Etyi David aipaa Goliya, Ohamba Saulu aipake David akale omutumini womafualali ae. David wafinda ovilwa ovinyingi iya akala nomunkhima omunene. Alo umwe ovakai avaimbi okuti: ‘David wevilapo vali tyipona Saulu!’ Saulu anumana unene na David aovola okumuipaa.

Onthiki imwe David ankho ukahi nokuhika ehumba. Saulu emutongo neonga David ayakula. Konyima Saulu aovola ononkhalelo ononkhuavo opo aipae David. Mokonda yotyo David akaholama moluhandya.

Saulu aholovona ovalume 3.000 opo vakaovole David. Saulu anyingila meleva omu muaholama David novanthu vae. Ovanthu va David avapopi okuti: ‘Ei omphitilo una yokuipaa Saulu.’ David ayombela alo pu Saulu atete kotyikutu  tyae. Saulu ehetyiivi. David elitehelela omapita, mokonda kalekesile onthilo nohamba Jeova aholovona. David ahayeke ovanthu vae vaipae Saulu. Alo umwe aihana Saulu apopi okuti ame ankho ndyina omphitilo yokukuipaa Saulu mahi hetyilingile. Okuti otyo tyapilululile onkhalelo Saulu ankho atala David?

Au. No ngotyo Saulu watuaileko nokuovola David. Motyinthiki tyimwe David notyimphumba tyae Abisai avanyingila monthanda ya Saulu. Alo umwe Abner ñgeno ankho waamena ohamba nae ankho ulele, Abisai ati: ‘Eli elao lietu! Ndyeke ndyimuipae.’ David emupopila okuti: ‘Jeova oe muene maipaa Saulu. Tutyinde-po vala omutunga wae nonthenda yae yomaande, tuende.’

David avalondo komphunda ikala popepi nonthanda. Aihanena peulu ati: ‘Abner omokonda yatyi wahayungile ohamba yove? Onthenda yae neonga liae vilipi?’ Saulu aimbuka ondaka ya David, ati: ‘Ove ankho upondola okundyipaa, mahi kuetyilingile. Pahe ndyityii okuti mokala ohamba yavali yo Isilayeli.’ Saulu akondoka nokeumbo liae. Mahi ovanthu vamwe vo mombunga ya Saulu ankho vehole David.