IMo Filipu ankho muna omuhikuena umwe omupika una otyilulu. Otyilulu otyo ankho tyikuatesako okutapesa. Iya vana aundapela otyo vamona onombongo ononyingi. Etyi Paulu na Sila vapita ko Filipu, ankho omuhikuena oo uvekuama-kuama. Tyina amevemono, otyilulu atyiliyavela mokati komuhikuena oo okuti: “Ovalume ava ovapika va Huku Omukulami.” Konyima, Paulu apopila otyilulu okuti: ‘Menyina lia Jesus, tunda mokati kae!’ Otyilulu otyo atyimutundu.

Etyi vana aundapela vetyimona okuti omuhikuena oo kamulingi vali onombongo pala-vo, avanumana unene. Avatuala Paulu na Sila kovatumini iya avati: ‘Ovalume ava kavekahi nokuendela movitumino iya vekahi nokuetela epunda-umbo ovitateka!’ Ovatumini avatumu okuveta Paulu na Sila iya avapakwa mokaleya. Omuyungi evepake koluhinyi, pomphangu imwe yanthikovela unene, evekutu.

Ovakuavo ankho navo vakuatwa, aveivi Paulu na Sila vekahi nokuhilivika Jeova noviimbo. Liwa-liwa, kounthiki akuya otyinimawe, atyivete motyimato tyo kaleya, omapito aaikuka. Etyi omapito aikuka, omalienge ankho vakutwa nao, aakutuluka. Omuyungi anyingila mokati kokaleya, amono okuti omapito eumbululu. Ngotyo asoko okuti ononkhuatwa ambuho mbahena iya akuate omutunga wae opo eliipae.

Etyi Paulu etyimona emupopila okuti: ‘Uheliipae! Atuho tuli muno!’ Omuyungi eya ponthele ya Paulu na Sila aikila konongolo. Evepulu okuti: “Oityi ndyina yokulinga opo ndyiyovoke?” Avemupopila okuti: ‘Ove no vomeumbo liove muesukisa okuyumba onthumbi mu Jesus.’ Paulu na Sila avemulongesa ondaka ya Jeova, omuyungi oo wokaleya no vomeumbo liae avambatisalwa.