Noe, nombunga yae, novinyama vanyingilile mowato. Etyi Jeova aika epito, ombila aihimbika okuloka. Ailoko unene iya owato auhimbika okuyalala kombanda yomaande. Ohi aiho aiyula omaande. Ovanthu aveho onondingavivi ankho vekahi kondye yowato, avankhi. Mahi Noe nombunga yae avahupu. Okuti ove upondola okusoka ehambu vakala nalio mokonda yokuetavela ku Jeova?

Ombila ailoko ovitenya 40 no vinthiki 40, konyima aitalama. Katutu-katutu omeva ahimbika okutepuluka. Konyima, owato aukala kombanda yomphunda. Mahi nkhele kombanda yohi ankho kuna omaande omanyingi, ngotyo Noe no mbunga yae nkhele ankho kavapondola okutunda mowato.

Katutu-katutu, omaande aahimbika okutepuluka. Noe no mbunga yae avakala mokati kowato omuvo ulamba penima. Konyima, Jeova evepopila opo vatunde mowato avakala motyilongo tyimwe tyakala otyipe. Avapandula unene mokonda Jeova wevehupisa iya avalekesa okuti vapandula etyi valingila Jeova otyilikutila.

Jeova ahambukwa notyilikutila valinga. Jeova apopi okuti kamahanye vali ovipuka vikahi pohi nombila. Apakeko onkhongolo meulu ine omphumba, otyilekeso tyomphango alinga. Okuti nthiki imwe wamuene-ale onkhongolo ine omphumba?

Konyima Jeova apopila Noe no mbunga yae opo vakale novana iya avayulisa ohi.