Jeova apopila Samuele okuti: ‘Enda keumbo lia Jesse. Umwe povana vae makala ohamba yo Isilayeli.’ Samuele aende keumbo lia Jesse. Povana va Jesse, etyi Samuele amona omukulu watyo, asoko okuti: ‘Omukuendye oyou.’ Mahi Jeova apopila Samuele okuti haeko. Jeova apopi okuti: ‘Ame ndyitala komutima womunthu, hitale kolupe mahi ndyitala mokati.’

Jesse aeta vali ovana vae epandu ku Samuele. Mahi Samuele apopi okuti: ‘Jeova utupu ou aholovona-po. Okuti una vali omona omukuavo?’ Jesse ati: ‘Ndyina vali omukuavo, omututu watyo utiwa David. Wakalisa onongi mbange.’ Etyi David eya, Jeova apopila Samuele okuti: ‘Oyou!’ Samuele apolo omulela eunengulila komutwe wa David, otyilekeso tyokuti wemulembula akale ohamba yo Isilayeli.

Etyi palamba omanima amwe, ova Isilayeli avakalwa no va Filisteu, iya ova Filisteu ankho vena efualali limwe enene litiwa Goliya lieya okulwa nova Isilayeli. Ononthiki ambuho Goliya ankho uleva ova Isilayeli. Ankho upopia okuti: ‘Etei omulume eye okulwa naame. Inkha ndyitilako matukala ovapika venyi. Mahi inkha utilako, onwe mamukala ovapika vetu.’

David atuaila okulia ovakulu vae ankho vekahi kovilwa. Eivi Goliya ukahi nokuleva ova Isilayeli, David apopi okuti: ‘Ame mandyikalwa nae!’ Ohamba Saulu aipopi okuti: ‘Mahi ove umona.’ David akumbulula okuti: ‘Jeova mankhuatesako.’

 Saulu aiti David avale omuvalo wae woufualali, mahi David aanye: ‘Ame himetyivili okulwa novikutu evi.’ David apolopo otyifuta tyae aende. Akoyo omamanya etano eepake motyipapo tyae. Konyima David ahatekela ku Goliya. Goliya apopi okuti: ‘Omako kamukuendye. Mandyikutyitula okulia kuoviila novinyama.’ David ahawele owoma. Akumbulula okuti: ‘Ove moya nokuame nomutunga neonga, mahi ame mandyiya menyina lia Jeova. Ove kukahi nokulwa nonthue, ukahi nokulwa na Huku. Ovanthu aveho vekahi pano mavetyimono okuti Jeova una vali epondolo tyipona omutunga ine eonga. Metukuatesako okukuluisa.’

David apake emanya motyifuta tyae atongo no nonkhono ononene. Mokonda Jeova wemukuatesako, emanya alivete mombamba ya Goliya alinyingila. Goliya atokela pohi. Ova Filisteu avakahateka. Okuti noove uyumba onthumbi mu Jeova, nga David?