Jeova walaa okuti: ‘Kamakukakala vali ononkhia, nokulila, no nongembia. Ame mandyikasekuna ononkhuka momaiho avo. Ovipuka aviho ovivi viokohale kavikahinangelwa vali.’

Jeova wapaka Andau na Eva mo tyikunino tyo Endene opo vakale-mo nehambu nombembwa. Ankho vena okufenda Tate yavo wo keulu iya avayulisa ohi novana vavo. Andau na Eva kavatavelele Jeova, mahi no ngotyo ehando liae alihapiluluka. Momukanda ou tuatala okuti ovipuka aviho Huku alaa mavifuiswa-po. Ouhamba wae maukaetela ovipuka oviwa ovanthu aveho ngetyi alaele Abraiau.

Ngotyo, Satanasi no vilulu viae, novanthu aveho valinga ovivi mavakahanyua-ko. Aveho mavakafenda vala Jeova. Kamatukavela ine okunkhia. Ngotyo, matukakala ononthiki ambuho nononkhono, nehambu aphoenene. Ohi maikakala omphangu yombembwa. Ovanthu aveho mavakakala nokulia okunyingi no nondyuo. Ovanthu  mavakakala ovana-mbembwa, kakukakala vali ovanthu ovakalavi. Ovinyama kavikatila vali owoma ovanthu iya onthue katukevitila vali owoma.

Matukala nehambu enene tyina Jeova amahimbika okututilisa ovanthu vokuankhia. Matukakala vali novanthu vakaleleko kohale, ngetyi o Abele na Noe na Abraiau na Sara na Moisesi na Rute na David. Navo mavakakuatesako okuviukisa Ohi ikale omphangu yombembwa. Matukalinga ovilinga ovinyingi vihambukiswa.

Jeova uhanda ove ukakale-mo. Ove mokanoñgonoka nawa Jeova monkhalelo uhasoko. Tutualeiko okufuena vali ku Jeova ononthiki ambuho, pehepano, aloo-loo!