Palambale omanima 40 otyo ova Isilayeli vekahi moluhandya. Ova Isilayeli ankho vatambulale omapunda-umbo omakuavo apama. Pahe, ankho vatula momaluhandya popepi notyilongo tyitiwa Moabe koutundilo wo Ndongi Jordau, omuvo wehikapo wokunyingila Motyilongo Valaelwe. Balake, ohamba yo Moabe, atili owoma wokuti mavapolwa otyilongo tyavo. Atumu omulume umwe utiwa Balaau opo aye ko Moabe akahingane ova Isilayeli.

Mahi Jeova apopila Balaau okuti: ‘Uhakahingane ova Isilayeli.’ Balaau anye okuenda-ko. Ohamba Balake aimuihana otyikando tyavali iya ailae okumuavela ovipuka aviho ahanda. No ngotyo, Balaau aanye okuenda. Konyima Huku apopi okuti: ‘Upondola okuenda, mahi kapopie vala etyi mandyikutumu.’

Balaau avelama kotyimbulu tyae ehimbika okuenda ko Moabe. Mahi asoko okuhingana ova Isilayeli, namphila Jeova emupopila okuti uhevehingane. Puetyi alinga oungendi Jeova atumu oandyu ovikando vitatu. Otyimbulu ankho tyiete Oandyu, mahi Balaau ankho keyeete. Tete, otyimbulu tyatunda metapalo atyiviuku mofika. Konyima, otyimbulu atyilitutuminya motyimato tyo mamanya iya otyikalo tya Balaau atyiominiyua motyimato. Okuhulila-ko, otyimbulu atyilangala-po metapalo. Ovikando ovio aviho Balaau ankho uveta embulu notyimuti tyae.

Konyima yovikando vitatu, Jeova alingi ehuviso embulu alipopi. Otyimbulu atyipulu Balaau okuti: ‘Omokonda yatyi umbetela?’ Balaau apopi okuti: ‘Mokonda ukahi nokunkhundisa. Inkha nali nomutunga ñgeno nekuipaa.’ Otyimbulu atyipopi okuti: ‘Ove wavelama kuame omanima omanyingi. Okuti nthiki imwe nalingile-ale ñga?’

Konyima Jeova aikula omaiho a Balaau, pahe Balaau amono oandyu. Oandyu aipopi okuti: ‘Jeova wekupopila opo uhahingane ova  Isilayeli.’ Balaau apopi okuti: ‘Napengesa. Mandyikondoka keumbo.’ Mahi oandyu aimupopila okuti: ‘Ove upondola okuenda ko Moabe, mahi kapopie vala etyi Jeova ekupopila ulinge.’

Okuti Balaau una etyi elilongesila-ko? Au. Konyima otyo, Balaau wahetekela okuhingana ova Isilayeli ovikando vitatu, mahi mu kese tyikando Jeova atumu Balaau aavele ononkhano onongwa ova Isilayeli. Konyima, etyi ova Isilayeli valwa nova Moabe, Balaau aipawa. Okuti inkha Balaau wetavelele tete ku Jeova ñgeno wankhile?