Jeova walaa Jako okuti memuyakulila ngetyi alingile Abraiau na Isake. Jako akakala kotyilongo tyimwe tyitiwa Harã iya ngako anepela, akala novana ovanyingi, tupu akala omuhona.

Etyi palamba omanima amwe Jeova apopila Jako okuti: ‘Kondoka kotyilongo tyo tate yove.’ Jako nombunga yae avahimbika okulinga oungendi. Etyi vekahi nokulinga oungendi, ovanthu vamwe aveya ku Jako iya avemupopila okuti: ‘Omukulu wove Esau ukahi nokuya novalume 400!’ Jako atili owoma asoko okuti Esau uhanda okumuluisa kumwe nombunga yae. Elikuambela ku Jeova ati: ‘Mbambavo ndyovole komukulu wange.’ Monthiki onkhuavo Jako atumikisa ku Esau onongi, no nongombe, no vinkhombo, no nonkhambe, novimbulu.

Kounthiki puetyi Jako ekahi aike, amono oandyu! Oandyu aihimbika okulwa nae. Avalala nokulwa alo kuatya. Namphila Jako atunguka, no ngotyo atualako okulwa. Oandyu aiti: ‘Ndyeke ndyende.’ Mahi Jako ati: ‘Au, hikuyeke alo undyavela ononkhano onongwa.’

Konyima oandyu ayaavela ononkhano onongwa Jako. Pahe, Jako ankho utyii okuti kapondola vali okutila owoma Esau.

Monthiki oyo, Jako amono Esau novalume 400 vekahi kokule. Jako apiti komutwe wombunga yae aikila  konongolo ovikando epandu-vali. Esau ahatekela ku Jako avelihumbakana. Avahimbika okulila iya avelievela pokati kavo apakala ombembwa. Utyivila okusoka oñgeni Jeova elitehelela tyina atala onkhalelo Jako atetulula otyitateka otyo?

Konyima, Esau akondoka keumbo liae iya Jako atualako okuenda kotyilongo tyo tate yae. Jako ankho una ovana 12. Omanyina avo oyaa: Rubem na Simeão na Levi na Juda na Dan na Naftali na Gade na Aser na Issacar na Zebulau na Jose na Benjamim. Umwe povana ovo, o Jose, una Jeova aundapesile opo ayovole ovanthu Vae. Ove utyii oñgeni alinga? Tutalei.