Moisesi na Arau vakapopila Farao onondaka mba Huku mbati: ‘Inkha kuyeke ovanthu vange vaye, mandyieta-ko ononyiki mbumwe ononene motyilongo.’ Ononyiki ononyingi ambunyingila monondyuo mbo va Egitu, tyilinge monondyuo mbovahona ine mba vana vahepa. Otyilongo atyiho atyiyula ononyiki. Mahi pohika ankho pakala ova Isilayeli, patiwa Gosen peputu ononyiki. Okuhimbikila pehingano lia kuana omakuavo alandula-ko amonesile vala ononkhumbi ova Egitu. Farao akumbulula okuti: ‘Ita ku Jeova opo atalameke ononyikiki ombu. Opo ovanthu vae vaye.’ Mahi etyi Jeova atalameka ononyiki, Farao apilulula olusoko lwae. Mahi okuti Farao una etyi elilongesila-ko?

Jeova apopi okuti: ‘Ankho Farao kayeke ovanthu vange ovipako viavo aviho mavivele avinkhi.’ Monthiki onkhuavo, ovipako aviho avinkhi. Mahi ovipako vio va Isilayeli avihankhi. No ngotyo, Farao aanye okuyeka ova Isilayeli vaye.

Jeova apopila Moisesi akondoke ku Farao emupopila okuti tyina wamehiki-ko pola etwe mofolono oliyumbu peulu. Eulu aliho mo Egitu maliyula ombuma. Tyina ombuma ihimbika okutepuluka ovanthu aveho mo Egitu novinyama avakala novipute. No ngotyo Farao ahayeke ova Isilayeli vaye.

Jeova atumu vali Moisesi ku Farao. Moisesi apopi okuti: ‘Ove nkhele kuhande okuyeka ovanthu  vange? Muhuka, mandyilokesa ombila yomamanya mo Egitu.’ Monthiki onkhuavo Jeova aetako ombila imwe onene mo Egitu yeya nomamaya omanene nomitetanena. Omiti aviho avihanyua-po, akuhupu vala vio ko Gosen. Farao apopi okuti: ‘Tolela Jeova opo atalameke ombila! Mupondola okuenda.’ Mahi etyi ombila yatalama, Farao apilulula olusoke lwae.

Moisesi ati: ‘Omiti aviho viahahayenwe nombila maviliwa novimphunia.’ Moluotyo, mo Egitu amuya ovimphunia ovinyingi avili-po omiti aviho viahupile kombila. Farao apopi okuti: ‘Tolela Jeova opo apole-mo ovimphunia evi.’ Mahi Jeova evitalameka, Farao no ngotyo ahapiluluka.

Jeova atolela Moisesi okuti: ‘Yelula omakuoko ove no peulu.’ Liwa-liwa etyi etyilinga akunthikovela. Ova Egitu avakala ononthiki ononthatu otyo vahamono natyike. Ova Isilayeli vala ankho vena otyimimi po nondyuo mbavo.

Farao apopila Moisesi okuti: ‘Ove novanthu vove mupondola okuenda. Mahi ovipako vienyi visale.’ Moisesi ati: ‘Ovinyama vietu tuna okuenda navio, matukalinga ovilikutila Huku yetu.’ Farao anumana unene. Apopi okuti: ‘Tundei ponthele yange! Tundei pano, ankho mukondoka vali mandyimuipaa.’