Etyi Isake anepa Rebeka ankho una omanima 40. Ankho uhole unene Rebeka. Mokueenda kuomuvo, avakala novana vevali—omapaha.

Omukulu watyo utiwa o Esau, iya omututu watyo utiwa o Jako. Esau ankho kakala meumbo, ankho utyihole tyokuyeva ovinyama. Mahi Jako ankho ukala meumbo.

Kohale, omona wotyiveli upewa ohika no nombongo tyina he amankhi. Ovipuka ovio apewa viihanwa okuti epingo. Mombunga ya Isake epingo ankho muakutikinya ononkhano onongwa Jeova apopilile Abraiau. Esau ankho kesukile nomilao ovio, mahi Jako wesukile navio mokonda ankho utyii okuti viakolela unene.

Onthiki imwe, Esau akayeva etyi ehika meumbo ankho waponua unene. Weiva okulia kuanika Jako ateleka, apopi okuti: ‘Naliwa unene nondyala! Mphevo okulia!’ Jako emupopila okuti: ‘Mankhuavela, mahi tete mphopile okuti momphe epingo liove.’ Esau ati: ‘Ame hesukile nepingo liange! Lipondola okukala liove. Etyi nahanda vala okulia.’ Ove usoka okuti etyi Esau alinga tyaviuka? Au, katyaviukile. Esau wakumana otyipuka tyakolela nokulia.

Etyi Isake akulupa, aimbuka okuti omuvo wokuavela ononkhano onongwa omona wae wotyiveli. Mahi Rebeka akuatesako Jako, omona uhetyiveli, ngae wavelua  ononkhano onongwa. Etyi Esau etyinoñgonoka, anumana unene ahande okuipaa ondenge yae. Isake na Rebeka avayakulila Jako, avemupopila okuti: ‘Enda kakale ku Labau, omphange ya me yove, alo Esau atula onyengo yae.’ Jako etavela etyi apopilwa na tate yae aende opo ahupise omuenyo wae.