Jeova wapopila Moisesi okuti: ‘Londa komphunda. Mandyihoneka ovitumino viange komamanya iya andyikuavela vio.’ Moisesi alondo komphunda akala-ko ovitenya novinthiki 40. Puetyi Moisesi eli komphunda, Jeova ahoneka Ovitumino Ekwi komamanya evali iya eviavela Moisesi.

Etyi palamba omuvo umwe, ova Isilayeli avasoko okuti Moisesi keya vali. Avapopila Arau okuti: ‘Tuesukisa omunthu umwe utuhongolela. Tulingile otyilolo!’ Arau evepopila okuti: ‘Mphei olu.’ Eiyoko alingi nayo otyilolo tyonthane. Ovanthu avapopi okuti: ‘Otyilolo etyi o Huku yetu wetupola ko Egitu!’ Avahimbika okutyifenda nokulinga otyipito. Okulinga ngotyo ankho tyapenga? Enga, mokonda ova Isilayeli ankho valinga omulao wokufenda vala Jeova. Mahi pahe kavatuaileko okulinga ngetyi valaa.

 Jeova wamona etyi tyikahi nokueendapo iya apopila Moisesi okuti: ‘Lauka, enda kova Isilayeli. Kavetavelele vekahi nokufenda huku yomatutu.’ Moisesi atundu komphunda, nomamanya evali.

Etyi afuenako, Moisesi eivi ovanthu vekahi nokuimba. Konyima evemono vekahi nokunyana ponthele yotyilolo. Moisesi anumana unene. Ayumbuhi omamanya atyatyuka. Moisesi apulu Arau okuti: ‘Omokonda yatyi wayekela ovanthu vekuhongiliye okulinga otyipuka etyi tyapenga?’ Arau apopi okuti: ‘Wahanumane. Ove wii nawa ovanthu ava. Ankho vahanda otyikahuku avandyetela olu andyiyoko andyilingi otyilolo!’ Arau ankho upondola okuhetyilingi. Moisesi akondoka komphunda aiti ku Jeova opo aevele ova Isilayeli.

Jeova aevela vana ankho vahanda okumutavela. Ove waimbuka omokonda yatyi ankho ova Isilayeli ankho vesukisa ehongolelo lia Moisesi?