Ova Judeu ankho valinga otyipito tyo Pasikwa omanima aeho monthiki 14 yo hanyi ya Nisaa. Otyipito otyo ankho tyivehinangelesa oñgeni Jeova eveyovola moupika ko Egitu nokuvetuala Kotyilongo Valaelwe. Menima 33 P.K., Jesus no no apostolu mbae avahinangela o Pasikwa mondyuo imwe mo Jelusalei. Etyi opasikwa yapua Jesus ati: ‘Umwe puonwe mandandesa.’ Ono apostolu avahuvu iya avapulu Jesus okuti: ‘Olie mekulandesa?’ Jesus ati: ‘Omulume mandyiavela ombolo ei.’ Konyima Jesus aavela Juda Iskaliote otyimbembu tyombolo. Liwa-liwa Juda Iskaliote akatuka-po aende.

Konyima Jesus alingi elikuambelo avembula ombolo aavela ono apostolu mbae. Ati: ‘Liei ombolo ei. Ilekesa olutu luange, mandyiave mokonda yenyi.’ Konyima elikuambela pala ovinyu iya aavela ono apostolu mbae. Ati: ‘Nuei ovinyu ei. Ilekesa ohonde yange mandyiave opo ononkhali mbenyi mbuevelwe. Ame ndyimupopila okuti, mamukakala onohamba kumwe naame keulu. Omanima atyo aeho lingei ehinangelo liange.’ Tunde opo, ovalanduli va Jesus veliwaneka omanima aeho opo vetyilinge. Eliongiyo olio, hono liihanwa okuti Ehinangelo lia Tatekulu.

 Etyi ondalelo yapwa, ono apostolu avahimbika okuyaya olie omunene vali puvo. Mahi Jesus evepopila okuti: ‘Omunthu omunene vali pokati kenyi oyo una ulitala ngatyina omona vali ku vakuavo.

‘Onwe mumapanga ange. Ame ndyimupopila ovipuka aviho Tate yange ahanda ndyimupopile. Apa katutu mandyiende ku Tate yange keulu. Onwe mamusala iya ovanthu mavaimbuka okuti muvalongwa vange tyina mukala nohole ine oluembia kese umwe na mukuavo. Onwe muna okukala noluembia kese umwe na mukuavo, ngetyi ame nemulekesa oluembia.’

Konyima Jesus elikuambela, aiti ku Jeova opo akuateseko ovalongwa vae aveho. Ankho waita opo Jeova evekuateseko okuundapa nombembwa. Waitile opo enyina lia Jeova lisukukiswe. Konyima Jesus no no apostolu mbae, avaimbi otyiimbo tyinkhimaneka Jeova iya avaende. Omuvo Jesus makuatwa ankho ukahi nokuhikapo.