Motyilongo tyo Uz, ankho mukala omulume umwe uumbila Jeova. Enyina liae o Job. Ankho omuhona iya tupu ankho una ombunga onyingi. Ankho una okankhenda nokukuatesako ovahepi, ovakai vasiwapo novalume vavo, novana vehena ovohe. Mahi okuti mokonda ankho omuviuki, okuti Job nalumwe akalele novitateka?

Job ankho ketyii okuti Satanasi Eliapu ukahi nokuovola ononkhalelo mbo kumuyondya. Jeova apopila Satanasi okuti: ‘Uluete omuumbili wange Job? Petupu omunthu ukahi ngae pano pohi. Unthehelela tupu ulinga etyi tyaviuka.’ Satanasi akumbulula okuti: ‘Tyotyili Job utavela kuove. Mokonda ove umuamena nokumuavela ononkhano onongwa. Wemuavela otyilongo novinyama. Mupola ovipuka aviho tutale inkha kamayekepo okukuumbila.’ Jeova apopi okuti: ‘Upondola okulola Job. Mahi himayeke umuipae.’ Omokonda yatyi Jeova ayekela Job alolwe na Satanasi? Mokonda ankho una onthumbi yokuti Job matualako nekolelo.

Satanasi ahimbika okulola Job novipuka ovinyingi ovivi. Tete wavakesa ovipako via Job. Konyima apamoneka otupia atuyoko onongi mba Job. Ovimphulu ovikuavo avivake omakamelu a Job. Ovaundapi va Job ankho vayunga ovipako navo avankhi. Konyima akumoneka otyipuka tyalema unene pala Job. Ovana vae ankho vekahi motyipito avatokelwa nondyuo avankhi. Job aihamenwa unene, mahi nongotyo ahayekepo okuumbila Jeova.

Satanasi wahandele Job amone vali ononkhumbi, ngotyo atumbisa ovinthimba molutu aluho lwa Job.  Iya akala novipute viihama unene. Ankho ketyii omokonda yatyi ovipuka ovio vimonekela. Mahi no ngotyo Job ahayekepo okukala epanga lia Jeova. Huku amono ovipuka ovio aviho tupu ahambukwa unene na Job.

Satanasi ahindila ovalume vetatu opo valole Job. Avemupopila okuti: ‘Tyipondola walinga onkhali oiholeka. Otyo Huku ekahi nokukumonesila ononkhumbi.’ Job ati: ‘Ame halingile natyike tyapenga.’ Mahi Job ahimbika okusoka okuti o Jeova ukahi nokumumonesa ononkhumbi, otyo apopila okuti katyaviukile Huku andinge ngotyo.

Omukuendye umwe utiwa o Eliuu ankho ukahi vala nokutehelela etompho. Konyima apopi okuti: ‘Atyiho muapopia katyaviukile. Jeova usoka vali nawa tyipona onthue. Kaetela ovitateka ovanthu. Utala ovipuka aviho tupu ukuatesako ovanthu movitateka viavo.’

Konyima Jeova apopila Job, okuti: ‘Opi ankho ukahi etyi natunga eulu nohi? Omokonda yatyi usokela okuti hikahi nokukulinga etyi tyaviuka? Ove wapopia vala, mahi kutyi omokonda yatyi ovipuka ovio vikahi nokumoneka.’ Job etavela oviponyo viae, apopi okuti: ‘Ame napengesa. Ame neiva konthele yove mahi pahe ndyikwii. Petupu otyipuka uhevili okulinga. Otyiponyo mokonda yetyi napopia’.

Etyi ovitateka viapwa, Jeova ahakula Job iya emuavela ovipuka viapona puevi ankho ena kohale. Job wakaleleko vali ehimbwe nehambu. Jeova emuavela ononkhano onongwa mokonda Job wemutavela namphila amoneswa ononkhumbi. Okuti noove motualako okuumbila Jeova namphila una ovitateka?