Monohanyi onombali tunde etyi ova Isilayeli vatunda ko Egitu, avehiki Komphunda Sinai avakala-ko omuvo umwe. Jeova apopila Moisesi alonde komphunda Sinai emupopila okuti: ‘Ame nayovola ova Isilayeli. Inkha vatualako okutavela nokulandula ovitumino viange, mavakala ovanthu vange napanda unene.’ Moisesi atundu komphunda akatolela ova Isilayeli etyi Jeova emupopila. Utyii oñgeni vakumbulula? Avakumbulula okuti: ‘Matulingi ovipuka aviho Jeova etutuma.’

Moisesi akondoka vali komphunda. Komphunda Jeova emupopila okuti: ‘Mandyipopi noove tyina pamalambe ononthiki ononthatu. Popila ova Isilayeli vahalonde Komphunda Sinai.’ Moisesi atuluka komphunda akapopila ova Isilayeli opo vatehelele Jeova.

Etyi palamba ononthiki ononthatu, ova Isilayeli avamono ekaka limwe enthikovei liahika omphunda. Tupu aveivi omitetanena no nonkhuino. Konyima avamono otupia tuatunda ku Jeova tuatokela komphunda. Ova Isilayeli avatili unene owoma. Omphunda aiho aihimbika okuteketa, aihikwa nomuihi. Omuyuelo wonkhuino auliyawisa vali unene. Iya Huku apopi okuti: ‘Ame Jeova. Onwe kamupondola okufenda huku omukuavo.’

Moisesi alondo vali komphunda Sinai iya Jeova emuavela ovitumino vipopia oñgeni ovanthu vena okumufenda novipuka vena okulinga nevi vahapondola okulinga. Moisesi ahoneka ovitumino ovio eya okuvitangela ova Isilayeli. Ova Isilayeli avapopi okuti: ‘Matulingi ovipuka aviho Jeova etutuma.’ Ngotyo valinga omulao ku Huku. Mahi okuti vatuaileko okulinga etyi vapopia?