ELONGESO 85
Jesus Uhakula mo Tyasapalo
Ova Faliseu ankho veyele Jesus iya ankho vahanda okumukuata. Avapopi okuti kapondola okuhakula ovanthu mo Tyasapalo. Mo Tyasapalo tyimwe, Jesus wavasa omulume umwe uhamono-po wiita ovipuka kovanthu metapalo. Apopila ovalongwa vae okuti: ‘Talei oñgeni epondolo lia Huku malikuatesako omulume ou.’ Jesus atili omate pohi alingi onthata emuwaeka pomaiho. Emupopila okuti: ‘Enda kelikohe pomaiho metala lio Siloe.’ Omulume oo alingi etyi apopilwa, iya motyikando tyotete momuenyo wae, ehimbika okumonapo.
Ovanthu avanumana unene. Avapopi okuti: ‘Omulume ou hayo una tuhole okuvasa apa upumphi otyo aita kovanthu ovipuka?’ Omulume apopi okuti: ‘Ame ankho ndyimumphoki!’ Ovanthu avemupulu okuti: ‘Oñgeni pahe weetepo?’ Etyi omulume apopia etyi tyaendapo, ovanthu avemutuala ko va Faliseu.
Omulume apopila ova Faliseu okuti: ‘Jesus wapaka onthata pomaiho ange iya amphopila opo ndyikelikohe. Ame andyikelikoha iya pahe ndyietepo.’ Ova Faliseu avati: ‘Inkha Jesus wahakula mo Tyasapalo, epondolo liae kaliatundile ku Huku.’ Mahi ovanthu ovakuavo avati: ‘Inkha epondolo liae kaliatundile ku Huku, ñgeno ketyivilile okuhakula omauvela aeho.’
Ova Faliseu avaihana ovo tate yomulume oo avevepulu okuti: ‘Oñgeni omona wenyi pahe amona-po?’ Ovo tate yae ankho vatila owoma mokonda ova Faliseu ankho vapopia okuti ovanthu vetavela ku Jesus mavataatwa mondyuo yokufendela. Avapopi okuti: ‘Katutyii. Muene mupulei.’ Ova Faliseu avalingi omulume omapulo omanyingi alo apopia okuti: ‘Ame nemupopilale ovipuka aviho. Omokonda yatyi mutuailako okumphula?’ Ova Faliseu avanumana avemutahela pondye.
Jesus avasi omulume oo, emupulu okuti: ‘Ove una ekolelo mu Mesiya?’ Omulume ati: ‘Ndyipondola okukala nekolelo mwe, mahi pahe omokonda himwii.’ Jesus emupopila okuti: ‘Ame Mesiya.’ Wetyimona Jesus ankho omunthu patyi? Jesus kahakulile vala omulume oo mahi tupu wemukuatesako okukala nekolelo.
“Mupopia tupu ngotyo, omokonda Ovihonekwa kamuvii, tupu kamuii epondolo lia Huku.”—Mateus 22:29