Jose o umwe povana ovatutu va Jako. Ovakulu vae vaimbuka okuti Jose ankho uholwe unene na tate yavo. Ove utyii oñgeni tyevekalesa? Avahimbika okukala nonkhi na Jose iya avemuyale. Monthiki imwe Jose aloto onondyoi imwe iheiwe. Etyi etyipopila ovakulu vae, avasoko okuti ondyoi oyo ihangununa okuti Jose nthiki imwe mevetumina. Pahe ovakulu vae avemuyale vali unene!

Onthiki imwe ovakulu va Jose avakalisa onongi popepi nepunda-umbo lio Sikem. Jako atumu Jose akatale oñgeni ovakulu vae vekahi. Etyi vamona Jose ukahi nokuya avahimbika okulipopila okuti: ‘Wonondyoi ukahi nokuya. Tumuipaei!’ Avemukuate avemuyumbu monyombo yaya kohi. Mahi Juda umwe povakulu vae ati: ‘Tuhemuipaei! Tumulandesei akale omupika.’ Avalandesa Jose no nombongo 20 konongendi ankho vekahi nokuenda ko Egitu.

Konyima, ovakulu va Jose avankhinkhi otyikutu tyae mohonde yotyinkhombo, avetyituala ku tate yae, avapopi okuti: ‘Etyi ha tyikutu tya Jose?’ Jako asoko okuti Jose waipawa notyinyama. Jako anumana unene. Petupu ou ankho upondola okumukengelela.

Mo Egitu, Jose alandeswa akala omupika womutumini umwe wankhimana utiwa Potifale. Mahi Jeova ankho ukuatesako Jose. Potifale aimbuka okuti Jose uundapa nawa tupu upondola okuyumbwa onthumbi. Pakala vala katutu Jose apewa otyilinga na Potifale tyokuyunga ovipuka viae.

Omukai wa Potifale amono okuti Jose omuwa unene.  Ononthiki ambuho ankho umuita alale nae. Oityi Jose alinga? Aanye tupu ati: ‘Au! Otyo tyapenga. Omuhona wange undyumba onthumbi iya ove umukai wae. Inkha ndyilala nove, mandyilingi onkhali ku Huku!’

Onthiki imwe omukai wa Potifale ahande okukuata Jose kononkhono opo alale nae. Wakuata movikutu viae, mahi Jose akahateka. Etyi Potifale eya meumbo, omukai wae ati Jose ankho uhanda okunkhuata. Ahapopi otyili. Potifale anumana unene, apake Jose mokaleya. Mahi Jeova kalimbilwe Jose.