Etyi Jesus ankhia, omulume umwe omuhona utiwa o Jose aiti ku Pilatu opo emuavele olutu lwa Jesus ankho lukahi momuti. Jose awingila olutu olo motyinyanga tyimwe otyiwa tyo musinya, elupake melangalo epe. Iya pombundi yelangalo apakeko emanya limwe enene. Ovanene-nakwa avapopila Pilatu okuti: ‘Onthue tuatila owoma wokuti umwe povalongwa va Jesus mapolo-po olutu lwae iya apopi okuti watutilisua.’ Moluotyo, Pilatu evepopila okuti: ‘Hitikei-po iya amuyungu-po.’

Etyi palamba ononthiki ononthatu, komuhuka-huka ovakai vamwe aenda kelangalo iya avasi emanya liapolwa-po. Oandyu imwe ankho ikahi mokati kelangalo aipopila omukai oo okuti: ‘Uhatile owoma. Jesus watutilisua. Enda kapopile ovalongwa vae opo vekelivase nae ko Galileia.’

Maliya Mandalena ahateka opo akavase Petulu na João. Evepopila okuti: ‘Pena ou wapola-mo olutu lwa Jesus!’ Petulu na João avakahatekela kelangalo. Etyi vehika-ko avavasi melangalo mutupu natyike iya avakondoka komaumbo avo.

Etyi Maliya akondoka kelangalo, wamona onoandyu onombali mokati kelangalo iya embupopila okuti: ‘Ame hityii ovalie vatyindapo olutu lwa Tatekulu.’ Konyima amono omulume umwe iya asoko okuti hamwe o wokuundapa mepia limwe ponthele yelangalo iya ati: ‘Ove, mbambavo, mphopile-vo opi wemupaka.’ Mahi etyi omulume oo emuihana okuti “Maliya!” pahe aimbuka okuti o Jesus. Maliya aihanena peulu okuti: “Mulongesi!” Iya emuhumbakana. Jesus emupopila okuti: ‘Enda kapopile ovakuatate vange okuti ove wamona.’ Liwa-liwa, Maliya ahateka alo kovalongwa iya evepopila okuti ame namona Jesus.

Monthiki oyo, ovalongwa vevali ankho vekahi nokutunda ko Jelusalei okuenda no ko Emaus. Omulume umwe eliwaneka kumwe navo iya evepulu oityi ankho vekahi nokupopia. Ngwe avapopi okuti: ‘Ove kuetyiivile? Mononthiki ononthatu mbokualamba, ovanene-nakwa vaipaa Jesus. Pahe omukai umwe wapopia okuti Jesus una  omuenyo!’ Omulume oo, evepulu okuti: ‘Onwe kamutavela etyi ovauli vapopia? Avapopi okuti, Kristu ankho upondola okunkhia iya atutiliswa.’ Atualako okuvehangununina Ovihonekwa. Etyi vehika ko Emaus, ovalongwa avaiti omulume oo opo akale navo. Etyi velikuambela opo valie, avaimbuka okuti omulume oo ankho o Jesus. Konyima avehemumono vali.

Ovalongwa ovo vevali avaende kondyuo imwe ko Jelusalei omu ankho ono apostolu vekahi iya avevepopila etyi tyaenda-po. Etyi ankho vekahi mondyuo oyo, Jesus amonekela aveho. Potete, ono apostolu ankho avehetavela okuti o Jesus. Evepopila okuti: ‘Talei omankhanya ange, ndyamei. Tyapopiwa okuti Kristu mapindulwa-po kononkhia.’