Jesus ankho una omapanga ae etatu ankho vakala ko Betania. Ankho o Lasalu no nomphange mbae, Maliya na Marta. Nthiki imwe, puetyi Jesus ankho ekahi himba limwe lio Jordau, Maliya na Marta avatumu omunthu emupopile okuti: ‘Lasalu wavela unene. Mbambavo endyu liwa!’ Mahi Jesus ahaende liwa. Akevela vali ononthiki onombali, konyima apopila ovalongwa vae okuti: ‘Tuendei ko Betania. Lasalu ulele ame mankhemupahula-po.’ Ono apostolu ambumupopila okuti: ‘Inkha Lasalu ulele, ha makala nawa.’ Jesus evepopila okuti: ‘Lasalu wanyima.’

Etyi Jesus ehika ko Betania, tunde apa Lasalu apakwa ankho palamba ononthiki ononkhuana. Ankho pena ovanthu ovanyingi veya okuungumanesa Marta na Maliya. Puetyi Marta eiva okuti Jesus weya, ahateka opo vekelivase nae. Ngwe ati: “Tatekulu, ankho wali pano, ñgeno omphange yange kanyimine.” Jesus emupopila okuti: ‘Omphange yove makala vali nomuenyo. Marta, otyo utyitavela?’ Ngwe ati: ‘Ame ndyitavela okuti ha makatutila.’ Jesus emupopila okuti: “Ame tutilo, ame muenyo.”

Konyima Marta aende noku Maliya emupopila okuti: ‘Jesus weya.’ Maliya ahateka noku Jesus, ovanthu ovanyingi avemulandula. Etyi ehika pwe aikila konongolo ponthele yae, ahimbika okulila unene. Ati: ‘Tatekulu, inkha wali pano, omphange yetu ñgeno nkhele una omuenyo!’ Jesus etyimono okuti ankho tyemuihama unene, nae ahimbika okulila. Etyi ovanthu ovanyingi vamona ononkhuka mbae, avati: ‘Jesus ankho tyili-tyili uhole umwe Lasalu.’ Mahi vamwe ankho velipula okuti: ‘Omokonda yatyi ahayovolela epanga liae?’ Oityi Jesus alinga vali?

Jesus aende na apa vemupaka, ankho pombundi papatwa emanya limwe enene. Evepopila okuti: ‘Polei-po emanya.’ Marta ati: ‘Mahi palambale ononthiki ononkhuana! Tyafwa pahe wanika.’ No ngotyo, avapolo-po emanya iya Jesus elikuambela okuti: ‘Tate, napandula unene etyi unthehelela. Ame ndyityii okuti apeho  unthehelela, mahi napopila vala peulu mokonda yovanthu ava opo vanoñgonoke okuti ove wanthuma.’ Konyima aihanena peulu okuti: “Lasalu tunda-mo!” Apamoneka otyipuka tyimwe tyihuvisa: Lasalu atundu-mo, mahi wawingilwa movinyanga. Jesus ati: “Muwingululei iya muyekei aye.”

Ovanthu ovanyingi ankho vekahipo, avakala nekolelo mu Jesus. Vamwe avaende, avakapopila ova Faliseu. Okutuka opo, ova Faliseu ankho vahanda okuipaa Lasalu na Jesus. Umwe povalongwa 12, Juda Iskaliote, aende ko va Faliseu evepulu okuti: ‘Mamumphe otyiñgapi inkha ndyimukuatesako okuvasa Jesus?’ Avati matukuavela onombongo 30 mbopalata iya Juda ehimbika okusoka oñgeni matuala Jesus ko va Faliseu.