Etyi Opasikwa yenima 32 P.K. ihenehikepo, ono apostolu vakaivisile. Etyi vakondoka ankho vaponwa unene. Moluotyo, Jesus evetuala ko ko Betesaita opo vakapululukue-po. Avanyingila mowato ngako venda nako. Etyi vehika Jesus amono ovanthu ovanyingi koluhimba. Ovanthu ovo ankho vekahi nokulandula Jesus. Namphila Jesus ankho ahanda okukala vala no no apostolu mbae, mahi eveyakula nokankhenda. Wahakula ovavei vavo iya ahimbika okuvelongesa. Ehimama onthiki aiho nokuvelongesa konthele Youhamba wa Huku. Mokonda ankho kukahi nokunthikovela, ono apostolu mbae ambumupopila okuti: ‘Ovanthu valiwa unene nondyala. Vepopila vaye vakataindye etyi mavali.’

Jesus ati: ‘Kavapondola okuenda. Veavelei etyi mavali.’ Ono apostolu avapulu okuti: ‘Ove uhanda tuende iya atukalanda ono mbolo pala-vo?’ Filipe, umwe pono apostolu, ati: ‘ Alo umwe ankho tuali no nombongo ononyingi, ñgeno ankho kambatulukile opo tulande onombolo pala ovanthu ava ovanyingi-nyingi.’

Jesus apulu okuti: ‘Okulia muna kulifue-pi?’ Andelee ati: ‘Tuna vala onombolo ononthano no nombisi onombali. Ovanthu ava kamavetuuka.’ Jesus ati: ‘Etei onombolo nombisi.’ Iya apopila ovanthu vapumphame ovikundyi-ovikundyi, vimwe 50 ovikuavo 100. Jesus akuate onombolo nombisi atale peulu iya elikuambela.  Konyima aavela okulia ono apostolu, iya ono apostolu ambuavela ovanthu. Ovalume 5000, novakai novana aveho avali avekuta. Opo okulia kuhapeseke ono apostolu avakongolola okulia akuho kuahupapo. Aveyulisa ono sesu 12. Otyipuka otyo tyihuvisa unene, hatyo?

Ovanthu avahuvu unene avahande Jesus akale ohamba. Mahi Jesus ankho utyii okuti omuvo Jeova aholovona opo akale ohamba kaunehikepo. Pahe atumu ovanthu aveho vaye iya apopila ono apostolu vayauke Elunga lio Galileia. Ono apostolu avavelama mowato iya Jesus aende aike komphunda. Omokonda yatyi? Mokonda ankho uhanda okukala aike opo elikuambele ku Tate yae. Namphila ankho ena ovilinga ovinyingi, mahi ankho woovola omuvo opo elikuambele ku Huku.