Ono Apostolu vetavelele etyi Jesus evetuma opo vayandyanesa onondaka onongwa mouye auho. Menima 47 P.K. ovakuatate mo Antiokia avatumu Paulu na Barnabe opo vakaivise. Ovaivisi ovo vevali vena ombili, avaivisa mo Asia Menor ngetyi o ko Derbe no ko Listra no ko Ikoniu.

Paulu na Barnabe avalongesa ovanthu ovanyingi, ovahona, novahepi, novana, novakulu. Ovanthu ovanyingi avetavela otyili konthele ya Kristu. Puetyi Paulu na Barnabe valongesa Sergiu Paulu, omutumini wo Chipre, onganga imwe aihande okuvetalameka. Paulu emupopila okuti: ‘Jeova uyele etyi ulinga.’ Liwa-liwa akala omumphoki. Etyi omutumini Sergiu Paulu etyimona etavela ondaka ya Huku.

Paulu na Barnabe ankho valongesa po nomphangu ambuho, umbo-na-umbo, no momatapalo, no ponopalasa, no monondyuo mbokufendela. Etyi vahakula omulume umwe ankho otyilema ko Listra, ovanthu vetyimona avasoko okuti o no huku iya avahimbika okufenda kuvo. Mahi Paulu na Barnabe avevetalameka iya avati: ‘Fendei vala Huku! Onthue tuvanthu vala.’ Konyima yotyo, ova Judeu vamwe, aveya avahongiliya ovanthu vatyitukile-po Paulu. Avavete Paulu nomamanya, avemuyumbu kondye yepunda-umbo, avemusi enthuvia. Mahi, Paulu ankho nkhele una omuenyo! Ovakuatate aveya okumupola-po, avemutuala vali mokati kepunda-umbo. Konyima Paulu akondoka ko Antiokia.

In Paulu wahimbika oungendi wae menima lio 49 P.K. etyi akondoka ko Ásia Menor opo akatalelepo ovakuatate, akaivisa onondaka onongwa  kovilongo ovikuavo mo Europa. Aende no ko Atena no ko Efesu no ko Filipu no ko Tessalônica, no ko nonthele ononkuavo. Sila na Luka nomukuendye umwe utiwa Timoteo avahindikila Paulu moungendi wae. Avaundapela kumwe opo vakuateseko omawaneno okukala vali tyapama. Paulu wakalele vali enima notyihupe ko Korintu, opo apameke ovakuatate. Evelongesa nokuvepameka iya ahonekela omawaneno omanyingi. Ankho utunga omakaka. Konyima, Paulu akondoka ko Antiokia.

Menima 52 P.K. Paulu alingi vali oungendi wa tatu, okuhimbikila ko Asia Menor. Aende no kotyilongo tyitiwa Filipu, konyima alauka no ko Korintu. Paulu akala omanima omanyingi mo Efesu, otyo alongesa, nokuhakula, nokukuatesako omawaneno. Tupu ankho ulinga omalongomona ononthiki ambuho mosikola. Ovanthu ovanyingi avetavela iya avalingi omapiluluko. Konyima yetyi aivisa onondaka onongwa movilongo ovinyingi, Paulu akondoka ko Jelusalei.