João ankho ulongesa okuti: ‘Makuya umwe wakolela vali tyipona ame.’ Etyi Jesus atuukisa omanima 30, watunda ko Galileia aende no Kenyana Jordau, kuna ankho João ambatisalela ovanthu. Jesus wahandele João emumbatisale, mahi João emupopila okuti: ‘Ame hipondola okukumbatisala. Ame ñgeno ndyimbatisalwa nove.’ Jesus atolela João okuti: ‘Jeova uhanda ame ndyimbatisalwe nove.’ Avanyingila mo maande Enyana Jordau iya João emuyaveka olutu aluho momaande.

Etyi Jesus atunda momaande, elikuambela. Pomuvo opo, eulu aliikuka iya ospilitu ya Huku aimulaukila Ngo pomba. Peulu apatundu ondaka ya Jeova yati: “Ove, ove Mona wange, onthyolwe. Ame nekupanda.”

Etyi Ospilitu ya Jeova yalaukila Jesus, akala Kristu ine o Mesiya. Pahe ankho upondola okuhimbika otyilinga apewa na Jeova tyemueta pano pohi.

Konyima etyi ambatisalwa, Jesus aende moluhandya akakala-mo ononthiki 40. Etyi akondoka akapopia na João. João amono Jesus ukahi nokuya no kwe apopi okuti: ‘Tala Ondyona ya Huku ipola ononkhali mouye.’ João wapopia ngotyo mokonda ankho uhanda ovanthu vanoñgonoke okuti Jesus Mesiya. Utyii oityi tyamonekele-po etyi Jesus apita moluhandya? Tutalei.