Abraiau ankho ulongesa omona wae Isake okukala nohole na Jeova nokuyumba onthumbi momilao aviho via Jeova. Mahi etyi Isake ena omanima 25, Jeova aiti Abraiau alinge otyipuka tyimwe tyalema. Otyipuka patyi?

Huku wapopila Abraiau okuti: ‘Mbambavo pola omona wove iya enda komphunda ikahi kotyilongo tyo Moriaa kemulinge otyilikutila.’ Abraiau ankho ketyii omokonda yatyi Jeova emuitila okulinga ngotyo. Mahi no ngotyo etavela ku Jeova.

Etyi kuatya, Abraiau apopila Isake novaundapi vae vevali opo vende ko Moriaa. Etyi vaenda ononthiki ononthatu, omphunda aihimbika okumonekela kokule. Abraiau apopila ovaundapi vae okuti: Salei pano, ame na Isake matukalinga otyilikutila. Abraiau aavela Isake otyipandi tyo nonkhii atyinde. Isake apulu tate yae okuti: ‘Otyinyama matukalinga otyilikutila tyili-pi?’ Abraiau akumbulula okuti: ‘Mona wange, Jeova metyieta.’

Etyi vehika komphunda avatungu omutala wovilikutila. Pahe Abraiau ehimbika okukuta omakuvoko novikalo via Isake emulangeka kombanda yomutala.

Abraiau akuate onkhiki. Liwa-liwa eivi oandyu ya Jeova ihanena keulu okuti: ‘Abraiau! Uhaipae omona! Ame ndyityii okuti una ekolelo mu Huku mokonda uhanda okulinga otyilikutila omona wove.’ Abraiau amono ongi yaanyena motyinkhondo. Liwa-liwa akutulula Isake alingi ongi oyo otyilikutila.

Okuhimbikila monthiki oyo, Jeova aihana Abraiau okuti epanga liae. Ove utyii omokonda yatyi? Omokonda walinga etyi Jeova emuita namphila ankho ehetyii omokonda yatyi emuitila etyilinge.

Jeova apopila vali Abraiau okuti: ‘Ame mandyikuyambe okala novana ovanyingi.’ Otyo ankho tyihangununa okuti Jeova mayambe ovanthu aveho menyina liombunga ya Abraiau.