Tyina ukahi pondyanena yondyuo Yohamba ko Jezileele, epia lia Nabote ankho limoneka. Akabe ankho uhole unene epia liomivinyu lia Nabote iya ankho uhanda okulilanda-po. Mahi Nabote aanye okulandesa epia liae, mokonda ankho tyailikwa Novitumino via Jeova. Okuti Akabe wakalele nonthilo na Nabote mokonda wetavela ovitumino? Au. Akabe anumana unene. Anumana unene alo aanyena mokati kondyuo tupu aanye okulia.

Omukai wa Akabe ondingavivi, Onkhai-hamba Jezabele, emupopila okuti: ‘Ove uhamba yo Isilayeli. Ove upondola okulinga etyi uhanda. Ame mandyikuovolela epia.’ Ahonekela omukanda ovakulu vo mepunda-umbo, evepopila opo vatendeleye Nabote okuti wapopia omapita Huku, tupu opo vemuipae nomamanya. Ovakulu avalingi ngetyi Jezabele evetuma iya Jezabele atolela Akabe okuti: ‘Nabote wankhia. Pahe upondola okukala nepia liae.’

Nabote ha munthu wotete Jezabele aipaa. Waipaa-le ovanthu ovanyingi vehole Jeova. Ankho ufenda ovilolo nokulinga ovipuka ovikuavo ovivi. Jeova ankho weete ovipuka ovivi ovinyingi Jezabele alinga. Oityi malingi?

Etyi Akabe ankhia, omona wae Jeorau akala Ohamba. Jeova atumu omulume umwe utiwa o Jeú opo aipae Jezabele nombunga yae.

Jeu avelama kokatemba kae kovita aende no ko Jezileele, kuna kukala Jezabele. Jeorau tupu avelama kokatemba kae awanena na Jeu iya emupulu okuti: ‘Ombembwa vala?’  Jeu ati: ‘Au tutupu ombembwa mokonda me yove Jezabele, utualako okulinga ovivi.’ Jeorau ahetekela okuenda nkholo nokatemba kae. Mahi Jeu emuyahe nohevo ankhi.

Iya Jeu aende nokeumbo lia Jezabele. Etyi Jezabele etyiiva okuti Jeu ukahi nokuya elifiwisua nawa emukevela pondyanena. Etyi Jeu ehika Jezabele ahimbika okumupopia omapita. Jeu atumu ovaundapi vae vekahi ponthele yae okuti: ‘Mukunyuninei pondyanena!’ Avemukunyunina pondyanena atokela pohi ankhi.

Konyima, Jeu aipaa ovana 70 va Akabe amaneko efendelo lia Baale. Utyivila okuimbuka okuti, Jeova wii ovipuka aviho iya momuvo waviuka, umana-ko vana valinga ovivi?