Puetyi Apostolu João ankho eli mokaleya pokalongo kakala pokati komeva ko Patmu, Jesus wemulekesile omamonekelo 16 konthele yovipuka mavikamoneka komutwe. Omamonekelo oo, alekesa oñgeni enyina lia Jeova malisukukiswa, no ñgeni Ouhamba wae mauya no ñgeni ehando liae malilingwa pano pohi ngetyi lilingwa keulu.

Memonekelo limwe, João wamuene Jeova uli kotyipundi tyae tyomunkhima, uli pokati kovakulu 24 vavala ovikutu ovinthuelu nomilami vio oolu. Tupu wamuene omiliakulo vialiaima, eivi omutitimo utundilila kotyipundi tyoutumini. Ovakulu 24 avelinyongamena komutwe wa Jeova otyo vemufenda. Memonekelo ekuavo, João wamuene ovanthu ovanyingi-nyingi vatunda movilongo aviho, nomihoko, nomalaka vafenda Jeova. Ondyona, Jesus, oe omunthita wavo, ukahi nokuvehongolela komaande omuenyo. Memonekelo ekuavo, Jesus akala Ohamba ahimbika okutumina keulu kumwe novakulu 24. Memonekelo lialandula-ko, João amono Jesus ukahi nokulwisa enyama enene, Satanasi, novilulu viae. Jesus evetahulila pano pohi.

 João amono Ondyona kumwe novanthu 144.000 vetai Komphunda Siau. Tupu wamuene oandyu imwe ikahi nokunthanana peulu, otyo ipopila ovanthu pano pohi opo vakale nonthilo na Huku, nokumunkhimaneka.

Memonekelo ekuavo, amono ovilwa vio Armagedom. Mokueenda wovilua ovio, Jesus nomafualali ae avafindi Satanasi na vana vahula kwe. Memonekelo liahulilila, João amono ombembwa ili peulu no pohi. Satanasi nombuto yae mavakahanyuako. Aveho vakala peulu na pano pohi vakala nonthilo nenyina lia Jeova, ngae vala vafenda.