Ouhamba wo Asilia ankho utuminale omalongo ekwi ouhamba wo Isilayeli. Pahe Senakelibe, ohamba yo Asilia, ankho uhanda vali okutumina omalongo evali o Judaa. Ahimbika okupunda omapunda-umbo o Judaa like-like. Mahi epunda-umbo ankho ahanda vali unene o Jelusalei. Senakelibe ankho ketyii okuti Jeova ukahi nokuamena o Jelusalei.

Ezekia, ohamba yo Judaa, aavela onombongo ononyingi opo ayovole o Jelusalei. Senakelibe atambula onombongo, mahi no ngotyo atumu omafualali opo ahanye-po o Jelusalei. Ovanthu mepunda-umbo, avatili unene owoma, mokonda ova Asilia ankho veli unene popepi. Ezekia atolela ovanthu okuti: ‘Muhakalei nowoma. Ova Asilia vapama unene, mahi Jeova metukuatesako atupame vali kuvo.’

Senakelibe atumu omuundapi wae Rabesake, ko Jelusalei opo akalave ovanthu. Etyi Rabesake ehika mepunda-umbo ahimbika okuyolela peulu okuti: ‘Jeova kememukuatesako. Ezekia ukahi nokumukemba. Petupu huku nawiki upondola okumuyakulila kuonthue.’

Ezekia apulu ku Jeova oityi vena okulinga. Jeova akumbulula okuti: ‘Uhatile owoma kuetyi Rabesake ekupopila. Senakelibe kamanyingila mo Jelusalei.’ Konyima, Ezekia atambula omukanda watunda ku Senakelibe. Omukanda wapopia okuti: ‘Uhelipuilise vala, Jeova kemekuyovola.’ Ezekia elikuambela okuti: ‘Mbambavo, Jeova, tuyovole opo aveho vetyinoñgonoke okuti ove vala Huku yotyotyili.’ Jeova emupopila okuti: ‘Ohamba yo ko Asilia kamainyingila mo Jelusalei. Ame mandyiamena epunda-umbo liange.’

Senakelibe ankho una onthumbi yokuti mavanyingila mo Jelusalei. Motyinthiki  tyimwe, Jeova atumu oandyu pana palalela omafualali. Oandyu aipaa omafualali 185.000! Omafualali aeho epondolo Ohamba Senakelibe aipawa. Iya ahapopi vali natyike mahi akondoka, nokeumbo. Jeova waamenene Ezekia no Jelusalei ngetyi apopile. Ankho wali mo Jelusalei, ove ñgeno wayumba onthumbi mu Jeova?