Etyi ankho Salomau etavela ku Jeova, mouhamba wo Isilayeli ankho muna ombembwa. Mahi Salomau wanepele ovakai ovanyingi vovilongo ovikuavo iya ankho vafenda ovilolo. Katutu-katutu Salomau apilululwa iya nae ehimbika okufenda ovilolo. Jeova anumana unene. Apopila Salomau okuti: ‘Ouhamba wo Isilayeli kamaukala vali wombunga yove mandyiuyapula pokati. Onthele onene vali maikala na umwe povapika vove iya ombunga yove maitumina onthele onthutu.’

Jeova ayandyulula vali etyi apopia monkhalelo onkhuavo. Umwe po vaumbili va Salomau, Jeroboau, aende kotyilongo tyimwe avasiko omuuli utiwa Aia. Omuuli Aia atandula otyikutu tyae ovinthimbu 12 apopila Jeroboau okuti: ‘Jeova mapolo Ouhamba wo Isilayeli kombunga ya Salomau euyapula pokati. Polapo ovinthimbu ekwi, mokonda ove mokala ohamba yomalongo ekwi.’ Etyi Ohamba Salomau yetyiiva aihande okuipaa Jeroboau! Jeroboau akaholama ko Egitu. Etyi Salomau ankhia omona wae Roboau akala ohamba. Konyima Jeroboau aimbuka okuti omuvo wehikapo wokukondoka ko Isilayeli.

 Ovakulu vo mo Isilayeli avapopila Roboau okuti: ‘Inkha utekula nawa ovanthu, navo mavakala ovakuatyili kuove.’ Mahi omapanga a Roboau omakula ae ovakuendye avemupopila okuti: ‘Tekula ovanthu onya! Veavela ovilinga ovinyingi!’ Roboau alingi ngetyi omapanga ae emupopila. Atekula ovanthu onya iya avemutyitukila-po. Avaholovona Jeroboau akale ohamba yomalongo ekwi ankho aihanwa okuti omalongo o Isilayeli. Mahi omalongo omakuavo evali ahupapo ankho aihanwa okuti omalongo ouhamba wo Judaa, atuminwa na Roboau. Omalongo 12 o Isilayeli pahe aatepuka pokati.

Jeroboau ankho kahande ovanthu vae vakafende ko Jelusalei, otyilongo ankho tyituminwa nohamba Roboau. Ove utyii omokonda yatyi? Jeroboau ankho una owoma wokuti ovanthu mavemuyale avakakuatesako Roboau. Alingi ovilolo vivali vio olu apopila ovanthu okuti: ‘Ko Jelusalei okokule unene pala onwe. Mupondola okufenda vala kuno.’ Ovanthu avehimbika okufenda ovilolo vio olu mahi avalimbwa vali Jeova.