Omihoko ekwi vio Isilayeli viakalele no nohamba ononyingi onondingavivi, mahi Akabe ankho wavilapo vali. Wanepele omukai ondingavivi ankho ufenda otyihuku Baale. Enyina liae litiwa o Jezabele. Akabe na Jezabele vahindilile ovanthu ovanyingi okufenda Baale tupu avatumu okuipaa ovauli va Jeova. Oityi Jeova alinga? Watuma onondaka komuuli Eliya opo embupopile Akabe.

Eliya atolela Ohamba Akabe okuti mokonda yovivi walinga, ombila kamailoko mo Isilayeli. Ombila ayahaloko umwe mokueenda kuomanima etatu, amukala ondyala. Konyima Jeova atumu Eliya akondoke vali ku Akabe. Ohamba aipopi okuti: ‘walinga omapita! Ovipuka evi vikahi nokumoneka mokonda yove.’ Eliya akumbulula okuti: ‘Ame hameko naeta ovitateka evi. Ove wahindila ovanthu okufenda Baale. Tutalei olie Huku yotyotyili. Tuongiyei ovanthu novauli va Baale Komphunda Karmelu.’

Ovanthu aveho avaende komphunda Karmelu. Eliya apopi okuti: ‘Onwe muna okuholovona ou muna okufenda. Inkha Jeova o Huku yotyotyili mulandulei. Inkha o Baale, tupu mulandulei. Pahe tutalei olie Huku yotyotyili. Ovauli va Baale 450 vapongiye otyilikutila avaihana huku yavo. Iya ame mandyilingi otyilikutila andyiihana Jeova. Una matumu otupia kotyilikutila o Huku yotyotyili.’ Ovanthu avetavela etyi apopia.

Ovauli va Baale avapongiya otyilikutila. Mokueenda kuonthiki aiho otyo vaihana huku yavo okuti: ‘Baale, tukumbulule!’ Mokonda Baale kekahi no kuvekumbulula, Eliya ehimbika nokuveyola. Apopi okuti: ‘Ihanenei peulu, hamwe ulele. Wesukisa okupahuluapo.’ Akuhimbika okunthikovela, ovauli va Baale avatualako nokuihana. Mahi otyo vahakumbululwa.

Eliya apake otyilikutila tyae komutala iya apakeko omeva. Elikuambela okuti: ‘Jeova, mbambavo nahanda ovanthu ava vanoñgonoke okuti ove Huku yotyotyili.’ Liwa-liwa Jeova atumu otupia atuyoko otyilikutila. Ovanthu avapopila  peulu okuti: ‘Jeova o Huku yotyotyili!’ Eliya apopi okuti: ‘Ipaei ovauli aveho va Baale!’ Monthiki oyo, ovauli va Baale 450 avaipawa.

Etyi Eliya amona ekaka atolela Akabe okuti: ‘Kuna nokuya ombila onene. Hateka pongiya okatemba kove enda keumbo.’ Eulu alikala nomakaka omanthikovei akufili omphepo imwe onene ombila aihimbika okuloka. Akabe alondo kokatemba kae ekehatekesa unene. Mokonda Jeova wakuatesako Eliya, ahateka alambe-po okatemba ka Akabe! Okuti ovitateka via Eliya viatepulukile? Tutalei.