Omu Isilayeli umwe utiwa o Elkana ankho una ovakai vevali, Ana na Penina, mahi ankho uhole vali Ana. Penina ankho apeho ulinga omukuele Ana mokonda Ana utupu ovana iya Penina ankho una ovana ovanyingi. Omanima aeho, Elkana ankho utuala ombunga yae ko Siloo kekaka liefendelo. Monthiki imwe etyi vekahi ko Siloo Elkana aimbuka okuti Ana wanumana unene. Emupopila okuti: ‘Ana mbambavo uhalile. Ove una ame. Ame ndyikuko le.’

Mahi, Ana nkhele ankho wanumana aende opo ekelikuambele. Ana otyo alila aiti Jeova emukuateseko. Apopi okuti: ‘Jeova ankho umpha omona, makala wove opo ekuumbile mokue enda kwo muenyo wae auho.’

Omunene Nakwa, Eli, wamona Ana ukahi nokulila, asoko okuti wakolua. Ana emupopila okuti: Au, ‘tatekulu ame hakolelwe. Ame ndyina ovitateka ovinyingi, iya neya okuvipopila Jeova.’ Eli aimbuka okuti etyi apopia katyaviu kile apopi okuti: ‘Huku ekuavele etyi uhanda.’ Ana elitehelela nawa aende. Pakala vala katutu, Ana akala nomona emuluku okuti o Samuele. Upondola okusoka ehambu Ana akalele nalio?

 Ana kalimbuile-ko etyi apopila Jeova. Etyi Samuele apolwa akupulwa ine ahanyame vali, Ana emutuala kekaka liefendelo. Atolela Eli okuti: ‘Omona naita melikuambelo oyou. Maumbila Jeova ononthiki ambuho.’ Elkana na Ana ankho vakatalelapo Samuele omanima aeho otyo vemutuaila ovikutu ovipe. Jeova aavela vali Ana ovana vetano.