 12, amono ovanthu ovanyingi vekahi nokumukevelela. Ankho vatunda ko Galileia no Judeia no Tiru no ko Silia no kovilongo ovikuavo vio Jordau. Ankho vaetelela ovavei na vana ankho vamonesua ononkhumbi novilulu. Jesus evehakula aveho. Konyima apumphama iya ahimbika okupopia. Ahangununa oityi tuesukisa okulinga inkha tuhanda okukala omapanga a Huku. Tuesukisa okuimbuka okuti tuna okukuatesuako na Jeova, nokulilongesa okukala nohole nae. Mahi katupondola okukala nohole na Huku inkha katuhole vakuetu. Tuna okulinga nawa ovanthu aveho alo umwe vana vetuyele.

Jesus wati: ‘Okukala vala nohole nomapanga enyi katyituuka. Tupu muesukisa okukala nohole na vana vemuyele, nokuevela ovanthu nomutima auho. Inkha pena umwe wanumana noove, enda katomphole nae iya omuiti otyiponyo. Linga nawa vakuenyi ngetyi ove uhanda vekulinge nawa.’

 Jesus tupu waava onondonga onongwa konthele yonombongo nomalumono. Wati: ‘Tyakolela vali okukala epanga lia Jeova, tyipona okukala no nombongo ononyingi. Omunthu upondola okuvaka onombongo mbove, mahi nawike upondola okuvaka oupanga wove na Jeova. Yekeipo okukala notyiho konthele yetyi mamuli, nokunwa ine okuvala. Talei oviila. Huku apeho uviavela okulia viesukisa. Okukala notyiho katyikuatesako okukala vali nomuenyo. Hinangelei okuti Jeova wii etyi muesukisa.’

Ovanthu vana nalumwe veivile omunthu upopia nga Jesus. Ononkhalamutwe mbonongeleya mbavo ankho kavevelongesa ovipuka ovio. Omokonda yatyi Jesus ankho alongesila nawa? Omokonda atyiho ankho alongesa tyitunda ku Jeova.