Jesus weile pano pohi opo aivise onondaka onongwa Mbouhamba wa Huku. Pala okulekesa okuti Jesus makala Ohamba, Jeova wemuavela ospilitu sandu, opo alinge omahuviso. Jesus ankho uhakula omauvela aeho. Ovavei ankho veya ku Jesus opo evekuateseko iya evehakula aveho. Omumphoki umupatula omaiho, ompholo wipatula omakutui vokualemana uvehakula avakala nawa iya tupu ankho upola ovanthu ovilulu. Alo umwe vana ankho vakuata kovikutu viae vaveluka. Ovanthu ankho valandula Jesus kese oku enda. Namphila pamwe ankho uhanda okukala nkhele aike, mahi kataatele nawike uhanda okukuatesuako.

Nthiki imwe, ovanthu vamwe avaeta omulume umwe walemana pondyuo Jesus ekahi. Mahi mondyuo ankho mueyula unene ovanthu, ankho vetupu apa vapondola okukuata. Avayambulula ondyuo avemukuatesa pemphana opo alo pu Jesus. Jesus apopila omulume okuti: ‘Katuka enda.’ Etyi alinga ngotyo ovanthu avahuvu unene.

Otyikando otyikuavo, Jesus aende mepunda-umbo avasi ovalume ekwi vena ouvela utiwa otyilundu, avemulandula otyo vemuihana okuti: ‘Jesus tukuateseko!’ Pomuvo opo ovanthu ankho vena ouvela oo, kavafuene pu vakuavo. Jesus apopila ovalume ovo okuti endei kondyuo ya Huku iya etyi vekahi nokuenda, avaveluka. Ovanthu ovo aveho avahakuka. Etyi umwe aimbuka okuti waveluka ouvela  wae omuvi, akondoka akapandula Jesus iya ahilivika Huku. Povalume ovo aveho ekwi, wike vala wapandulile Jesus.

Omukai umwe ankho wavela omanima 12 iya ankho utupu vali ekevelelo liokuti maveluka. Eya pokati kovanthu ovanyingi, akala konyima ya Jesus emuyame kotyikutu tyae. Liwa-liwa omukai aveluka. Etyi alinga ngotyo, Jesus ati: “Olie wandyama?” Omukai ehimbika okuteketa, eya komutwe wa Jesus apopi okuti: Ame nekuyama. Jesus emupameka, emupopila okuti: ‘Mona wange, enda nombembwa.’

Omutumini umwe utiwa o Jairu aiti ku Jesus okuti: ‘Endyu keumbo liange! Omona wange wavela unene.’ Omukainthu oo wankhia puetyi Jesus ehenehike keumbo lia Jairu. Puetyi Jesus ehika amono ovanthu ovanyingi vekahi nokulila nombunga. Jesus apopi okuti: ‘Muhalilei, omona ulele.’ Akuate omukainthu menkhanya ati: “Nkhelo pinduka-po!” Omona liwa-liwa, apumphama, iya Jesus apopila ovo tate yae vemuavele okulia. Nkhele soka oñgeni ovo tate yomona velitehelela!