Omunene Nakwa Eli ankho una ovana vevali vaundapa ngo vanakwa mekaka liefendelo. Ankho vatiwa o Hofni na Fineia. Ankho kavetavela ovitumino via Jeova tupu ankho valinga onya ovanthu. Tyina ova Isilayeli valinga oviawa viavo ku Jeova Hofni na Fineia ankho velipolela-ko ohitu ikahi vali nawa. Ovanthu ankho vapopila Eli etyi ovana vae valinga, mahi ehesuku natyo. Okuti Jeova mayeke ovipuka vitualeko ngotyo?

Namphila Samuele ankho omona vali ku Hofni na Fineia, mahi ankho kevehetekela. Jeova ahambukwa unene na Samuele. Onthiki imwe kounthiki puetyi Samuele elele eivi ondaka imuihana. Akahateka no ku Eli iya ati: ‘Ame uno!’ Mahi Eli ati: ‘Ame hekuihanene. Enda kalangale-po.’ Samuele akalangala-po. Aihanwa vali. Etyi Samuele etyiiva otyikando tya tatu, Eli aimbuka okuti o Jeova ukahi nokuihana Samuele. Eli apopila Samuele okuti tyina wamaihanua vali popia okuti: ‘Popia Jeova. Omuumbili wove ukuivite.’

Samuele akalangalapo vali. Konyima aihanwa vali: ‘Samuele! Samuele!’ Samuele akumbulula okuti: ‘Popia omuumbili wove ukuivite.’ Jeova emupopila okuti: ‘Popila Eli okuti mandyimuhitisa kumwe nombunga yae. Eli ankho wanoñgonoka etyi ovana vae vekahi  nokulinga mekaka liefendelo, mahi ehesuku natyo.’ Etyi kuatya Samuele akaikula ekaka liefendelo ngetyi ankho alingale. Samuele ankho watila owoma okupopila omunene-nakwa etyi Jeova emupopila. Mahi Eli aihana Samuele, emupopila okuti: ‘Mona wange, oityi Jeova ekupopila? Mphopile atyiho.’ Moluotyo, Samuele apopila Eli atyiho apopilwa.

Mokueenda kuo muenyo wa Samuele Jeova apeho ankho umukuatesako. Ovanthu vo movilongo ovikuavo no va Isilayeli ankho vetyii okuti Jeova waholovona Samuele opo akale omuuli nomukoyesi.