Etyi vamana okulinga Opasikwa, Jesus no valongwa vae avakuate ko Samaria okukondoka ko Galileia. Popepi nepunda-umbo lio Sikale, Jesus atalama pomphangu pena onyombo ihanwa okuti onyombo ya Jako. Esala nokupululukwa ovalongwa vae avaende mepunda-umbo opo vakalande okulia.

Apeya omukai weya okutapela omeva ponyombo. Jesus apopila omukai oo okuti: “Mphevo omeva.” Omukai ati: ‘Omokonda yatyi upopila naame? Ame ndyimukai omu Samaria. Ova Judeu kavapopi no va Samaria.’ Jesus apopila omukai okuti: ‘Omokonda kutyii ame lie, inkha utyii, ñgeno wandyita omaande iya ame ankhuavela omaande omuenyo.’ Omukai emupulu okuti: ‘Otyo tyihangununa-tyi?’ Ove utupu ombaliti yokuyendya omeva.’ Jesus emupopila okuti: ‘Una unwa komeva ange nalumwe makala vali nohunga.’ Omukai ati: “Tatekulu, mphevo omaande atyo oo.”

Jesus apopila omukai okuti: ‘Kaihane omulume wove.’ Omukai ati: ‘Ame ndyitupu omulume.’ Jesus ati: ‘Wapopia otyili. Ove wakalele-ale na vetano iya pahe omulume una-e hawove-ko.’ Omukai ati: ‘Naimbuka okuti ove umuuli. Ovanthu ovanyingi vetavela okuti tupondola okufenda Huku komphunda ei, mahi ova Judeu vapopia okuti tuna vala okumufendela ko Selusalei. Ame ndyityii okuti tyina Mesiya ameya, metulongesa oñgeni tuna okufenda. Konyima Jesus apopi otyipuka ehenepopile omunthu nawike okuti: ‘Ame Mesiya.’

 Omukai aende kepunda-umbo iya apopila ova Samaria okuti: ‘Ame ndyisoka okuti navasa Mesiya. Ngwe wii ovipuka ovinyingi konthele yange. Tuendei mukemutale!’ Avemulandula alo ponyombo iya avatehelela omalongeso a Jesus.

Ova Samaria avaiti Jesus akale mepunda-umbo liavo. Alongesa mepunda-umbo ononthiki onombali iya ovanthu ovanyingi avetavela okuti o Mesiya. Etyi vatehelela Jesus avapopila omukai omu Samaria okuti: ‘Pahe tuetyimona okuti tyili-tyili omulume ou, omuyovoli wouye.’