Etyi palamba ononthiki ekwi tunde etyi Jesus akondoka keulu, ovalongwa vatambulile ospilitu sandu. Otyo tyamoneka mo Pendekoste yo 33 P.K. iya ovanthu vatundilila kovilongo vielikalaila aveya motyipito mo Jelusalei. Ankho pena ovalongwa 120 va Jesus veliongiya mondyuo. Liwa-liwa, apamoneka otyipuka tyimwe tyihuvisa. Ankho otyipuka tyimwe tyikahi ngo tupia atyilapela komitwe vio valongwa iya avahimbika okupopia omalaka elikalaila. Mondyuo oyo, amuivala omuvielo umwe omunene ukahi ngo tyipepe.

Ovanthu vokuatunda kovilongo vio kokule veya mo Jelusalei aveivi omuvielo oo, avahatekela mondyuo okuya okutala oityi tyaenda-po. Avahuvu unene etyi veiva ovalongwa vapopia omalaka elikalaila. Avapopi okuti: ‘Mahi, ovanthu ava ova Galileia. Oñgeni vetyivila okupopia omalaka etu?’

Petulu, no no apostolu ovakuavo avakala komutwe wovanthu ovanyingi. Petulu apopila ovanthu oñgeni Jesus aipawa no ñgeni  Jeova emututilisa. Petulu ati: ‘Pahe Jesus uli keulu kokulio kwa Huku iya pahe wetuavela ospilitu sandu alaele. Otyo onwe mueivila ehuviso eli, nokulimona.’

Onondaka Petulu apopia mbaavela ondundo ovanthu iya avapopi okuti: “Oityi tuna okulinga?” Ngwe evepopila okuti: ‘Livelei ononkhali mbenyi iya amumbatisalwa menyina lia Jesus. Tupu mamutambula ospilitu sandu.’ Monthiki oyo, ovanthu 3.000 avambatisalwa. Okuhimbikila opo, ovalongwa ovo avahimbika okuliyawisa liwa-liwa mo Jelusalei. Nekuateso liospilitu sandu, ono apostolu avaonganeka omawaneno omanyingi opo valongese ovalongwa ovipuka aviho Jesus evetuma.