Timoteo ankho omukuatate umwe omukuendye wo mewaneno lio ko Listra. Tate yae ankho Omu Gregu iya me yae ankho omu Judeu. Me yae utiwa o Eunise iya me ya me yae utiwa Loide, ankho valongesa Timoteo konthele ya Jeova tunde puetyi ankho omona omututu.

Etyi Paulu akapila ko Listra moungendi wae wavali wokuivisa, wamuene okuti Timoteo ankho uhole ovakuatate iya uhanda okuvekuatesako. Paulu aiti Timoteo opo vaye aveho. Pamwe ankho, Paulu ulongesa Timoteo opo aivise nokulongesa nawa onondaka onongwa.

Ospilitu sandu aihongolela Paulu na Timoteo oku ankho vena okuenda. Motyinthiki tyimwe, omulume umwe apopila Paulu memonekelo okuti, kuata ko Masedonia opo utukuateseko. Ngotyo Paulu na Timoteo na Sila na Luka vakaivisile nokukaonganeka omawaneno.

Mo Masedonia epunda-umbo likala mo Tesalonika, ovalume novakai ovanyingi avakala Ovakristau. Mahi ova Judeu avakala nonkhi Paulu na ava ankho ekahi nokuenda navo. Ova Judeu ovo avevetendeleya etyi vapopila ovatumini okuti: ‘Ovalume ava onondyale mboutumini wo Roma!’ Omuenyo wa Paulu na Timoteo ankho uli motyiponga, moluotyo kounthiki avaende no ko Bereia apehena ou wevemona.

Ovanthu vo ko Bereia okulilongesa onondaka onongwa ankho vetyihole iya ova Gregu no va Judeu avetavela ondaka ya Huku. Mahi etyi ova Judeu vamwe vatunda ko Tesalonika veya, avahimbika okuyala etyi Paulu ankho ekahi nokulinga, Paulu atundu-ko aende no ko Atena. Timoteo na Sila avesala mo Bereia opo vapameke ovakuatate. Nthiki imwe, Paulu atumu Timoteo akondoke ko Tesalonika opo akakuateseko ovakuatate vekahi nokumoneswa ononkhumbi. Konyima,  Paulu atumu Timoteo opo akatalelepo omawaneno omakuavo opo evepameke.

Paulu apopila Timoteo okuti: ‘Vana vahanda okulingila Jeova mavamoneswa ononkhumbi.’ Timoteo wamonesilue ononkhumbi, apakwa mokaleya mokonda ankho una ekolelo mu Huku. Ngwe ankho una ehambu mokonda yomphitilo akala nayo yokulekesa oukuatyili wae ku Jeova.

Paulu wapopila ova Filipu okuti: ‘Ame mandyimutumu Timoteo. Memulongesa etyi tyihangununa okuendela motyili tupu memulongesa oñgeni tyiiviswa.’ Paulu ankho utyii okuti upondola okuyumba onthumbi Timoteo. Timoteo na Paulu ankho omapanga, ankho vaundapela kumwe, avetyilingi momanima omanyingi.