Etyi ova Isilayeli vayekapo vali okufenda Jeova avahimbika okufenda ovikahuku vio matutu. Mokueenda kuomanima epandu-vali, ova Midiaa ankho vavaka ovipako vio va Isilayeli nokuhanyauna omapia avo. Ova Isilayeli ankho vawela owoma ova Midiaa, avakaholama momaleva no monomphunda. Avaiti ku Jeova opo eveyovole. Moluotyo, Jeova atumu oandyu ko mukuendye umwe utiwa o Gideau. Oandyu aimupopila okuti: ‘Jeova wekukoya opo uyovole ova Isilayeli.’ Gideau ati: ‘Oñgeni ame ndyipondola okuyovola ova Isilayeli? Ame amelie.’

Oñgeni Gideau aimbuka okuti wakoyua umwe na Jeova? Apake otyinyanga pohi iya elikuambela ku Jeova okuti: ‘Inkha muhuka otyinyanga tyitalala mahi pohi apakukuta mandyitavela okuti ove uhanda ndyiyovole ova Isilayeli.’ Onthiki onkhuavo otyinyanga atyitalala mahi pohi apakukuta! Mahi Gideau aiti vali okuti komuhuka, nahanda pohi patalale, otyinyanga atyikukuta. Etyi otyo tyamoneka Gideau anoñgonoka okuti tyili-tyili wakoyua umwe na Jeova. Aongiya omafualali ae opo vakalwe no va Midiaa.

 Jeova apopila Gideau okuti: ‘Ame mandyikuatesako ova Isilayeli opo vafinde. Mahi mokonda muatyinda omafualali omanyingi mupondola okusoka okuti muafinda kononkhono mbenyi. Popila aveho vatila owoma vakondoka komaumbo avo.’ Konyima omafualali 22.000 akondoka keumbo, apesala 10.000. Jeova evepopila okuti: ‘Nkhele pena omafualali omanyingi. Vetuala kondongi ovepopila vanwe omaande. Enda vala kovilwa na vana vanwa otyo vatala konondyale mbavo.’ Ovalume 300 ovo vala vanwa ngotyo. Jeova alae okuti ovanthu ovo vehehi mavafindi omafualali 135.000 ova Midiaa.

Motyinthiki otyo, Jeova atolela Gideau okuti: ‘Omuvo wokuluisa ova Midiaa wehikapo!’ Gideau aavela omafualali ae ononkhuino no nonthenda muna oviihi. Gideau evepopila okuti: ‘Talei nawa etyi mandyilingi iya nonwe ngatyo mulinga.’ Gideau ahiki onkhuino iya atyatyula onthenda, iya afuku otyihihi eliyavelela peulu okuti, ‘omutunga wa Jeova no wa Gideau!’ Iya ovalume 300 ngatyo valinga. Ova Midiaa avawele ouoma avakahateka. Mokonda valimbililwa, avahimbika okuliipaa poyavo. Iya Jeova akuatesako vali ova Isilayeli okufinda onondyale mbavo.