Moisesi wahongolela ova Isilayeli omanima omanyingi, iya pahe ankho uhungi kononkhia. Jeova emupopila okuti: ‘Ove haveko motuala ova Isilayeli mo Otyilongo Valaelwe. Mahi mankhuyeke utyitalele vala kokule.’ Moisesi aiti Jeova opo aholovone omunthu omukuavo ahongolele ovanthu. Jeova emupopila okuti: ‘Enda ku Josue, mupopila okuti oe naholovona.’

Moisesi apopila ova Isilayeli okuti mankhi iya Jeova waholovona Josue opo evetuale mo Tyilongo Mualawa. Moisesi apopila Josue okuti: ‘Uhatile owoma. Jeova mekukuatesako.’ Konyima Moisesi alondo Komphunda itiwa Nebo, ngako Jeova emulekisila otyilongo alaele okuavela Abraiau na Isake na Jako. Moisesi ankho una omanima 120 puetyi ankhia.

Jeova apopila Josue okuti: ‘Yauka Ondongi Jordau enda no ko Kanaa. Ame mankhukuatesako ngetyi nakuatesako Moisesi. Opo ukale tyapama tanga apeho Ovitumino viange. Uhakale nowoma. Kala tyapama. Enda, iya linga atyiho nekutuma.’

 Josue atumu ovalavi vevali mepunda-umbo lio Jerikoo. Mehipululo malilandulako matulilongesa vali konthele yetyi tyaendelepo. Etyi ovalavi vakondoka avapopi okuti ou omuvo ukahi nawa opo tunyingile mo Kanaa. Onthiki onkhuavo Josue apopila ova Isilayeli opo velipongiye. Ovanakwa avatyindi otyikasa tyomphango avapiti komutwe opo vayauke Ondongi Jordau. Avamono okuti ondongi yeyula. Okuyauka tyipondola okukala otyiponga. Mahi etyi ovanakwa valiata mondongi omaande akukuta! Ovanakwa avaende alo pokati ko ndongi avakevelela ova Isilayeli vayauke. Okuti ehuviso olio lia sokesa ova Isilayeli kuetyi Jeova alingile Melunga Enkhuhu?

Konyima, etyi omanima oo aeho alamba ova Isilayeli avanyingila Motyilongo Valaelwe. Ankho vapondola okutunga onondyuo nomapundaumbo. Vapondola okutuika omiti vahanda. Ankho otyilongo tyimwe tyiyela ovikuna, tupu tyina omahini nowiki.